1,600 கி.மீ. முதல் 2,500 கி.மீ. தாக்குதல் திறன் கொண்ட ஏவுகணை; மாஸ்கோவை எட்டும் உக்ரைன் தாக்குதல் வரம்பு - உலகின் எதிர்பார்ப்பு!
வாஷிங்டன்/மாஸ்கோ, அக்டோபர் 17: உக்ரைன் - ரஷ்யா போரில் ஒரு திருப்புமுனையாக அமையும் என எதிர்பார்க்கப்படும் நீண்ட தூர 'டோமஹாக்' (Tomahawk) கப்பல் ஏவுகணைகளை உக்ரைனுக்கு வழங்குவது குறித்து அமெரிக்க அதிபர் டொனால்ட் டிரம்ப் தீவிரமாகப் பரிசீலித்து வருவதாகத் தகவல் வெளியாகி, ரஷ்ய அதிபர் விளாடிமிர் புதினுக்குப் பெரும் கவலையை ஏற்படுத்தியுள்ளது.
டோமஹாக் ஏவுகணையின் முக்கியத்துவம்:
டோமஹாக் ஏவுகணைகள் சுமார் 1,600 கி.மீ. முதல் 2,500 கி.மீ. தூரம் வரை சென்று தாக்கக்கூடிய திறன் கொண்டவையாக திகழ்கிறது. இந்த ஏவுகணைகள் உக்ரைனுக்கு வழங்கப்பட்டால், ரஷ்யாவின் தலைநகரான மாஸ்கோ உட்பட அதன் மிகத் தொலைதூரப் பகுதிகள் அனைத்தும் உக்ரைனின் தாக்குதல் வரம்பிற்குள் வரும். இவை துல்லியமான தாக்குதல் திறனைக் கொண்டவை மற்றும் தற்போது உக்ரைன் பயன்படுத்தும் நீண்ட தூர ட்ரோன்களை விடவும் அதிக அழிவை ஏற்படுத்தும் ஆற்றல் கொண்டவை.
ரஷ்யாவின் எதிர்வினை மற்றும் எச்சரிக்கை:
டோமஹாக் ஏவுகணைகள் வழங்கப்பட்டால், இது மோதலை தீவிரப்படுத்தும் என்றும், இது மிகவும் ஆபத்தான நகர்வு என்றும் ரஷ்யா எச்சரித்துள்ளது. இந்த ஏவுகணைகளைப் பயன்படுத்த அமெரிக்காவின் இராணுவப் பயிற்சி, தளவாட ஆதரவு மற்றும் இலக்குகளைக் கண்டறியும் உளவுத்துறை தகவல்கள் தேவைப்படுவதால், அமெரிக்கா போரில் இதுவரை இல்லாத அளவுக்கு நேரடியாக ஈடுபடுகிறது என்று ரஷ்யா கருதுகிறது.
அதிபர் புடின் நேரடியாகவே, டோமஹாக் ஏவுகணைகளை வழங்குவது ரஷ்யா-அமெரிக்கா உறவுகளுக்கு பெரிய சேதத்தை ஏற்படுத்தும் என்று எச்சரித்துள்ளார்.
டிரம்ப் மற்றும் ஜெலென்ஸ்கியின் நிலைப்பாடு:
ரஷ்யா டோமஹாக் ஏவுகணைகளுக்குப் பயப்படுவதைக் காண்கிறோம் என்றும், இத்தகைய அழுத்தம் அமைதிக்கு உதவும் என்றும் உக்ரைன் அதிபர் ஜெலென்ஸ்கி தெரிவித்துள்ளார். போரை விரைவில் முடிவுக்குக் கொண்டு வர புடின் மறுத்தால் மட்டுமே, இந்த ஏவுகணைகளை வழங்குவது குறித்துத் தான் இறுதி முடிவை எடுப்பேன் என அதிபர் டிரம்ப் தெரிவித்துள்ளார்.
சமாதானப் பேச்சுவார்த்தைக்கு வர அழுத்தம் கொடுக்கும் ஒரு தந்திரமாகவே டிரம்ப் இந்த ஏவுகணையைப் பயன்படுத்துவதாக ரஷ்யா கருதுகிறது. இருப்பினும், அமெரிக்காவின் ஏவுகணை கையிருப்பைக் குறைப்பதில் டிரம்புக்குத் தயக்கம் உள்ளது என்றும் கூறப்படுகிறது.
போரை முடிவுக்குக் கொண்டு வருவதைத் தனது வெளியுறவுக் கொள்கையின் முக்கிய இலக்காகக் கொண்டுள்ள டிரம்ப், உக்ரைனுக்கு இந்த 'ஆட்டத்தையே மாற்றும் ஆயுதத்தை' வழங்குவாரா அல்லது இதை ரஷ்யாவுக்கு எதிரான ஒரு அழுத்த உத்தியாகப் பயன்படுத்துவாரா என்பது உலக அரங்கின் முக்கிய எதிர்பார்ப்பாக உள்ளது.
