கரூர் சம்பவம் குறித்து நீர்வளத்துறை அமைச்சர் அதிரடி; விஜயை கைது செய்யும் நிலை வந்தால் பண்ணுவோம் – எடப்பாடி, அண்ணாமலை விமர்சனங்களுக்குப் பதிலடி!
காட்பாடி, அக்டோபர் 4, 2025: வேலூர் மாவட்டம் காட்பாடி அருகே சேர்க்காட்டில் நடைபெற்ற 'நலம் காக்கும் ஸ்டாலின்' மருத்துவ முகாமில் பங்கேற்ற மாநில நீர்வளத்துறை அமைச்சர் துரைமுருகன், தமிழகத்தில் வடகிழக்குப் பருவமழைக்கான முன்னேற்பாடுகள் தீவிரமாக நடைபெற்று வருவதாகவும், எவ்வளவு மழை வந்தாலும் தாங்கக்கூடிய அளவுக்கு அரசு தயாராக இருப்பதாகவும் செய்தியாளர்களிடம் தெரிவித்தார்.
பருவமழை முன்னெச்சரிக்கை நடவடிக்கைகள்:
வடகிழக்குப் பருவமழை தொடர்பாக மாநில அரசு இரண்டு வகைகளில் நடவடிக்கை எடுத்துள்ளதாக அமைச்சர் துரைமுருகன் குறிப்பிட்டார்:
முன்னெச்சரிக்கை: பருவமழைக்கு முன்பு ₹30 கோடி மதிப்பீட்டில் நீர்நிலைகளைத் தூர் வாருதல், கரைகளைப் பலப்படுத்துதல் உள்ளிட்ட பல்வேறு முன்னெச்சரிக்கை நடவடிக்கைகள் எடுக்கப்பட்டுள்ளது.
நீர்வளப் பணிகள்: நீர்வளப் பாதைகளைச் செப்பனிடுதல், நீர்நிலைகளைப் பாதுகாத்தல், புதிய கால்வாய்களை ஏற்படுத்துதல் போன்ற பணிகள் ₹160 கோடி மதிப்பீட்டில் செயல்படுத்தப்பட்டுள்ளது.
"தமிழக அரசைப் பொறுத்தவரை எவ்வளவு மழை வந்தாலும் தாங்கக்கூடிய அளவிற்கு முன்னெச்சரிக்கை நடவடிக்கைகள் எடுக்கப்பட்டுள்ளது," என்று அவர் உறுதிபடத் தெரிவித்தார்.
கரூர் சம்பவம் மற்றும் அரசியல் விமர்சனங்களுக்குப் பதில்:
செய்தியாளர்கள் எழுப்பிய கரூர் விவகாரம் தொடர்பான கேள்விகளுக்கும், எதிர்க்கட்சிகளின் விமர்சனங்களுக்கும் அவர் பதிலளித்தார்:
நீதிமன்றத்தின் கண்டனம்: கரூர் சம்பவத்தில் நீதிமன்றம் தாமகவுக்குக் கண்டனம் தெரிவித்ததைக் குறித்துக் கேட்டபோது, "நீதிபதி சொல்வதற்கு நாம் எதுவும் சொல்லக்கூடாது. நீதிபதிகள் எதைச் சொன்னாலும் நாம் கேட்டுக்கொள்ள வேண்டும். ஆனால், அவர்கள் உண்மையைத்தான் சொல்லியுள்ளார்கள் என்று குறிப்பிட்டார்.
எடப்பாடி பழனிசாமியின் தேர்தல் கணிப்பு:
210 தொகுதிகளிலும் அ.தி.மு.க. வெற்றி பெறும் என்று எடப்பாடி பழனிசாமி கூறியது குறித்துக் கேட்டதற்கு, ஒவ்வொருத்தரும் அப்படித்தான் சொல்வார்கள். சீமானைக் கேட்டால்கூட அவரும் அப்படித்தான் சொல்லுவார். பொதுவாகவே தேர்தல் வரும்போது அவர்கள் அப்படிதான் சொல்லிக் கொள்வார்கள் என்று சிரித்தபடி பதிலளித்தார்.
அண்ணாமலையின் விமர்சனம்:
கள்ளக்குறிச்சி சம்பவத்திற்குச் செல்லாத முதலமைச்சர், கரூர் சம்பவத்திற்கு உடனடியாகச் சென்றது ஏன், விசாரணை கமிஷன் அமைத்தது ஏன் என்று அண்ணாமலை கேள்வி எழுப்பியது குறித்துப் பேசியபோது, எதிர்க்கட்சியினர் அப்படித்தான் சொல்வார்கள். அன்றைக்கு இருந்த சூழ்நிலை வேறு, இன்றைக்கு இருக்கும் சூழ்நிலை வேறு. 41 பேர் உயிரிழந்த சம்பவம் இது லேசான காரியமா? அனைத்து ஊடகங்களும் உலகமே இந்தச் சம்பவத்தைப் பார்த்துக் கொண்டிருக்கிறது. எவ்வளவு பெரிய சம்பவம் இது. அதனால்தான் முதல்வர் உடனடியாகச் சென்றார் என்று விளக்கம் அளித்தார்.
நடிகர் விஜய் கைது குறித்து:
நடிகர் விஜய் கைது செய்யப்படுவாரா என்ற கேள்விக்கு நேரடியாகப் பதிலளித்த அமைச்சர், விஜயை கைது செய்யும் நிலை வந்தால் கைது பண்ணுவோம். தேவையில்லாத சூழலில் பண்ண மாட்டோம். அனாவசியமாக நாங்க யாரையும் கைது செய்ய மாட்டோம் என்று துரைமுருகன் திட்டவட்டமாகக் கூறினார்.
