கோப்புகள் திருட்டுப் போன விவகாரத்தில் நில அளவை ஊழியர்கள் மீது நடவடிக்கை எடுக்க முயற்சிப்பதாக புகார்; அமைச்சர் தலையிட கோரிக்கை!
திருப்புவனம் வைகை ஆற்றில் ‘உங்களுடன் ஸ்டாலின்’ திட்ட முகாம் மனுக்கள் மிதந்த விவகாரத்தில், நில அளவைத்துறை ஊழியர்களைப் பலிகடா ஆக்க முயற்சிப்பதாகப் புகார் எழுந்துள்ளது. இந்தச் சம்பவம் மாவட்ட அளவில் அரசியல் மற்றும் நிர்வாகத் துறை வட்டாரங்களில் பெரும் சர்ச்சையை ஏற்படுத்தியுள்ளது.
கடந்த ஆகஸ்ட் 29-ஆம் தேதி, திருப்புவனம் வைகை ஆற்றில் ‘உங்களுடன் ஸ்டாலின்’ திட்டத்தின் கீழ் பெறப்பட்ட மனுக்கள் கண்டெடுக்கப்பட்டன. இந்தச் சம்பவம் பெரும் அதிர்ச்சியை ஏற்படுத்திய நிலையில், சிவகங்கை கோட்டாட்சியர் விஜயகுமார் விசாரணைக்கு உத்தரவிட்டார். விசாரணையின் முடிவில், திருப்புவனம் வட்டாட்சியர் விஜயகுமார் இடமாற்றம் செய்யப்பட்டதுடன், ஏழு அலுவலக ஊழியர்கள் மீதும் ஒழுங்கு நடவடிக்கை எடுக்கப்பட்டது. மேலும், வட்டாட்சியர் அலுவலகத்திலிருந்து 13 பட்டா மாறுதல் கோப்புகள் திருடு போனதாக போலீஸில் புகார் அளிக்கப்பட்டது. ஆனால், சி.சி.டி.வி. கேமரா இல்லாததால், இதுவரை யாரும் கைது செய்யப்படவில்லை.
இந்நிலையில், போலீஸ் விசாரணை முடிவடையாத சூழ்நிலையில், நில அளவைப் பிரிவில் பணியாற்றும் முதுநிலை வரைவாளர் சரவணனுக்கு 17 ‘பி’-ன் கீழ் நடவடிக்கை எடுக்கவும், தற்காலிகப் பணியாளர் அழகுப்பாண்டியைப் பணிநீக்கம் செய்யவும் மாவட்ட ஆட்சியர் அறிவுறுத்தியதாகக் கூறப்படுகிறது. இதற்கு எதிர்ப்பு தெரிவித்துள்ள தமிழ்நாடு அரசு அலுவலர் ஒன்றியம், நில அளவைப் பிரிவிடம் ஒப்படைக்கப்பட்ட கோப்புகள் எதுவும் காணாமல் போகவில்லை என்றும், பட்டா மாறுதல் கோப்புகளை வட்டாட்சியர் அலுவலகம் முறையாகத் திரும்ப ஒப்படைக்கவில்லை என்றும் தெரிவித்துள்ளது.
இதுகுறித்து தமிழ்நாடு அரசு அலுவலர் ஒன்றிய மாநிலச் செயலாளர் அருள்ராஜ், வருவாய்த்துறை அமைச்சர் மற்றும் உயர் அதிகாரிகளுக்கு அனுப்பிய மனுவில், ஒருதலைப்பட்சமாக நடவடிக்கை எடுக்க முயற்சிப்பதைக் கைவிட வேண்டும் என வலியுறுத்தியுள்ளார். இந்த விவகாரம், குற்றவாளிகளைத் தண்டிப்பதற்குப் பதிலாக, நிரபராதிகளைப் பலிகடா ஆக்குவதா என்ற கேள்வியை எழுப்பியுள்ளது.
