<p>சீனாவில் செயல்படுவதுபோல, வணிக வளாக கட்டடங்கள் வழியாக மெட்ரோ ரயில்கள் செல்லும் வகையில் சென்னை மெட்ரோ ரயில் நிறுவனம் திட்டம் ஒன்றை வடிவமைத்துள்ளது. இதற்காக தனியார் நிறுவனத்துடன் ரூ.466 கோடியில் ஒப்பந்தம் மேற்கொள்ளப்பட்டுள்ளது.</p>
<p>சென்னை இரண்டாம் கட்ட மெட்ரோ ரயில் திட்டத்தின் ஒரு பகுதியாக, திருமங்கலம் மெட்ரோ இரயில் நிலையத்திற்கு அருகில் ரூ.446.88 கோடி மதிப்பீட்டில் பிரம்மாண்ட சொத்து மேம்பாட்டுத் திட்டத்தை செயல்படுத்துவதற்கான ஒப்பந்தம் வழங்கப்பட்டுள்ளது.</p>
<p>மெட்ரோ ரயில் உயர்மட்டப் பாதையை ஒட்டியுள்ள திறந்தவெளி நிலப்பகுதிகளில் வணிக மற்றும் சொத்து மேம்பாட்டுக் கட்டடங்களைக் கட்டுவதற்கான இந்த ஒப்பந்தம், தனியார் நிறுவனத்திற்கு வழங்கப்பட்டுள்ளது. இத்திட்டப்பணிகள் தொடங்கிய நாளிலிருந்து 24 மாதங்களுக்குள் நிறைவு செய்யத் திட்டமிடப்பட்டுள்ளது.</p>
<h2>திட்டத்தின் முக்கிய சிறப்பம்சங்கள்:</h2>
<p>பிரம்மாண்ட கட்டமைப்பு: 3.85 ஏக்கர் பரப்பளவில் அமையும் இத்திட்டத்தில், வழித்தடம் 5-ல் அமைந்துள்ள திருமங்கலம் மெட்ரோ நிலையத்தின் இருபுறங்களிலும் நான்கு கட்டடக் கோபுரங்கள் (A, B, C, D) கட்டப்பட உள்ளன.</p>
<h2>தளங்களின் விவரம்:</h2>
<p>A மற்றும் C கோபுரங்கள்: மூன்று அடித்தளங்கள் (Basements), தரைத்தளம் மற்றும் 9 தளங்கள்.</p>
<p>B கோபுரம்: தரைத்தளம் மற்றும் 9 தளங்கள்.</p>
<p>D கோபுரம்: தரைத்தளம் மற்றும் 2 தளங்கள்.</p>
<p><strong>தடையற்ற போக்குவரத்து இணைப்பு:</strong> திருமங்கலம் மெட்ரோ நிலையம், B மற்றும் C கட்டடக் கோபுரங்களுக்கு இடையில் அமைந்துள்ளது. ஒருங்கிணைந்த வடிவமைப்புடன் உருவாக்கப்படும் இத்திட்டத்தின் மூலம், ஒரே வளாகத்திற்குள் பயணிகள் மெட்ரோ மற்றும் பொதுப் போக்குவரத்து வசதிகளை எளிதில் அணுகும் வகையில் தடையற்ற இணைப்பு ஏற்படுத்தப்படும்.</p>
<p><strong>பணிகளின் விவரம்:</strong> கட்டுமானப் பணிகள், கட்டடக்கலை வடிவமைப்பு, உள் அலங்காரப் பணிகள், குழாய் அமைப்பு (Plumbing), மின் மற்றும் இயந்திரவியல் பணிகள், குளிரூட்டும் மற்றும் காற்றோட்ட வசதிகள் (HVAC) மற்றும் மின்தூக்கிகள் (Lifts) உள்ளிட்ட அனைத்துப் பணிகளும் இந்த ஒப்பந்தத்தில் அடங்கும்.</p>
<p>சென்னை மெட்ரோ ரயில் நிறுவனத்தின் மேலாண்மை இயக்குநர் ஆஷிஷ் சாட்டர்ஜி முன்னிலையில், சென்னை மெட்ரோ திட்ட இயக்குநர் தி. அர்ச்சுனன் மற்றும் ஒப்பந்ததாரர் நிறுவனத்தின் உதவி துணைத் தலைவர் ராஜு பன்சோடே ஆகியோர் இந்த ஒப்பந்தத்தில் கையெழுத்திட்டனர்.</p>
<p>இந்தியாவிலேயே முதல் முறையாக வணிக வளாகத்திற்குள் மெட்ரோ ரயில்கள் நேராக செல்லும் வகையில் செயல்படுத்தப்படும் இந்த பிரம்மாண்ட திட்டத்தை சென்னை பயணிகள் மிகவும் எதிர்நோக்கியுள்ளனர்.</p>
Source: Read Full Article
