திமுகவை ஊழல் அரசு எனக் குற்றம்சாட்டிய இபிஎஸ்; விவசாயிகளுக்கான திட்டங்கள் செயல்படுத்தப்படும் என உறுதி!
அ.தி.மு.க.வின் பொதுச்செயலாளர் எடப்பாடி பழனிசாமி, கோவையில் ‘மக்களை காப்போம் – தமிழகத்தை மீட்போம்’ என்ற தலைப்பில் நடைபெற்ற எழுச்சிப் பயணத்தில் கலந்துகொண்டு உரையாற்றினார். அப்போது, வரும் 2026 சட்டமன்றத் தேர்தலில், அ.தி.மு.க.-பா.ஜ.க. கூட்டணி அமோக வெற்றி பெற்று, மீண்டும் ஆட்சியமைக்கும் எனத் திட்டவட்டமாகத் தெரிவித்தார்.
தி.மு.க. ஆட்சியைக் கடுமையாக விமர்சித்த அவர், இந்த ஆட்சி ஊழல் மற்றும் மக்கள் விரோத நடவடிக்கைகளில் ஈடுபட்டு வருவதாகக் குற்றம் சாட்டினார். குறிப்பாக, விவசாயிகளை அவமதிக்கும் வகையில் தி.மு.க. செயல்படுவதாகக் கூறினார். மேலும், சுகாதாரத்துறையில் நடைபெறும் முறைகேடுகள் மற்றும் மதுக்கடைகள் மூலம் நடைபெறும் ஊழல் குறித்தும் அவர் கடுமையாக விமர்சித்தார்.
அ.தி.மு.க. மீண்டும் ஆட்சிக்கு வந்தால், அத்திக்கடவு-அவிநாசி இரண்டாவது கட்டத் திட்டம், குடிமராமத்து மற்றும் விவசாயிகளுக்கான பல்வேறு நலத்திட்டங்கள் மீண்டும் செயல்படுத்தப்படும் என அவர் உறுதியளித்தார். எடப்பாடி பழனிசாமியின் இந்த உரை, கட்சித் தொண்டர்கள் மத்தியில் புதிய உற்சாகத்தை ஏற்படுத்தியுள்ளது.
