<p style="text-align: justify;">தஞ்சாவூர்: தஞ்சையில் ஹெல்மெட் அணிந்த வாகன ஓட்டிகளுக்கு 3 கிலோ சின்ன வெங்காயம் சர்ப்ரைஸ் கிஃப்ட் கொடுத்து அட்டகாசமான பஞ்ச் டயலாக்குடன் பெற்றோருக்கு அறிவுரை வழங்கி அசத்தினார் போக்குவரத்து பிரிவு இன்ஸ்பெக்டர் எம்.ஜி.ரவிச்சந்திரன். இதற்கான ஏற்பாடுகளை சிறப்பாக செய்து கொடுத்து இருந்தனர் தஞ்சாவூர் ஜோதி அறக்கட்டளை நிறுவனத்தினர்.</p>
<p style="text-align: justify;">“ஹெல்மெட் போடலேன்னா ஃபைன்... ஹெல்மெட் போட்டா ஆனியன்!” என்ற வித்தியாசமான பஞ்ச் டயலாக்குடன் தஞ்சையில் போக்குவரத்து போலீசார் நடத்திய விழிப்புணர்வு நிகழ்ச்சி வாகன ஓட்டிகளிடையே கவனம் பெற்றது. ஹெல்மெட் அணிந்து இருசக்கர வாகனங்களில் வந்தவர்களை பாராட்டும் வகையில் அவர்களுக்கு 3 கிலோ சின்ன வெங்காயம் (சாம்பார் வெங்காயம்) பரிசாக வழங்கி போக்குவரத்து போலீசார் ஆச்சரியப்படுத்தினர்.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/10/06/122d75e468fbd293793cfb6688f1f0bf1791285950875733_original.jpg" /></p>
<p style="text-align: justify;">தற்போது சின்ன வெங்காயம் கிலோ ரூ.100 வரை விற்பனை செய்யப்பட்டு வரும் நிலையில், ஹெல்மெட் அணிந்தவர்களுக்கு வித்தியாசமான முறையில் வழங்கப்பட்ட இந்த ‘ஆனியன் கிஃப்ட்’ பொதுமக்களிடையே மகிழ்ச்சியையும், விழிப்புணர்வையும் ஒரே நேரத்தில் ஏற்படுத்தியது.</p>
<p style="text-align: justify;"><strong>ஹெல்மெட்டுக்கு ‘ஆனியன்’ பரிசு!</strong></p>
<p style="text-align: justify;">தஞ்சாவூர் மாவட்டத்தில் இருசக்கர வாகன ஓட்டிகள் அனைவரும் 100 சதவீதம் ஹெல்மெட் அணிய வேண்டும் என்ற நோக்கில் போக்குவரத்து காவல்துறையினருடன் இணைந்து தஞ்சாவூர் ஜோதி அறக்கட்டளையினர் பல்வேறு விழிப்புணர்வு நடவடிக்கைகளை மேற்கொண்டு வருகின்றனர்.</p>
<p style="text-align: justify;">இதன் ஒரு பகுதியாக பொதுமக்களை வெறுமனே அறிவுறுத்துவதற்கு பதிலாக, அவர்களின் கவனத்தை ஈர்க்கும் வகையில் வித்தியாசமான முயற்சிகளையும் மேற்கொண்டு வருகின்றனர். அதன்படி தஞ்சாவூர் ராஜா மிராசுதார் மருத்துவமனை சாலையில் போக்குவரத்து போலீசார் வாகன சோதனையில் ஈடுபட்டனர்.</p>
<p style="text-align: justify;"><strong>சோதனை என்றதும் பதற்றம்... பரிசு என்றதும் ஆச்சரியம்!</strong></p>
<p style="text-align: justify;">சாலையில் ஹெல்மெட் அணிந்து வந்தவர்களையும், ஹெல்மெட் அணியாமல் வந்தவர்களையும் போலீசார் தடுத்து நிறுத்தினர். போலீசார் தடுத்து நிறுத்தியதும் சில வாகன ஓட்டிகள் வழக்கமான வாகன சோதனைதான் என நினைத்து சற்று பதற்றத்துடன் நின்றனர்.</p>
<p style="text-align: justify;">ஆனால், ஹெல்மெட் அணிந்து வந்தவர்களுக்கு அபராதம் விதிப்பதற்கு பதிலாக 3 கிலோ சின்ன வெங்காயம் வழங்கப்பட்டதும் அவர்களுக்கு இன்ப அதிர்ச்சி ஏற்பட்டது.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/10/06/84b7d38d61fe183e2a73ebd8bcf4ceb91791285919725733_original.jpg" /></p>
<p style="text-align: justify;">“ஹெல்மெட் போடலேன்னா ஃபைன்... ஹெல்மெட் போட்டிருக்கிறதால ஆனியன்!” என்ற போக்குவரத்து காவல் ஆய்வாளர் ரவிச்சந்திரனின் பஞ்ச் டயலாக் அங்கு அனைவரின் முகத்திலும் மலர்ச்சியை ஏற்படுத்தியதுடன், ஹெல்மெட் அணிவதன் அவசியத்தையும் அழுத்தமாக எடுத்துரைத்தது.</p>
<p style="text-align: justify;"><strong>‘பிள்ளைங்க அடம் பிடிச்சா வாங்கித் தராதீங்க வேக வாகனத்தை!’</strong></p>
<p style="text-align: justify;">விழிப்புணர்வு நிகழ்ச்சியில் இருசக்கர வாகன ஓட்டிகளுக்கு ஹெல்மெட் குறித்து மட்டும் போலீசார் அறிவுரை வழங்கவில்லை. சிறுவர்கள் மற்றும் இளைஞர்கள் வாகனம் ஓட்டுவது தொடர்பாகவும் பெற்றோருக்கு முக்கிய அறிவுரைகள் வழங்கப்பட்டன.</p>
<p style="text-align: justify;">“பிள்ளைங்க அடம் பிடிச்சா வாங்கித் தராதே வேக வாகனம்!” என்ற வாசகத்துடன், வயது வராத குழந்தைகளுக்கு வாகனங்களை ஓட்டக் கொடுப்பதால் ஏற்படும் ஆபத்துகள் குறித்து எடுத்துரைக்கப்பட்டது.</p>
<p style="text-align: justify;">மேலும், “சின்ன வயசு பிள்ளைக்குக் கொடுக்காதே ரேஸ் பைக்... லைசன்ஸ் இல்லாமல் ஓட்ட விட்டால் பெற்றோருக்கும் போலீஸ் கேஸ்!” எனவும் போக்குவரத்து காவல் ஆய்வாளர் ரவிச்சந்திரன் எச்சரிக்கை விடுத்தார்.</p>
<p style="text-align: justify;"><strong>வேகத்துக்கு முன் உயிரை நினைத்துப் பாருங்கள்!</strong></p>
<p style="text-align: justify;">அண்மையில் சென்னை வள்ளுவர் கோட்டம் பகுதியில் ஆபத்தான முறையில் இருசக்கர வாகனங்களை ஓட்டி சாகசத்தில் ஈடுபட்டதாக கூறப்படும் நபர்கள் மீது வழக்குப்பதிவு செய்யப்பட்டு, 16 பேர் கைது செய்யப்பட்டதுடன் 50-க்கும் மேற்பட்ட இருசக்கர வாகனங்கள் பறிமுதல் செய்யப்பட்ட சம்பவத்தையும் போலீசார் சுட்டிக்காட்டினர்.</p>
<p style="text-align: justify;">சாலையில் சில நிமிட ‘சாகசம்’ வாழ்க்கை முழுவதும் சுமையாக மாறிவிடக்கூடும் என்பதால், இளைஞர்கள் வேகத்தை கட்டுப்படுத்த வேண்டும் என்றும் அறிவுறுத்தப்பட்டது.</p>
<p style="text-align: justify;"><strong>ஜோதி அறக்கட்டளைக்கு பாராட்டு</strong></p>
<p style="text-align: justify;">இந்த விழிப்புணர்வு நிகழ்ச்சிக்கான ஏற்பாடுகளை தஞ்சாவூர் ஜோதி அறக்கட்டளையினர் செய்திருந்தனர். பொதுமக்களுக்கு வழக்கமான அறிவுரைகளை மட்டும் வழங்காமல், சின்ன வெங்காயம் போன்ற அன்றாட பயன்பாட்டு பொருளை பரிசாக வழங்கி விழிப்புணர்வு ஏற்படுத்திய இந்த முயற்சி பலரது கவனத்தையும் ஈர்த்தது.</p>
<p style="text-align: justify;">“ஹெல்மெட் தலையை காப்பாற்றும்... ஆனியன் வீட்டை பார்த்துக்கொள்ளும்!” என்ற அளவுக்கு இந்த நிகழ்ச்சி பொதுமக்களிடையே பேசுபொருளாக மாறியது.</p>
<p style="text-align: justify;">சாலையில் செல்லும்போது அபராதத்தை தவிர்ப்பதற்காக மட்டுமல்லாமல், குடும்பத்தை நினைத்து ஹெல்மெட் அணிய வேண்டும் என்பதே இந்த நிகழ்ச்சியின் முக்கிய நோக்கமாக அமைந்தது. ஹெல்மெட் அணிந்து பாதுகாப்பாக பயணிப்போம்; வயது வராத பிள்ளைகளின் கைகளில் வாகனத்தை கொடுக்காமல் அவர்களின் எதிர்காலத்தையும் பாதுகாப்போம் என்பதே போலீசாரின் அறிவுரையாக இருந்தது.</p>
Source: Read Full Article
