<p><span dir="auto">அமெரிக்காவுடனான போர் தொடர்வதை டெஹ்ரான் விரும்பவில்லை என்றும், இந்த மோதலை முடிவுக்குக் கொண்டுவரும் முழுப் பொறுப்பையும் வாஷிங்டன் மீதே சுமத்துவதாகவும் ஈரான் அதிபர் மசூத் பெஷெஷ்கியன் கூறியுள்ளார்<strong>. </strong></span></p>
<p><span dir="auto">கடந்த வியாழக்கிழமை ஒளிபரப்பான ஃபாக்ஸ் நியூஸ் பேட்டி ஒன்றில், அமெரிக்க அதிபர் டொனால்ட் ட்ரம்புடன் ராஜதந்திர பேச்சுவார்த்தைக்கும் ஒரு உடன்பாட்டிற்கும் ஈரான் தயாராக இருப்பதாக பெஷெஷ்கியன் கூறினார். அதே வேளையில், வாஷிங்டனும் இஸ்ரேலும் டெஹ்ரான் மீது இந்த மோதலைத் திணித்ததாக அவர் குற்றம் சாட்டினார். நியூயார்க்கில் நடைபெற்ற ஐக்கிய நாடுகள் பொதுச் சபையில் அவர் ஆற்றிய உரையைத் தொடர்ந்து, இந்த கருத்துக்கள் வெளியாகின. அந்த உரையில், ஈரான் தொடர்ந்து தன்னைத் தற்காத்துக் கொள்ளும் என்று அவர் கூறியிருந்தார்.</span></p>
<h2><span dir="auto">“அமெரிக்கா தான் ஒரு முடிவை எடுக்க வேண்டும்“</span></h2>
<p><span dir="auto">தொடர்ச்சியான ராணுவ மோதலைக் காட்டிலும், பேச்சுவார்த்தைகள் மூலம் சர்ச்சைகளைத் தீர்ப்பதையே ஈரான் விரும்பும் என்று பெஷெஷ்கியன் கூறினார். மேலும், "பேச்சுவார்த்தை மூலம் பிரச்னைகளைத் தீர்க்க முடியும் போது, நாம் ஒருவரையொருவர் கொன்று குவிக்கக் கூடாது. ஆனால், இஸ்ரேல் தூண்டிவிட்டதன் மூலம், அவர்கள் இந்தப் போரை எங்கள் மீது திணித்துள்ளனர்" என்று அவர் கூறினார். </span></p>
<p><span dir="auto">அதோடு, டெஹ்ரான் போரைத் தொடர விரும்பவில்லை என்று பெஷெஷ்கியன் தெளிவுபடுத்தினார். அதாவது, </span><span dir="auto">"ஆனால் நாங்கள் இதைத் தொடர விரும்பவில்லை. இதை முடிவுக்குக் கொண்டுவர வேண்டுமா இல்லையா என்பதை அமெரிக்காதான் முடிவு செய்ய வேண்டும்," என்று அவர் கூறினார்.</span></p>
<p><span dir="auto">மோதலை எவ்வாறு முடிவுக்குக் கொண்டுவருவது என்பதில் வாஷிங்டனும் டெஹ்ரானும் பிளவுபட்டுள்ள நிலையில், இரு தரப்பினரும் ராஜதந்திரத்தில் ஆர்வம் காட்டுவதாகத் தொடர்ந்து சமிக்ஞை காட்டி வரும் வேளையில், இந்த கருத்துக்கள் வெளிவந்துள்ளன. இந்த ஆண்டு இறுதிக்குள் போரை முடிவுக்குக் கொண்டுவர முடியுமா என்பது குறித்த கேள்விக்கு பதிலளித்த பெஷெஷ்கியன், அந்த முடிவு இறுதியில் அமெரிக்காவின் கையில்தான் உள்ளது என்று கூறியதாக ராய்ட்டர்ஸ் செய்தி வெளியிட்டுள்ளது.</span></p>
<h2><span dir="auto">“ஈரான் ஒப்பந்தத்தை விரும்புகிறது“</span></h2>
<p><span dir="auto">பேச்சுவார்த்தை நடத்த டெஹ்ரான் இன்னும் தயாராக உள்ளது என்பதற்கு ஆதாரமாக, ட்ரம்புடன் முன்னர் செய்துகொண்ட ஒரு ஒப்பந்தத்தையும் பெஷெஷ்கியன் சுட்டிக்காட்டினார். </span><span dir="auto">"ஒப்பந்தம் கையெழுத்தான இரண்டு வாரங்களுக்குள், அவர்கள் ஏன் அதை முறித்துக்கொள்ள விரும்பினார்கள்.?" என்று, முந்தைய போர்நிறுத்தம் முறிந்ததைக் குறிப்பிட்டு அவர் கேள்வி எழுப்பினார்.</span></p>
<p><span dir="auto">மேலும், "தற்போதைய அமெரிக்க அரசாங்கம், சர்வதேச சட்டக் கட்டமைப்புகளுக்கு உட்பட்டு, ஒரு உடன்பாட்டிற்கு வர விரும்பினால், நல்லது. இல்லையென்றால், அமெரிக்க இடைக்கால தேர்தல்களுக்கு முன்னரோ அல்லது தேர்தல்களுக்குப் பின்னரோ, அதனால் நமக்கு என்ன வித்தியாசம் ஏற்படப் போகிறது?" என்று அவர் கேட்டார். </span><span dir="auto">அமெரிக்க இடைக்காலத் தேர்தல்களுக்காக டெஹ்ரான் காத்திருக்கிறது என்ற கருத்தை ஈரான் அதிபர் நிராகரித்தார். மாறாக, ஈரானை நிலை குலையச் செய்யவும், அதன் அரசாங்கத்தை பலவீனப்படுத்தவும் வாஷிங்டன் முயல்வதாக அவர் குற்றம் சாட்டினார்.</span></p>
<p><span dir="auto">தொடர்ந்து, "'நான் ஈரான் மக்களுக்கு ஒரு பரிசைக் கொண்டுவர விரும்புகிறேன்' என்று ட்ரம்ப் தொடர்ந்து கூறிவந்தார்," என்றும், "ஆனால் அவர்கள் எங்களுக்குக் கொண்டுவந்த பரிசு, வழிகாட்டப்பட்ட ஏவுகணைகள், கனரக ஆயுதங்கள் மற்றும் பேரழிவு." என்று அவர் தெரிவித்தார். மேலும், </span><span dir="auto">ஈரானின் அரசியல் அமைப்பின் வீழ்ச்சிக்கு வழிவகுக்கக்கூடிய சூழ்நிலைகளை அமெரிக்கா உருவாக்க முயற்சிப்பதாக பெஷெஷ்கியன் குற்றம் சாட்டினார்.</span></p>
<p> </p>
<p><span dir="auto"><iframe class="vidfyVideo" style="border: 0px;" src="https://tamil.abplive.com/web-stories/technology/these-7-things-can-be-done-on-your-phone-using-ai-275615" width="631" height="381" scrolling="no"></iframe></span></p>
Source: Read Full Article
