சண்டையில் முடிந்த காதல்; இரு காதலர்களின் உயிர் பிரிந்தது - அறை எண் 103-ல் நடந்தது என்ன?
திருமணமாகாத இரு இளம் காதலர்கள், வாக்குவாதம் காரணமாகப் பிரிந்த நிலையில், காதலி தங்கும் விடுதி அறையில் தூக்கிட்டுத் தற்கொலை செய்துகொண்டதால், இதைக் கண்ட காதலனும் உயிரை மாய்த்துக்கொண்ட சம்பவம் சென்னை மக்களை உலுக்கியுள்ளது. இது குறித்துக் காவல்துறை விசாரணை நடத்தி வருகின்றனர்.
சென்னை, அண்ணாநகர் மேற்குப் பகுதியைச் சேர்ந்த 20 வயது இளம் பெண் திரிஷா. இவர், திருமங்கலம் பகுதியில் உள்ள ஒரு துணிக்கடையில் பகுதிநேரமாகப் பணிபுரிந்து வந்தார். அதே கடையில் திருவள்ளூர் மாவட்டம், கீச்சலம் பகுதியைச் சேர்ந்த 22 வயது ராபின் என்பவரும் வேலை செய்து வந்தார். வேலை செய்யும் இடத்தில் இருவருக்கும் இடையே நட்பு ஏற்பட்டு நாளடைவில் காதலாக மாறியுள்ளது. இவர்களின் காதல் குறித்து இரு வீட்டாரிடமும் தெரிவித்த நிலையில், பெற்றோர்களும் இவர்களது காதலுக்குச் சம்மதம் தெரிவித்துள்ளனர்.
இந்நிலையில், நேற்று ராபின் சென்னை வேப்பேரி சர்ச் சாலையில் உள்ள ஒரு தனியார் தங்கும் விடுதியில் 103-ம் எண் கொண்ட அறையை எடுத்துள்ளார். அங்கு ராபினும் திரிஷாவும் தங்கியுள்ளனர். இருவரும் இருந்த அறையில் திடீரெனச் சண்டை ஏற்பட்டதாகத் தெரிகிறது. இதனால் மனமுடைந்த ராபின், அறையின் கதவை வெளியிலிருந்து பூட்டிவிட்டு விடுதியை விட்டு வெளியே சென்றுள்ளார். ஊழியர்கள் இதை கவனிக்கவில்லை என்று கூறப்படுகிறது.
சில மணி நேரம் கழித்து விடுதிக்குத் திரும்பிய ராபின், கதவைத் திறந்து பார்த்தபோது அதிர்ச்சி காத்திருந்தது. திரிஷா அறையில் தூக்கிட்டுத் தற்கொலை செய்துகொண்டிருப்பதைக் கண்டு அவர் உறைந்துபோனார். என்ன செய்வதென்று தெரியாமல் தவித்த ராபின், திரிஷாவின் தோழியான ஸ்வேதா என்பவருக்கு வாட்ஸ்அப் மூலம், 'திரிஷா இறந்துவிட்டாள், நானும் தற்கொலை செய்து கொள்ளப் போகிறேன்' என உருக்கமான குறுஞ்செய்தியை அனுப்பியுள்ளார்.
இந்தச் செய்தியைக் கண்டு அதிர்ச்சியடைந்த ஸ்வேதா, உடனடியாக ராபினின் உறவினர்களுக்குத் தகவல் தெரிவித்துள்ளார். ராபினின் உறவினர்கள் வீட்டிற்குச் சென்று பார்த்தபோது, அங்கே ராபினும் தூக்கில் தொங்கிய நிலையில் சடலமாகக் கிடந்துள்ளார். ஒரே இரவில் அடுத்தடுத்து நடந்த இந்தச் சோகம், இரு குடும்பத்தினரையும் பெரும் சோகத்தில் ஆழ்த்தியுள்ளது.
இந்தச் சம்பவம் குறித்து வேப்பேரி காவல்துறையினர் வழக்குப் பதிவு செய்து விசாரித்து வருகின்றனர். தற்கொலை செய்துகொண்ட ராபினின் உடல் பிரேதப் பரிசோதனைக்காக ஸ்டான்லி அரசு மருத்துவமனையில் வைக்கப்பட்டுள்ளது. இருவரது உடல்களும் அரசு மருத்துவமனையில் வைக்கப்பட்டுள்ள நிலையில், பெற்றோர் மற்றும் உறவினர்கள் கண்ணீருடன் சோகத்தில் ஆழ்ந்துள்ளனர். இந்தச் சம்பவம் இரு மனங்களை மட்டுமல்ல, இரு குடும்பங்களின் வாழ்க்கையையும் அழித்துள்ளது.
