<p><span dir="auto">ரஷ்ய அதிபர் விளாடிமிர் புதினின் ஐக்கிய ரஷ்யா கட்சி, நாடாளுமன்றத்தின் 450 இடங்களில் 355 இடங்களை கைப்பற்றி சாதனை படைத்து, மகத்தான வெற்றியைப் பெற்றுள்ளது.</span></p>
<p><span dir="auto">மத்திய தேர்தல் ஆணையத்தின்படி, 95 சதவீதத்திற்கும் மேற்பட்ட வாக்குச்சாவடிகளின் முடிவுகளின்படி, கட்சிகளுக்கு ஒதுக்கப்பட்ட 225 இடங்களில், கிரெம்ளினின் 'ஐக்கிய ரஷ்யா' கட்சி 58 சதவீதத்திற்கும் சற்று குறைவான இடங்களை வென்றதாக அசோசியேட்டட் பிரஸ் செய்தி வெளியிட்டுள்ளது. மீதமுள்ள 225 நாடாளுமன்ற உறுப்பினர்கள், ஒற்றை வாக்கெடுப்பு மூலம் தேர்ந்தெடுக்கப்பட்டனர். இவர்களில் 208 இடங்களில் ஐக்கிய ரஷ்யா வேட்பாளர்கள் முன்னிலை வகிக்கின்றனர்.</span></p>
<h2><span dir="auto">355 இடங்களை வென்ற யுனைடெட் ரஷ்யா</span></h2>
<p><span dir="auto">மத்திய தேர்தல் ஆணையத் தலைவர் எல்லா பாம்ஃபிலோவா, ஆரம்பகட்ட முடிவுகளின்படி, யுனைடெட் ரஷ்யா கட்சி 450 இடங்களில் 355 இடங்களை வென்றுள்ளதாகவும், இதுவே அக்கட்சியின் வரலாற்றிலேயே மிக அதிகபட்ச வெற்றி எண்ணிக்கையாக இருக்கும் என்றும் தெரிவித்தார்.</span></p>
<h2><span dir="auto">2021-ல் பெற்ற வாக்குகள் எவ்வளவு.?</span></h2>
<p><span dir="auto">பிப்ரவரி 2022-ல் உக்ரைனுடனான போர் தொடங்கியதிலிருந்து நடைபெறும் முதல் நாடாளுமன்றத் தேர்தல் இதுவாகும். உக்ரைனில் போரிடும் ரஷ்யப் படைகளுக்கு ஆதரவின் அடையாளமாக இந்தத் தேர்தலை புதின் முன்வைத்திருந்தார். 2021-ல் நடந்த முந்தைய நாடாளுமன்றத் தேர்தலில், 450 ஸ்டேட் டூமா இடங்களில் 324 இடங்களை யுனைடெட் ரஷ்யா வென்றது.</span></p>
<p><span dir="auto">போர் எதிர்ப்பு கட்சியான யப்லோகோ இந்தத் தேர்தல்களில் போட்டியிட தடை செய்யப்பட்டது. இருப்பினும், பல கட்சித் தலைவர்கள் சில தொகுதிகளில் போட்டியிட அனுமதிக்கப்பட்டனர். பல அரசாங்க எதிர்ப்பு அரசியல்வாதிகள் மற்றும் வேட்பாளர்களுக்கும் போட்டியிடும் வாய்ப்பு மறுக்கப்பட்டதாகக் கூறப்படுகிறது. மாஸ்கோவில் ரஷ்யாவின் 56.66 சதவீத வாக்குப்பதிவு பதிவாகியுள்ளது.</span></p>
<p><span dir="auto">அதிபர் </span><span dir="auto">விளாடிமிர் புதின்</span><span dir="auto"> ஐக்கிய ரஷ்யா கட்சியின் உறுப்பினர் அல்ல. இருப்பினும், அவர் 2008 முதல் 2012 வரை அதன் தலைவராகப் பணியாற்றினார். அப்போதும் கூட, அவர் கட்சியின் முறையான உறுப்பினராக இருக்கவில்லை. கட்சி விதிகளின்படி, தலைவராவதற்கு உறுப்பினர் தகுதி கட்டாயமில்லை. புடின் 2012-ல் கட்சித் தலைவர் பதவியிலிருந்து விலகினார். அதைத் தொடர்ந்து, டிமிட்ரி மெட்வெடேவ் அப்பொறுப்பை ஏற்றார்.</span></p>
<h2><span dir="auto">உக்ரைனிய தாக்குதலுக்கு இடையே நடந்த தேர்தல்</span></h2>
<p><span dir="auto">உக்ரேனிய ஆளில்லா விமானத் தாக்குதல்களுக்கு மத்தியில் தேர்தல்கள் நடைபெற்றன. ரஷ்யாவின் நாடாளுமன்றத் தேர்தல்களின் இறுதி நாளான ஞாயிற்றுக்கிழமையன்று, உக்ரைன் மாஸ்கோ மற்றும் அதன் சுற்றுவட்டாரப் பகுதிகளில் தாக்குதல் நடத்த, 1,600-க்கும் மேற்பட்ட ஆளில்லா விமானங்களை பயன்படுத்தியதாகக் கூறப்படுகிறது. தலைநகரை இலக்காகக் கொண்டு 450 ஆளில்லா விமானங்கள் ஏவப்பட்டதாக மாஸ்கோ மேயர் செர்ஜி சோபியானின் கூறியது குறிப்பிடத்தக்கது.</span></p>
<p> </p>
<p><span dir="auto"><iframe class="vidfyVideo" style="border: 0px;" src="https://tamil.abplive.com/web-stories/health/what-is-sleepwalking-disorder-know-causes-symptoms-and-treatment-275196" width="631" height="381" scrolling="no"></iframe></span></p>
Source: Read Full Article
