தமிழக வெற்றிக் கழகம் அங்கீகரிக்கப்படாத கட்சி: உயர் நீதிமன்றத்தில் தேர்தல் ஆணையம் தகவல்! Thamizhaga Vetri Kazhagam (TVK) is Not a Recognized Party, Election Commission Informs Madras High Court

கரூர் நெரிசல் விபத்தில் 41 பேர் உயிரிழப்பு விவகாரம்; வழக்கில் விஜய்யை சேர்க்கவும், ஒரு கோடி இழப்பீடு வழங்கவும் கோரி மனு!

சென்னை, அக்டோபர் 17: நடிகர் விஜய் தலைமையிலான தமிழக வெற்றிக் கழகம் (த.வெ.க.) கட்சி, இந்தியத் தேர்தல் ஆணையத்தால் அங்கீகரிக்கப்பட்ட கட்சி அல்ல என்று இந்தியத் தேர்தல் ஆணையம் சென்னை உயர் நீதிமன்றத்தில் தெரிவித்துள்ளது. கரூரில் நடந்த நெரிசல் விபத்தில் 41 பேர் பலியான சம்பவத்தையடுத்து, த.வெ.க.வின் அங்கீகாரத்தை ரத்து செய்யக் கோரி தாக்கல் செய்யப்பட்ட மனுவில் இந்தத் தகவல் தெரிவிக்கப்பட்டுள்ளது.

மதுரையைச் சேர்ந்த வழக்கறிஞர் செல்வகுமார் என்பவர் சென்னை உயர் நீதிமன்றத்தில் ஒரு மனுவைத் தாக்கல் செய்தார். கரூரில் தமிழக வெற்றிக் கழகம் தலைவர் விஜய் பிரச்சாரத்தின் போது ஏற்பட்ட நெரிசலில் சிக்கிப் பெண்கள், குழந்தைகள் என 41 பேர் பலியாகியுள்ளனர்.

மனுதாரரின் குற்றச்சாட்டுகள்:

அரசியல் கட்சிகளின் கூட்டங்களுக்குப் பெண்கள், குழந்தைகளைக் கூட்டம் கூட்டுவது மக்கள் பிரதிநிதித்துவ சட்டம் மற்றும் தேர்தல் நடத்தை விதிகளுக்கு முரணானது.  மும்பை உயர் நீதிமன்றம் குழந்தைகளை அரசியல் நடவடிக்கைகளில் ஈடுபடுத்துவதைத் தடை செய்துள்ளது.

சட்ட விதிகளை மீறும் கட்சிகளின் அங்கீகாரத்தை ரத்து செய்யச் சட்டமும், உச்ச நீதிமன்ற உத்தரவுகளும் தேர்தல் ஆணையத்திற்கு அதிகாரம் வழங்கியுள்ளது. கரூர் நெரிசல், விஜய் மற்றும் த.வெ.க.வினரின் அஜாக்கிரதை மற்றும் முறையான திட்டமிடல் இல்லாததால் நடந்தது. இந்தச் சம்பவம் தொடர்பான வழக்கில் விஜய் பெயரைச் சேர்க்காமல், குற்றம் சாட்டப்பட்டவர்கள் தப்பிக்கும் வகையில் சாதாரணப் பிரிவுகளில் வழக்குப்பதிவு செய்யப்பட்டுள்ளது.

மனுதாரரின் கோரிக்கைகள்:

இந்த வழக்கு முடியும் வரை எந்த அரசியல் கட்சிக்கும் ரோடு ஷோ, கூட்டங்கள் நடத்த அனுமதிக்கக் கூடாது என டி.ஜி.பி.க்கு உத்தரவிட வேண்டும். அரசியல் கட்சிகளின் கூட்டங்களில் பெண்கள், குழந்தைகளை ஈடுபடுத்தத் தடை விதிக்கும் மக்கள் பிரதிநிதித்துவ சட்ட விதிகளைக் கண்டிப்புடன் பின்பற்ற உத்தரவிட வேண்டும். இந்த விதிகளை மீறிய த.வெ.க.வின் அங்கீகாரத்தை ரத்து செய்ய தேர்தல் ஆணையத்துக்கு உத்தரவிட வேண்டும்.

கரூர் சம்பவம் தொடர்பாக விஜய் மற்றும் த.வெ.க.வினர் மீது சிறார் நீதி சட்டம், குழந்தை தொழிலாளர்கள் தடைச் சட்டப் பிரிவுகளின் கீழ் வழக்குப்பதிவு செய்ய உத்தரவிட வேண்டும். உயிரிழந்தவர்களுக்குக் குறைந்தது தலா ஒரு கோடி ரூபாய் இழப்பீடு வழங்கத் த.வெ.க. தலைவர் விஜய்க்கு உத்தரவிட வேண்டும்.

தேர்தல் ஆணையத்தின் விளக்கம்:

இந்த மனு, தலைமை நீதிபதி எம். எம். ஸ்ரீ வஸ்தவா மற்றும் நீதிபதி ஜி. அருள்முருகன் அடங்கிய அமர்வு முன் விசாரணைக்கு வந்தபோது, இந்தியத் தேர்தல் ஆணையம் சார்பில், தமிழக வெற்றிக் கழகம் கட்சி அங்கீகரிக்கப்படாத கட்சி என்பதால், அந்தக் கட்சியின் அங்கீகாரத்தை ரத்து செய்ய வேண்டும் என்ற கோரிக்கையை எழுப்ப முடியாது என்று தெரிவிக்கப்பட்டது. இந்த விளக்கத்தின் மூலம், மனுதாரரின் முக்கியக் கோரிக்கையான அங்கீகாரத்தை ரத்து செய்வது என்ற கோரிக்கை சட்டரீதியாகச் செல்லாத நிலை உருவாகியுள்ளது.