<p style="text-align: justify;">தஞ்சாவூர்: கால்நடைத் தீவனங்களுக்கான தேவை அதிகரிப்பால் மக்காச்சோளத்தின் விலை உயர்ந்துள்ள நிலையில், தஞ்சை மாவட்ட விவசாயிகள் மகிழ்ச்சியடைந்துள்ளனர். கடந்த ஆண்டை விட நடப்பாண்டு குவிண்டாலுக்கு ரூ.500 வரை கூடுதல் விலை கிடைப்பதால், அறுவடை செய்த மக்காச்சோளத்தை உலர வைத்து மூட்டைகளாகக் கட்டி விற்பனை செய்யும் பணிகளில் விவசாயிகள் தீவிரமாக ஈடுபட்டுள்ளனர்.</p>
<p style="text-align: justify;"><strong>குவிண்டாலுக்கு ரூ.500 வரை விலை உயர்வு!</strong></p>
<p style="text-align: justify;">தஞ்சை மாவட்டத்தில் நெல் சாகுபடிக்கு அடுத்தபடியாக பல்வேறு மாற்றுப்பயிர் சாகுபடிகளிலும் விவசாயிகள் ஆர்வம் காட்டி வருகின்றனர். குறிப்பாக குறைந்த தண்ணீர் வசதியிலும், குறைந்த பராமரிப்புச் செலவிலும் நல்ல மகசூல் பெறக்கூடிய மக்காச்சோள சாகுபடி விவசாயிகள் மத்தியில் வரவேற்பைப் பெற்றுள்ளது.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/11/11/d5fe937cbfff9a60d4a4fccd6e615d0f1794381571246733_original.jpg" /></p>
<p style="text-align: justify;">மக்காச்சோளத்திற்கு சந்தையில் தொடர்ந்து தேவை இருந்து வருவதால், இதனைச் சாகுபடி செய்யும் விவசாயிகளின் எண்ணிக்கையும் அதிகரித்து வருகிறது. குறிப்பாக மானாவாரி நிலங்களில் மக்காச்சோள சாகுபடி அதிகளவில் மேற்கொள்ளப்படுகிறது. நெல் சாகுபடிக்குத் தேவையான தண்ணீர் கிடைக்காத பகுதிகளில் மக்காச்சோளம் சிறந்த மாற்றுப்பயிராக விளங்கி வருகிறது.</p>
<p style="text-align: justify;"><strong>கால்நடை வளர்ப்பு அதிகரிப்பால் மக்காச்சோளத்திற்கு மவுசு!</strong></p>
<p style="text-align: justify;">இறைச்சி மற்றும் பால் பொருட்களுக்கான தேவை அதிகரித்து வருவதால் கால்நடை வளர்ப்பும் விரிவடைந்து வருகிறது. அதேபோல் கோழிப்பண்ணைகளும் இறைச்சி மற்றும் முட்டை உற்பத்தியை அதிகரித்து வருகின்றன. இதன் காரணமாக கால்நடைகள் மற்றும் கோழிகளுக்குப் பயன்படுத்தப்படும் அடர் தீவனங்களின் தேவை பல மடங்கு உயர்ந்துள்ளது.</p>
<p style="text-align: justify;">இந்த அடர் தீவனங்களைத் தயாரிப்பதில் மக்காச்சோளம் முக்கிய மூலப்பொருளாகப் பயன்படுத்தப்படுகிறது. இதனால் மக்காச்சோளத்திற்கு தொடர்ந்து சந்தை வாய்ப்பு இருந்து வருகிறது. கால்நடைத் தீவன உற்பத்தி நிறுவனங்கள் மற்றும் வியாபாரிகள் மக்காச்சோளத்தை அதிகளவில் கொள்முதல் செய்து வருகின்றனர். இதன் தாக்கம் சந்தை விலையிலும் எதிரொலித்து வருகிறது.</p>
<p style="text-align: justify;"><strong>சாலையோரங்களில் காயவைக்கும் விவசாயிகள்!</strong></p>
<p style="text-align: justify;">அந்த வகையில் தஞ்சாவூர் அருகே திருக்கானூர்பட்டி, குருங்குளம், மருங்குளம், வல்லம் மற்றும் சுற்றுவட்டாரப் பகுதிகளில் விவசாயிகள் அதிகளவில் மக்காச்சோளம் சாகுபடி செய்துள்ளனர். தற்போது சோளக்கதிர்கள் நன்கு முற்றியதைத் தொடர்ந்து அறுவடைப் பணிகள் நிறைவடைந்துள்ளன.</p>
<p style="text-align: justify;">அறுவடை செய்யப்பட்ட மக்காச்சோளத்தை விற்பனைக்குத் தயார்படுத்தும் வகையில், திருக்கானூர்பட்டி - வல்லம் சாலையில் வாகனப் போக்குவரத்து இல்லாத பாதுகாப்பான இடங்களில் பரப்பி வைத்து விவசாயிகள் உலர்த்தி வருகின்றனர். நன்கு காய்ந்த பின்னர் அவற்றை மூட்டைகளாகக் கட்டி விற்பனை செய்கின்றனர்.</p>
<p style="text-align: justify;">காலை முதல் மாலை வரை வெயிலில் மக்காச்சோளத்தை உலர்த்துவதிலும், பின்னர் மூட்டைகளாகக் கட்டுவதிலும் விவசாயிகள் மும்முரமாக ஈடுபட்டு வருகின்றனர். அறுவடை முடிந்த கையோடு விற்பனையும் நடைபெறுவதால் விவசாயிகளுக்கு உடனடியாக வருவாய் கிடைத்து வருகிறது.</p>
<p style="text-align: justify;"><strong>வயலுக்கே தேடி வரும் வெளிமாவட்ட வியாபாரிகள்!</strong></p>
<p style="text-align: justify;">இதுகுறித்து தோழகிரிப்பட்டியைச் சேர்ந்த விவசாய சங்கச் செயலாளர் கோவிந்தராஜ் கூறியதாவது: கடந்த ஆண்டு மக்காச்சோளம் சாகுபடி செய்தபோது ஒரு குவிண்டால் ரூ.2,300 முதல் ரூ.2,500 வரை மட்டுமே விற்பனையானது. ஆனால் நடப்பாண்டு மக்காச்சோளத்திற்கு சந்தையில் தேவை அதிகரித்துள்ளதால் ஒரு குவிண்டால் ரூ.2,800 முதல் ரூ.3,000 வரை விலை கிடைக்கிறது.</p>
<p style="text-align: justify;">அறுவடை செய்த மக்காச்சோளத்தை நன்கு காய வைத்தவுடன் பிற மாவட்டங்களைச் சேர்ந்த வியாபாரிகளே நேரடியாக எங்கள் பகுதிக்கு வந்து கொள்முதல் செய்கின்றனர். இதனால் விளைபொருட்களை எடுத்துக்கொண்டு பல்வேறு சந்தைகளுக்குச் சென்று விற்பனை செய்ய வேண்டிய சிரமம் இல்லை.</p>
<p style="text-align: justify;">மேலும், கொள்முதல் செய்யும் வியாபாரிகள் அங்கேயே உடனடியாக பணத்தையும் வழங்கி விடுகின்றனர். இதனால் விளைபொருட்களை விற்பனை செய்துவிட்டு பணத்திற்காக நாட்கணக்கில் காத்திருக்க வேண்டிய நிலை இல்லை. குறுகிய காலத்திலேயே விவசாயிகளுக்கு வருவாய் கிடைக்கிறது.</p>
<p style="text-align: justify;"><strong>நிலையான விலை கிடைக்குமா? விவசாயிகள் எதிர்பார்ப்பு!</strong></p>
<p style="text-align: justify;">மக்காச்சோளத்திற்கு தற்போது நல்ல விலை கிடைத்தாலும், சந்தையில் நிலையான விலை இல்லாதது விவசாயிகளுக்குக் கவலையை ஏற்படுத்தியுள்ளது. அவ்வப்போது விலை ஏற்ற இறக்கத்துடன் காணப்படுவதால், அடுத்தகட்ட சாகுபடிக்கான திட்டமிடலிலும் சிரமம் ஏற்படுகிறது.</p>
<p style="text-align: justify;">இருப்பினும் கடந்த ஆண்டைக் காட்டிலும் நடப்பாண்டு கூடுதல் விலை கிடைப்பதும், வியாபாரிகளே நேரடியாக வந்து கொள்முதல் செய்வதும் விவசாயிகளுக்குப் பெரும் ஆறுதலாக அமைந்துள்ளது. சாகுபடிச் செலவுகளை ஈடுகட்டிய பிறகும் ஓரளவு நல்ல லாபம் கிடைத்து வருவதால் விவசாயிகள் மகிழ்ச்சியடைந்துள்ளனர்.</p>
<p style="text-align: justify;">எனவே, மக்காச்சோளத்திற்கு ஆண்டு முழுவதும் ஏற்ற இறக்கமின்றி நிலையான நியாயமான விலை கிடைக்கும் வகையில் தமிழக அரசு உரிய நடவடிக்கை எடுக்க வேண்டும். கொள்முதல் மையங்கள் அமைத்து விவசாயிகளின் விளைபொருட்களுக்கு உரிய விலை கிடைக்க வழிவகை செய்ய வேண்டும் என்பதே தங்களது எதிர்பார்ப்பு என விவசாயிகள் தெரிவித்தனர்.</p>
<p style="text-align: justify;">வயலில் விளைந்த மக்காச்சோளத்தை சாலையோரத்தில் காயவைத்து மூட்டைகளாகக் கட்டி விற்பனை செய்யும் தஞ்சை விவசாயிகளுக்கு, நடப்பாண்டு கிடைத்துள்ள விலை உயர்வு புதிய நம்பிக்கையை ஏற்படுத்தியுள்ளது.</p>
Source: Read Full Article
