<p>புதுச்சேரி: தீபாவளி பண்டிகையை முன்னிட்டு புதுச்சேரியில் பொதுமக்களின் பாதுகாப்பு மற்றும் போக்குவரத்து நெரிசலைக் கட்டுப்படுத்தும் வகையில் 1,000 போலீஸார் பாதுகாப்புப் பணியில் ஈடுபடுத்தப்பட்டுள்ளனர். மக்கள் அதிகம் கூடும் கடைவீதிகளில் கூடுதல் போலீஸார் நியமிக்கப்பட்டுள்ளதுடன், இரவு 12 மணி வரை சிறப்பு ரோந்து மற்றும் வாகனத் தணிக்கையும் தீவிரப்படுத்தப்பட்டுள்ளது. மேலும், இன்று (நவம்பர் 6) முதல் வரும் 9-ஆம் தேதி வரை நான்கு நாட்களுக்கு நகரின் முக்கிய சாலைகளில் போக்குவரத்து மாற்றங்கள் மற்றும் கட்டுப்பாடுகள் அமல்படுத்தப்பட்டுள்ளன.</p>
<h2>கடைவீதிகளில் குவியும் பொதுமக்கள்!</h2>
<p>தீபாவளி பண்டிகை நவம்பர் 8-ஆம் தேதி கொண்டாடப்பட உள்ள நிலையில், புதுச்சேரியில் பண்டிகைக்கான கொண்டாட்டங்கள் களைகட்டத் தொடங்கியுள்ளன. புத்தாடைகள், பட்டாசுகள், இனிப்புகள் மற்றும் வீட்டு உபயோகப் பொருட்களை வாங்குவதற்காக பொதுமக்கள் அதிக அளவில் கடைவீதிகளுக்கு வருகை தருகின்றனர்.</p>
<p>அதேபோல், தீபாவளியைச் சொந்த ஊர்களில் கொண்டாடுவதற்காக புதுச்சேரியில் இருந்து பலரும் வெளியூர்களுக்குப் பயணம் மேற்கொண்டு வருகின்றனர். வெளியூர்களில் இருந்தும் ஏராளமானோர் புதுச்சேரிக்கு வருவதால் நகரின் முக்கிய சாலைகள் மற்றும் வணிகப் பகுதிகளில் வாகனப் போக்குவரத்து அதிகரித்துள்ளது. இதனைக் கருத்தில் கொண்டு, புதுச்சேரி டிஜிபி உத்தரவின்பேரில் நகரம் முழுவதும் விரிவான பாதுகாப்பு ஏற்பாடுகள் செய்யப்பட்டுள்ளன.</p>
<h2>1,000 போலீஸார் பாதுகாப்புப் பணி!</h2>
<p>புதுச்சேரியின் முக்கிய வணிகப் பகுதிகளான நேரு வீதி, காந்தி வீதி, அண்ணா சாலை, காமராஜர் வீதி உள்ளிட்ட இடங்களில் கூட்ட நெரிசலைக் கட்டுப்படுத்தவும், திருட்டு, வழிப்பறி உள்ளிட்ட குற்றச்சம்பவங்களைத் தடுக்கவும் சிறப்பு போலீஸார் நியமிக்கப்பட்டுள்ளனர்.</p>
<p>சட்டம்-ஒழுங்கு போலீஸார், குற்றப்பிரிவு போலீஸார், போக்குவரத்து போலீஸார், இந்திய ரிசர்வ் பட்டாலியன் (IRBN) மற்றும் ஊர்க்காவல் படையினர் என மொத்தம் 1,000 பேர் பாதுகாப்புப் பணியில் ஈடுபடுத்தப்பட்டுள்ளனர்.</p>
<p>கடைவீதிகளில் பொதுமக்கள் கூட்டத்தை ஒழுங்குபடுத்த ஒலிபெருக்கிகள் மூலம் அறிவிப்புகள் வெளியிடப்பட்டு வருகின்றன. மேலும், இரவு 12 மணி வரை சிறப்பு ரோந்து, மொபைல் ரோந்து மற்றும் இருசக்கர வாகன ரோந்து பணிகள் மேற்கொள்ளப்பட்டு வருகின்றன. அதேபோல், புதுச்சேரி ஸ்மார்ட் சிட்டி திட்டத்தின் கீழ் முக்கிய இடங்களில் நிறுவப்பட்டுள்ள சிசிடிவி கேமராக்கள் மூலமாகவும் போலீஸார் தொடர்ந்து கண்காணித்து வருகின்றனர்.</p>
<h2>சீனியர் எஸ்.பி. கலைவாணன் விளக்கம்!</h2>
<p>இதுகுறித்து புதுச்சேரி சட்டம்-ஒழுங்கு சீனியர் எஸ்.பி. கலைவாணன் கூறுகையில், தீபாவளி பண்டிகையை முன்னிட்டு புதுச்சேரி முழுவதும் விரிவான பாதுகாப்பு ஏற்பாடுகள் செய்யப்பட்டுள்ளன. பல்வேறு பிரிவுகளைச் சேர்ந்த 1,000 போலீஸார் பாதுகாப்புப் பணியில் ஈடுபடுத்தப்பட்டுள்ளனர்.</p>
<p>குறிப்பாக, நகரின் முக்கிய கடைவீதிகளில் சிறப்பு போலீஸார் நியமிக்கப்பட்டு கண்காணிப்புப் பணிகள் மேற்கொள்ளப்பட்டு வருகின்றன. பொதுமக்களின் கூட்ட நெரிசலைக் கட்டுப்படுத்த ஒலிபெருக்கிகள் மூலம் அறிவிப்புகள் வெளியிடப்படுகின்றன.</p>
<p>மேலும், நள்ளிரவு 12 மணி வரை சிறப்பு ரோந்து, மொபைல் பேட்ரோலிங் மற்றும் இருசக்கர வாகன ரோந்து பணிகளும் நடைபெற்று வருகின்றன என்று தெரிவித்தார்.</p>
<h2>4 நாட்களுக்கு போக்குவரத்து மாற்றம்!</h2>
<p>தீபாவளி பண்டிகையை முன்னிட்டு புதுச்சேரி நகரில் ஏற்படக்கூடிய போக்குவரத்து நெரிசலைத் தவிர்க்கும் வகையில் நவம்பர் 6-ஆம் தேதி முதல் 9-ஆம் தேதி வரை நான்கு நாட்களுக்கு போக்குவரத்து மாற்றங்கள் மற்றும் கட்டுப்பாடுகள் அமல்படுத்தப்பட்டுள்ளன.</p>
<p>புதிய பேருந்து நிலையத்தில் இருந்து நகருக்குள் வரும் வாகனங்கள் மற்றும் கிழக்குக் கடற்கரைச் சாலையில் இருந்து வரும் வாகனங்களுக்கான வழித்தடங்கள் மாற்றியமைக்கப்பட்டுள்ளன.</p>
<p>குறிப்பாக, அண்ணா சதுக்கம் முதல் 45 அடி சாலை சந்திப்பு வரையிலான அண்ணா சாலைப் பகுதி மற்றும் பட்டாணிக்கடை சந்திப்பு முதல் ஜிஆர்டி சந்திப்பு வரையிலான காமராஜர் சாலைப் பகுதிகளில் நவம்பர் 9-ஆம் தேதி மாலை 4 மணி வரை அனைத்து வகையான கனரக வாகனங்களும் செல்லத் தடை விதிக்கப்பட்டுள்ளது.</p>
<p>மேலும், நேரு வீதியில் பொதுமக்களின் கூட்ட நெரிசலைப் பொறுத்து வாகனங்கள் நுழைவதற்குத் தடை விதிக்கவும் நடவடிக்கை எடுக்கப்பட்டுள்ளது.</p>
<h2>இருசக்கர வாகனங்களுக்கு மட்டும் அனுமதி!</h2>
<p>செட்டி வீதி, நீடராஜப்பர் வீதி வரையிலான எஸ்.எஸ். பிள்ளை வீதி, பாரதி வீதி மற்றும் மகாத்மா காந்தி சாலை ஆகிய பகுதிகளில் நவம்பர் 6-ஆம் தேதி முதல் 9-ஆம் தேதி வரை தினமும் காலை 9.30 மணி முதல் இரவு 11 மணி வரை இருசக்கர வாகனங்களைத் தவிர மற்ற அனைத்து வகையான வாகனங்களும் செல்லத் தடை விதிக்கப்பட்டுள்ளது. இதனால் இந்தப் பகுதிகளுக்கு வரும் கார் உள்ளிட்ட நான்கு சக்கர வாகன ஓட்டிகள் மாற்று வழிகளைப் பயன்படுத்துமாறு அறிவுறுத்தப்பட்டுள்ளனர்.</p>
<h2>வாகனங்களை நிறுத்த தனி இடங்கள் ஒதுக்கீடு!</h2>
<p>கடைவீதிகளுக்கு பொருட்கள் வாங்க வருபவர்கள் தங்களது வாகனங்களை சாலையோரங்களில் நிறுத்துவதால் போக்குவரத்துக்கு இடையூறு ஏற்படுவதைத் தவிர்க்க, இரண்டு முக்கிய இடங்களில் வாகன நிறுத்துமிடங்கள் ஒதுக்கப்பட்டுள்ளன.</p>
<p>அதன்படி, நேரு வீதியில் அமைந்துள்ள பழைய சிறைச்சாலை வளாகம் மற்றும் அண்ணா சாலையில் உள்ள அண்ணா திடல் ஆகிய இடங்களில் இருசக்கர மற்றும் நான்கு சக்கர வாகனங்களை நிறுத்த ஏற்பாடு செய்யப்பட்டுள்ளது. பொதுமக்கள் இந்த வாகன நிறுத்துமிடங்களைப் பயன்படுத்தி போக்குவரத்து நெரிசலைத் தவிர்க்க ஒத்துழைக்குமாறு காவல்துறை கேட்டுக்கொண்டுள்ளது.</p>
<h2>வணிக நிறுவனங்களுக்கும் போலீஸார் அறிவுறுத்தல்!</h2>
<p>கடைகளுக்கு வரும் பொதுமக்களின் பாதுகாப்பைக் கருத்தில் கொண்டு, வணிக நிறுவன உரிமையாளர்கள் தங்களது கடைகளின் முன்புறம் உள்ள சாலைகளைக் கண்காணிக்கும் வகையில் சிசிடிவி கேமராக்களைப் பொருத்த அறிவுறுத்தப்பட்டுள்ளது.</p>
<p>மேலும், கடைகளின் முன்புறம் உள்ள நடைபாதைகள் மற்றும் பாதசாரிகள் செல்லும் வழிகளில் ஆக்கிரமிப்புகள் செய்யக்கூடாது என்றும், பொதுமக்கள் சிரமமின்றி நடந்து செல்ல உரிய இடவசதி ஏற்படுத்த வேண்டும் என்றும் அறிவுறுத்தப்பட்டுள்ளது.</p>
<h2>சந்தேக நபர்கள் குறித்து 112-க்கு தகவல் தெரிவிக்கலாம்!</h2>
<p>தீபாவளி பண்டிகை காலத்தில் பொதுமக்களும், வாகன ஓட்டிகளும் விழிப்புடன் இருக்க வேண்டும் என்று காவல்துறை கேட்டுக்கொண்டுள்ளது. கடைவீதிகள் மற்றும் மக்கள் அதிகம் கூடும் இடங்களில் சந்தேகத்திற்கிடமான நபர்கள் அல்லது பொருட்கள் தென்பட்டால் அவற்றை அலட்சியப்படுத்தாமல் உடனடியாக அருகிலுள்ள போலீஸாரிடம் தகவல் தெரிவிக்க வேண்டும்.</p>
<p>மேலும், காவல்துறையின் அவசர உதவி எண்ணான 112 மூலமாகவும் தகவல் தெரிவிக்கலாம் என வடகிழக்கு போக்குவரத்து எஸ்.பி. தெரிவித்துள்ளார். தீபாவளி பண்டிகையை முன்னிட்டு புதுச்சேரி நகரம் முழுவதும் போலீஸார் பாதுகாப்பு மற்றும் கண்காணிப்புப் பணிகளைத் தீவிரப்படுத்தியுள்ள நிலையில், பொதுமக்கள் போக்குவரத்து விதிமுறைகளைப் பின்பற்றி பாதுகாப்பாகப் பண்டிகையைக் கொண்டாட வேண்டும் என காவல்துறை அறிவுறுத்தியுள்ளது.</p>
Source: Read Full Article
