திமுக-காங்கிரஸ் கூட்டணியில் பூகம்பம்: ஜோதிமணி எம்பி அதிரடி அறிக்கை!

காங்கிரஸை யாராலும் காப்பாற்ற முடியாது! தொகுதிப் பங்கீட்டில் வெடித்த பூகம்பம்; ஜோதிமணி எம்பி கடும் ஆவேசம்!

தமிழக சட்டமன்றத் தேர்தலுக்கான திமுக - காங்கிரஸ் இடையிலான தொகுதிப் பங்கீடு இறுதியாகிவிட்டதாகக் கூறப்படும் நிலையில், காங்கிரஸ் கட்சிக்குள் மிகப்பெரிய உட்கட்சிப் பூசலும், கூட்டணிக் கசப்பும் பகிரங்கமாக வெடித்துள்ளது. கரூர் நாடாளுமன்ற உறுப்பினர் ஜோதிமணி அவர்கள் வெளியிட்டுள்ள அதிரடி அறிக்கை, அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

கடந்த சில நாட்களாகவே திமுக - காங்கிரஸ் இடையே 'அதிகாரப் பகிர்வு' மற்றும் 'கூடுதல் தொகுதிகள்' தொடர்பாக மறைமுக மோதல்கள் நீடித்து வந்த நிலையில், தற்போது அது வீதிக்கு வந்துள்ளது.

ஜோதிமணி எம்பியின் அறிக்கையில் உள்ள அதிரடித் தாக்குதல்கள்:

வெளிப்படைத்தன்மை இல்லை:

 "திமுக உடனான தொகுதிப் பங்கீட்டில் எந்தவிதமான வெளிப்படைத்தன்மையும் இல்லை. மாவட்ட மற்றும் மாநில நிர்வாகிகளுடன் விரிவாக விவாதித்த பிறகே தொகுதிகளைத் தேர்வு செய்ய வேண்டும் என்ற எங்களது கோரிக்கை முற்றிலும் நிராகரிக்கப்பட்டுள்ளது" என்று அவர் குற்றம் சாட்டியுள்ளார்.

தலைமை மீது சாடல்: 

"மாநிலத் தலைவர், சட்டமன்றக் கட்சித் தலைவர் மற்றும் ஒருசில பொறுப்பாளர்கள் மட்டுமே கட்சி அல்ல. இவர்கள் காங்கிரஸின் நலன்களை திமுக-விடம் முழுமையாகச் சமரசம் செய்து கொண்டுவிட்டார்கள். கட்சிக்காக ஒரு சிறு துரும்பைக் கூடக் கிள்ளிப்போடாதவர்கள், இன்று கட்சியை விற்றுத் தின்பதைப் பார்க்கும்போது வேதனையாக உள்ளது" எனத் தனது சொந்தக் கட்சித் தலைமை மீதே அவர் பாய்ந்துள்ளார்.

வேட்பாளர் தேர்வில் எச்சரிக்கை: 

"இதே விற்பனை அணுகுமுறையுடன் (Selling approach) வேட்பாளர் தேர்வும் நடந்தால், தமிழகத்தில் காங்கிரஸை யாராலும் காப்பாற்ற முடியாது" என்று அவர் மிகக் கடுமையான எச்சரிக்கையை விடுத்துள்ளார்.

பட்டியலுக்குப் பின் அதிரடி: 

தொகுதிப் பட்டியல் அதிகாரப்பூர்வமாக வெளியான பிறகு, இது குறித்துத் தான் இன்னும் விரிவாகப் பேசப் போவதாகவும் ஜோதிமணி குறிப்பிட்டுள்ளார்.

கூட்டணியில் பாதிப்பு ஏற்படுமா?

ஏற்கனவே திமுக தரப்பில் ஜோதிமணி மற்றும் மாணிக்கம் தாகூர் போன்றோருக்கு மீண்டும் சீட் வழங்கக் கூடாது என்று ஒரு தரப்பு வலியுறுத்தி வந்த நிலையில், தற்போது ஜோதிமணியின் இந்த வெளிப்படையான போர்க்கொடி திமுக - காங்கிரஸ் கூட்டணியின் தேர்தல் வெற்றியைப் பாதிக்குமோ என்ற அச்சத்தை காங்கிரஸ் தொண்டர்களிடையே ஏற்படுத்தியுள்ளது.

பாஜக மற்றும் அதிமுக போன்ற கட்சிகள் இந்தக் கூட்டணியின் விரிசலை உற்றுநோக்கி வரும் வேளையில், காங்கிரஸ் மேலிடம் இந்தப் பிரச்சினையை எப்படிச் சமாளிக்கப் போகிறது என்பதே தற்போதைய கேள்வி