போலீசார் தள்ளியதில் தந்தை இறந்ததாக மகன் பரபரப்புக் குற்றச்சாட்டு; கொடுங்கையூரில் அதிர்ச்சி!
சென்னையில் வாகனச் சோதனையின்போது, மது அருந்திவிட்டு காரை ஓட்டிவந்த வங்கி அதிகாரி ஒருவருக்கும் போக்குவரத்து போலீசாருக்கும் இடையே ஏற்பட்ட வாக்குவாதத்தின்போது, கீழே விழுந்து தலையில் காயமடைந்து அந்த அதிகாரி உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. போலீசார் தள்ளியதால்தான் தனது தந்தை உயிரிழந்தார் என்று அவரது மகன் பரபரப்புக் குற்றச்சாட்டைப் பதிவு செய்துள்ளார்.
சம்பவ விவரம்
சென்னை, கொடுங்கையூர், வெங்கடேஷ்வரா முதல் தெருவைச் சேர்ந்தவர் கரம்சந்த் காமராஜ் (50). இவர் சென்னை தி. நகரில் உள்ள இந்தியா சிட்டி வங்கியில் கடன் பிரிவின் மண்டல அதிகாரியாகப் பணியாற்றி வந்தார். இவரது மகன் குரு சரண் ராஜ் (21), தனியார் கல்லூரியில் பி.டெக் இறுதி ஆண்டு படித்து வருகிறார்.
நேற்று இரவு, வங்கி அதிகாரி கரம்சந்த் காமராஜ் மாதவரம் நெடுஞ்சாலை (சிங்கப்பூர் ஷாப்) வழியாக காரில் சென்று கொண்டிருந்தார். அப்போது அங்கு வாகனச் சோதனையில் ஈடுபட்டிருந்த செம்பியம் போக்குவரத்து காவலர்கள் அவரது காரைத் தடுத்து நிறுத்திச் சோதனை செய்தனர்.
சோதனையில், கரம்சந்த் மது அருந்திவிட்டு கார் ஓட்டி வந்தது தெரியவந்தது. இதைத் தொடர்ந்து, போக்குவரத்து போலீசார் அவர் மீது மது அருந்திவிட்டு கார் ஒட்டியதாக வழக்கு பதிவு செய்தனர்.
வாக்குவாதம் மற்றும் உயிரிழப்பு
இதனால் கோபமடைந்த கரம்சந்த் காமராஜ், உடனடியாகப் போக்குவரத்து போலீசாருடன் வாக்குவாதத்தில் ஈடுபட்டதாகக் கூறப்படுகிறது.
அப்போது போலீசாருக்கும் - வங்கி அதிகாரிக்கும் இடையே தள்ளு முள்ளு ஏற்பட்டதாகக் கூறப்படுகிறது. இந்தத் தள்ளுமுள்ளுவில் வங்கி அதிகாரி கரம்சந்த் கீழே விழுந்ததில் தலையில் காயம் ஏற்பட்டு, சம்பவ இடத்திலேயே மயங்கி விழுந்தார்.
உடனே ஆம்புலன்சுக்குத் தகவல் தெரிவிக்கப்பட்ட நிலையில், ஆம்புலன்ஸ் ஊழியர்கள் கரம்சந்தைப் பரிசோதித்து, அவர் ஏற்கனவே உயிரிழந்துவிட்டதாகத் தெரிவித்தனர்.
மகனின் பரபரப்புக் குற்றச்சாட்டு
தகவலறிந்து சம்பவ இடத்திற்கு வந்த செம்பியம் போலீசார், கரம்சந்த் காமராஜின் உடலைக் கைப்பற்றிப் பிரேதப் பரிசோதனைக்காக கே.எம்.சி. மருத்துவமனைக்கு அனுப்பி வைத்தனர். மேலும், இந்தச் சம்பவம் குறித்து விசாரணை நடத்தி வருகின்றனர்.
இதற்கிடையே, உயிரிழந்த வங்கி அதிகாரியின் மகன் குரு சரண் ராஜ், செம்பியம் காவல் நிலையத்தில் அளித்த புகாரில், தன்னுடைய தந்தையைப் போக்குவரத்து காவலர்கள் தள்ளியதால்தான் அவர் கீழே விழுந்து உயிரிழந்தார் என்று பரபரப்புக் குற்றச்சாட்டைப் பதிவு செய்துள்ளார்.
இந்தச் சம்பவம் கொடுங்கையூர் மற்றும் சென்னை பொதுமக்கள் மத்தியில் பெரும் அதிர்ச்சியையும் பதற்றத்தையும் ஏற்படுத்தியுள்ளது.
