<h2><strong>"தாமாக முன்வந்து வழக்கு"</strong></h2>
<p>சென்னைக்கு குடிநீர் வழங்கும் செம்பரம்பாக்கம் ஏரியில் கழிவு நீர் கலப்பதால் விஷமாகி வருவதாக , நாளிதழ்களில் செய்தி வெளியானது. இது தொடர்பாக தென்மண்டல பசுமை தீர்ப்பாயம் , தாமாக முன் வந்து வழக்கு பதிவு செய்து விசாரித்து வருகிறது.</p>
<p>இந்நிலையில் , தீர்ப்பாய நீதிபதி புஷ்பா சத்யநாராயணா , வல்லுனர் குழு உறுப்பினர் சுதிர்குமார் சதுர்வேதி ஆகியோர் அடங்கிய அமர்வு பிறப்பித்த உத்தரவு ;</p>
<p>செம்பரம்பாக்கம் ஏரி நீர் தொடர்பான புகார்கள் குறித்து , மாநில மாசு கட்டுப்பாட்டு வாரியம், மாவட்ட கலெக்டர் அலுவலகத்தின் அறிக்கைகள் தாக்கல் செய்யப்பட்டன. இதில், கலெக்டர் தாக்கல் செய்த அறிக்கையில், மாசு ஏற்படும் இடங்களை கண்டறிந்து, அதை சரி செய்வதற்கான நீண்டகால வழிமுறைகள் தெரிவிக்கப்பட்டுள்ளன.</p>
<h2><strong>"ஒரு மாதத்திற்கு தடுத்து நிறுத்த வேண்டும்"</strong></h2>
<p>செம்பரம்பாக்கத்தில் 12 இடங்களில் மாதிரிகள் சேகரித்து ஆய்வு செய்ததில் , குறிப்பிட்ட வகை பாக்டீரியா நீரில் கலந்திருப்பது , மாசு கட்டுப்பாட்டு வாரிய அறிக்கையில் தெரிய வந்துள்ளது. செம்பரம்பாக்கம் ஏரிக்கு செல்லும் கால்வாய்களில் கழிவுநீர் கலப்பதை , ஒரு மாதத்திற்கு தடுத்து நிறுத்த வேண்டும் என, சென்னை பெருநகர குடிநீர் வாரியத்துக்கு , மாசு கட்டுப்பாட்டு வாரியம் உத்தரவிட்டுள்ளதாக அறிக்கையில் தெரிவிக்கப்பட்டு உள்ளது.</p>
<p>இது தொடர்பாக குடிநீர் வாரியம், நீர்வளத் துறை ஆகியவை விரிவான அறிக்கையை தாக்கல் செய்ய உத்தரவிடப்படுகிறது. இதையடுத்து இந்த வழக்கு, நவம்பர் 6 ம் தேதிக்கு ஒத்தி வைக்கப்படுகிறது என இவ்வாறு அதில் கூறப்பட்டுள்ளது.</p>
Source: Read Full Article
