<h3><strong>தொலைபேசியில் வந்த அழைப்பு</strong></h3>
<p>சென்னை திருமங்கலம் வி.ஆர்., வணிக வளாகத்தில் உள்ள, 'ரிலையன்ஸ் டிஜிட்டல்' ஷோரூமில், விற்பனையாளராக பணிபுரிந்து வருபவர் மாதேஷ் ( வயது 24 ) இவரை, 14 - ம் தேதி மாலை, ஷோரூமில் உள்ள மொபைல் போனில் தொடர்பு கொண்டு பேசிய பெண், தன்னை சரண்யா என அறிமுகப்படுத்தி உள்ளார்.</p>
<p>அண்ணாநகரில் உள்ள தனியார் மருத்துவமனையில் பணிபுரிந்து வருவதாகவும், இரண்டு ஐ - போன்கள் மற்றும் ஆப்பிள் ஏர்பார்ட்ஸ் வேண்டும் என்றும் தெரிவித்துள்ளார். மேலும் அவற்றை மருத்துவமனைக்கு கொண்டு வந்து கொடுத்து, 'கிரெடிட் கார்டு' மூலம் பணத்தை வாங்கி கொள்ளுங்கள் எனக் கூறியுள்ளார்.</p>
<p>அப்பெண் குறிப்பிட்டபடி, அமைந்தகரையில் உள்ள தனியார் மருத்துவமனைக்கு, மறுநாள் சென்ற மாதேஷ், இரண்டு ஐ - போன்கள் மற்றும் ஏர்பார்ட்ஸை அவரிடம் கொடுத்துள்ளார். அவற்றை வாங்கிக் கொண்ட அப்பெண், தனது தாயாரிடம் வீடியோ காலில் காண்பித்து வருவதாக கூறி, மருத்துவமனையின் உள்ளே சென்றுள்ளார். வெகுநேரமாகியும் திரும்பி வரவில்லை.</p>
<h3><strong>போலீசில் புகார்</strong></h3>
<p>தான் ஏமாற்றப்பட்டதை உணர்ந்த மாதேஷ், அமைந்தகரை போலீசாரிடம் புகார் அளித்தார். போலீசாரின் விசாரணையில், நீலகிரி மாவட்டத்தைச் சேர்ந்த சரண்யா ( வயது 28 ) என்பவர் நுாதன திருட்டில் ஈடுபட்டது தெரிய வந்தது. அவரை பிடித்து விசாரித்ததில், பிசியோ உதவியாளர் படிப்பை முடித்த அவர், சென்னையில் உள்ள உறவினரின் வீட்டில் தங்கி, மருத்துவமனைகளில் வேலை தேடி வந்தது தெரிய வந்தது.</p>
<p>அவரது காதலன் ஐ - போன் கேட்டதால் நுாதன திருட்டில் ஈடுபட்டதும், திருடிய ஐ - போன் மற்றும் ஏர்பார்ட்ஸை காதலனிடம் கொடுத்ததும் தெரிய வந்தது. சரண்யாவை கைது செய்த போலீசார் ஒரு ஐ - போனை பறிமுதல் செய்தனர்.</p>
Source: Read Full Article
