<p>விழுப்புரம்: இதர பிற்படுத்தப்பட்ட வகுப்பினர் (OBC), பொருளாதாரத்தில் பின்தங்கிய வகுப்பினர் (EBC) மற்றும் சீர்மரபினர் (DNT) பிரிவுகளைச் சேர்ந்த பள்ளி மாணவர்களுக்கு கல்வி உதவித்தொகை வழங்கும் பிரதமரின் PM YASASVI திட்டத்தின் கீழ், 2026–27ஆம் கல்வியாண்டுக்கான விண்ணப்பங்கள் வரவேற்கப்படுகின்றன.</p>
<p>இதுகுறித்து விழுப்புரம் மாவட்ட ஆட்சியர் வெளியிட்டுள்ள செய்திக்குறிப்பில் கூறியிருப்பதாவது:</p>
<p>மத்திய அரசின் சமூகநீதி மற்றும் அதிகாரமளித்தல் துறை சார்பில், OBC, EBC மற்றும் DNT பிரிவுகளைச் சேர்ந்த மாணவர்களின் கல்வியை ஊக்குவிக்கும் வகையில் PM YASASVI – Top Class Education in Schools திட்டம் செயல்படுத்தப்பட்டு வருகிறது.</p>
<p>இத்திட்டத்தின் கீழ், தேசிய கல்வி உதவித்தொகை இணையதளத்தில் (National Scholarship Portal) அறிவிக்கப்பட்டுள்ள 100 சதவீத தேர்ச்சி பெற்ற சிறந்த பள்ளிகளில் 2026–27ஆம் கல்வியாண்டில் 9 முதல் 12ஆம் வகுப்பு வரை பயிலும் தமிழகத்தைச் சேர்ந்த தகுதியான மாணவர்கள் விண்ணப்பிக்கலாம்.</p>
<h2>ரூ.1.25 லட்சம் வரை உதவித்தொகை</h2>
<p>இத்திட்டத்தின் கீழ் கல்விக் கட்டணம் மற்றும் விடுதிக் கட்டணத்திற்காக மத்திய அரசு ஆண்டுக்கு அதிகபட்சமாக 9 மற்றும் 10ஆம் வகுப்பு மாணவர்களுக்கு ரூ.75,000 வரையும், 11 மற்றும் 12ஆம் வகுப்பு மாணவர்களுக்கு ரூ.1,25,000 வரையும் கல்வி உதவித்தொகையாக வழங்குகிறது. மேலும், இத்திட்டத்தில் 30 சதவீத இடங்கள் மாணவிகளுக்கு ஒதுக்கப்பட்டுள்ளன.</p>
<h2>விண்ணப்பிக்க கடைசி நாள்</h2>
<p>2026–27ஆம் கல்வியாண்டிற்கான புதிய விண்ணப்பங்களை மாணவர்கள் தேசிய கல்வி உதவித்தொகை இணையதளமான https://scholarships.gov.in என்ற முகவரியில் சமர்ப்பிக்க வேண்டும். மாணவர்கள் விண்ணப்பிக்க கடைசி நாள் நவம்பர் 30ஆம் தேதி ஆகும். கல்வி நிறுவனங்கள் மாணவர்களின் விண்ணப்பங்களைச் சரிபார்க்க கடைசி நாள் டிசம்பர் 15ஆம் தேதி என அறிவிக்கப்பட்டுள்ளது.</p>
<h2>யாரெல்லாம் விண்ணப்பிக்கலாம்?</h2>
<p>விண்ணப்பிக்கும் மாணவர்கள் இதர பிற்படுத்தப்பட்ட வகுப்பினர் (OBC), பொருளாதாரத்தில் பின்தங்கிய வகுப்பினர் (EBC) அல்லது சீர்மரபினர் (DNT) பிரிவைச் சேர்ந்தவர்களாக இருக்க வேண்டும். குடும்பத்தின் மொத்த ஆண்டு வருமானம் ரூ.2.50 லட்சத்திற்கு மிகாமல் இருக்க வேண்டும்.</p>
<p>மேலும், 2025–26ஆம் கல்வியாண்டில் 100 சதவீத தேர்ச்சி பெற்றதாக தேசிய கல்வி உதவித்தொகை இணையதளத்தில் மத்திய அரசால் வெளியிடப்பட்ட பட்டியலில் இடம்பெற்றுள்ள பள்ளிகளில் பயிலும் மாணவர்களாக இருக்க வேண்டும்.</p>
<h2>OTR எண் பதிவு செய்வது எப்படி?</h2>
<p>2026–27ஆம் கல்வியாண்டில் புதிதாக விண்ணப்பிக்க விரும்பும் 9 மற்றும் 11ஆம் வகுப்பு மாணவர்கள், தேசிய கல்வி உதவித்தொகை இணையதளத்தில் தங்களது கைப்பேசி எண் மற்றும் ஆதார் விவரங்களை உள்ளீடு செய்து OTR எண்ணைப் பதிவு செய்ய வேண்டும். பதிவு செய்யப்பட்ட கைப்பேசி எண்ணுக்கு OTR Number மற்றும் Password அனுப்பப்படும்.</p>
<p>அதனைப் பயன்படுத்தி தேவையான ஆவணங்களைப் பதிவேற்றம் செய்து புதிய விண்ணப்பத்தைச் சமர்ப்பிக்க வேண்டும் என அறிவுறுத்தப்பட்டுள்ளது.</p>
<p>தகுதிபெற்ற பள்ளிகளின் விவரங்களைத் தலைமையாசிரியர்கள், தொடர்புடைய முதன்மைக் கல்வி அலுவலர்கள் மற்றும் மாவட்ட பிற்படுத்தப்பட்டோர் நல அலுவலர்கள் மூலம் தெரிந்துகொள்ளலாம். மேலும், https://www.bcmbcmw.tn.gov.in/welfschemes.htm என்ற இணையதளத்திலும் பள்ளிகளின் விவரங்களைப் பார்க்கலாம்.</p>
<p>இத்திட்டம் தொடர்பான கூடுதல் விவரங்களுக்கு தேசிய கல்வி உதவித்தொகை இணையதளம் மற்றும் மத்திய அரசின் சமூகநீதி மற்றும் அதிகாரமளித்தல் துறை இணையதளமான https://socialjustice.gov.in ஆகியவற்றைப் பார்வையிடலாம்.</p>
<p>தகுதியுள்ள மாணவர்கள் இந்த வாய்ப்பைப் பயன்படுத்தி உரிய காலத்திற்குள் விண்ணப்பித்து கல்வி உதவித்தொகை பெற வேண்டும் என விழுப்புரம் மாவட்ட ஆட்சியர் ஷேக் அப்துல் ரஹ்மான் தெரிவித்துள்ளார்.</p>
Source: Read Full Article
