<p>அயல்நாடுகளில் உள்ள தமிழ்ச்சங்கங்களில் தமிழாசிரியர்களை பணியமர்த்தும் நோக்கில் தமிழக அரசு அரசாணை வெளியிட்டுள்ளது.</p>
<h2><strong>தமிழாசிரியர்களுக்கு வெளிநாட்டில் வேலை</strong></h2>
<p>இது குறித்து வெளியிடப்பட்டுள்ள அறிக்கையில்,வெளிநாடுகளில் வாழும் அயலகத் தமிழர்களின் தலைமுறைகளுக்கு மொழி மற்றும் பண்பாட்டுத் தொடர்ச்சியைக் கற்பிக்கவும் திறனை மேம்படுத்தவும், தமிழ்மொழி மற்றும் தமிழ்க் கலைகளை உலகளாவிய அளவில் பரப்பிட அயலகத் தமிழர் நலன் மறுவாழ்வுத் துறையால் அரசாணை வெளியிடப்பட்டுள்ளது. இதன்காரணமாக தமிழ் இணைய கல்விக்கழகம் வாயிலாக தமிழ் ஆசிரியர்களையும், கலை பண்பாட்டுத் துறையின் வாயிலாக கலை ஆசிரியர்களையும் தேர்வு செய்து அளித்திட அயலகத் தமிழர் நலன் மற்றும் மறுவாழ்வுத் துறை கேட்டுக்கொண்டுள்ளது.</p>
<p>கம்போடியா, இந்தோனேசியா, மலாவி, மியான்மர், பிலிப்பைன்ஸ், தென் ஆப்பிரிக்கா, தான்சானியா, மொரிஷியஸ், ரீயூனியன், குவாடலூப், மார்டினிக் ஆகிய நாடுகளில் உள்ள தமிழ்ச் சங்கங்கள் தமிழ் ஆசிரியர்களை அனுப்பிட கோரியுள்ளதன் பேரில் ஆங்கிலம் நன்கு எழுத, பேசத் தெரிந்த 25 வயது நிரம்பிய, தகுதியும் திறமையும் வாய்ந்த தமிழ் ஆசிரியர்களிடமிருந்து விண்ணப்பங்கள் வரவேற்கப்படுவதாக தெரிவிக்கப்பட்டுள்ளது. இவ்விண்ணப்பங்களைத் தமிழ் இணைய கல்விக்கழகத்தின் www.tamilvu.org இணையதளத்திலிருந்து பதிவிறக்கம் செய்துகொள்ளலாம் எனவும், விண்ணப்பங்களை முழுமையாகப் பூர்த்தி செய்து, இயக்குநர், தமிழ் இணைய கல்விக்கழகம், காந்தி மண்டபம் சாலை, கோட்டூர், சென்னை 600 025 என்ற முகவரிக்கு 30.11.2026 அன்று மாலை 5.00 மணிக்குள் அனுப்பி வைக்க வேண்டும் எனவும் தேர்வு செய்யப்படும் தமிழ் ஆசிரியர்கள் ஓர் ஆண்டுக்கு ஒப்பந்த அடிப்படையில் நியமிக்கப்படுவார்கள் எனவும் அரசாணையில் தெரிவிக்கப்பட்டுள்ளது.</p>
<h2><strong>ரூ.1,25,000 ஊதியத்தில் தற்காலிகப்பணி</strong></h2>
<p>மேலும், மாதம் ஒன்றுக்கு ரூ.1,25,000 ஊதியமாக வழங்கப்பட உள்ள நிலையில், பணி ஒதுக்கீடு செய்யப்பட்ட நாட்டிற்கு ஒரு முறை சென்று திரும்புவதற்கான போக்குவரத்துச் செலவினம், விசா செலவினம், தங்குமிட செலவினங்களை நிபந்தனைகளுக்குட்பட்டு அயலகத் தமிழர் நலன் மற்றும் மறுவாழ்வுத் துறை வழங்க உள்ளதாகவும் அரசாணையில் தெரிவிக்கப்பட்டுள்ளது.</p>
Source: Read Full Article
