<p dir="ltr" style="text-align: justify;">கோவை என்றாலே பொறியியல் தொழில், மோட்டார் மற்றும் பம்ப் உற்பத்தி துறைக்கு முக்கியத்துவம் பெற்ற நகரம் என்ற அடையாளம் உள்ளது. இந்தியாவில் பம்ப் செட் உற்பத்திக்கு மிகப்பெரிய வரலாற்றைக் கொண்ட கோவை, தற்போது உள்நாட்டு தேவையை பூர்த்தி செய்வதோடு மட்டுமல்லாமல், சர்வதேச சந்தையிலும் தனது தடத்தை வலுப்படுத்தும் நோக்கில் வேகமாக முன்னேறி வருகிறது. விவசாயம் மற்றும் குடிநீர் தேவைகளுக்கான சாதாரண பம்புகளில் இருந்து தொழிற்சாலைகள், சுரங்கங்கள், அனல்மின் நிலையங்கள் மற்றும் கழிவுநீர் மேலாண்மை போன்ற பல்வேறு துறைகளுக்கான நவீன பம்புகள் வரை கோவை உற்பத்தியாளர்கள் தங்களது தயாரிப்பு திறனை விரிவுபடுத்தி வருகின்றனர்.</p>
<h3 dir="ltr" style="text-align: justify;">பம்ப் தொழில் வரலாறு</h3>
<p dir="ltr" style="text-align: justify;">இந்தியாவில் முதன்முறையாக 1926-ஆம் ஆண்டில் பம்ப் செட் தயாரிப்பில் கோவை தடம் பதித்ததாகக் கூறப்படுகிறது. அதன்பிறகு சுமார் ஒரு நூற்றாண்டு காலமாக பம்ப் மற்றும் மோட்டார் உற்பத்தியில் கோவை முக்கிய மையமாக உருவெடுத்துள்ளது. குறிப்பாக விவசாயப் பயன்பாட்டுக்கான பம்புகள் மற்றும் மோட்டார்கள் மூலம் நாட்டின் பல்வேறு பகுதிகளிலும் கோவையின் உற்பத்தித் துறை வலுவான இடத்தைப் பெற்றது.</p>
<p dir="ltr" style="text-align: justify;">காலப்போக்கில் தொழில்நுட்ப வளர்ச்சிக்கு ஏற்ப கோவை பம்ப் நிறுவனங்களும் தங்களது உற்பத்தி முறைகளில் மாற்றங்களை கொண்டு வந்துள்ளன. இதன் காரணமாகவே கோவை தற்போது இந்திய அளவில் மட்டுமின்றி சர்வதேச அளவிலும் <strong>‘ஆசியாவின் பம்ப் நகரம்’</strong> என்ற அடையாளத்துடன் பார்க்கப்படுகிறது.</p>
<h3 dir="ltr" style="text-align: justify;">இறக்குமதிக்கு மாற்றாக உருவாகும் உள்நாட்டு தொழில்நுட்பம்</h3>
<p dir="ltr" style="text-align: justify;">பம்ப் தொழிலில் கோவை எதிர்கொள்ளும் முக்கியமான மாற்றங்களில் ஒன்று, முன்பு வெளிநாடுகளில் இருந்து இறக்குமதி செய்யப்பட்ட நவீன பம்புகளை தற்போது உள்நாட்டிலேயே வடிவமைத்து உற்பத்தி செய்யும் திறன் அதிகரித்திருப்பதாகும்.</p>
<p dir="ltr" style="text-align: justify;">தென்னிந்திய பொறியியல் உற்பத்தியாளர்கள் சங்கமான SIEMA உள்ளிட்ட தொழில் அமைப்புகள் இணைந்து உருவாக்கிய ஆராய்ச்சி மையங்கள் இந்த மாற்றத்திற்கு முக்கிய பங்களிப்பை வழங்கி வருகின்றன. இதன் மூலம் வெளிநாட்டு தொழில்நுட்பத்தை சார்ந்திருந்த சில வகை பம்புகளுக்கு உள்நாட்டு மாற்றுகள் உருவாக்கப்பட்டுள்ளன.</p>
<p dir="ltr" style="text-align: justify;">குறிப்பாக, சுரங்கங்கள் மற்றும் அனல்மின் நிலையங்களில் பயன்படுத்தப்படும் ‘ஸ்லரி பம்புகள்’ போன்ற நவீன பம்புகள் முன்பு வெளிநாடுகளில் இருந்து பெறப்பட்ட நிலையில், தற்போது கோவையிலேயே உற்பத்தி செய்யப்படுகின்றன. மத்திய அரசின் கனரக தொழில் அமைச்சகத்தின் ரூ.13 கோடி நிதியுதவியுடன் நவீன கட்டுப்படுத்தி வசதிகளைக் கொண்ட பம்புகளை உருவாக்கும் முயற்சிகளும் மேற்கொள்ளப்பட்டுள்ளன.</p>
<h3 dir="ltr" style="text-align: justify;">50 வாட் முதல் 500 கிலோவாட் வரை சோதனை செய்யும் வசதி</h3>
<p dir="ltr" style="text-align: justify;">பம்ப் மற்றும் மோட்டார் உற்பத்தியில் தரம் என்பது சர்வதேச சந்தையில் போட்டியிடுவதற்கான முக்கிய அம்சமாக உள்ளது. இதை கருத்தில் கொண்டு கோவையில் சர்வதேச தரத்துக்கு இணையான மோட்டார் பரிசோதனை வசதிகளும் உருவாக்கப்பட்டுள்ளன.</p>
<p dir="ltr" style="text-align: justify;">50 வாட் திறன் கொண்ட சிறிய மோட்டார்கள் முதல் 500 கிலோவாட் திறன் கொண்ட பெரிய மோட்டார்கள் வரை பரிசோதிக்கக்கூடிய தானியங்கி சோதனை மையம் அமைக்கப்பட்டுள்ளது. இதுபோன்ற தொழில்நுட்ப கட்டமைப்புகள் கோவை நிறுவனங்கள் சர்வதேச தரநிலைகளை பின்பற்றி தயாரிப்புகளை உருவாக்குவதற்கும், ஏற்றுமதி சந்தையில் நம்பிக்கையை அதிகரிப்பதற்கும் உதவும் என எதிர்பார்க்கப்படுகிறது.</p>
<h3 dir="ltr" style="text-align: justify;">ரூ.35 ஆயிரம் கோடி சந்தை... ரூ.50 ஆயிரம் கோடியாக உயர்த்த இலக்கு</h3>
<p dir="ltr" style="text-align: justify;">இந்தியாவின் பம்ப் சந்தையும் தொடர்ந்து வளர்ச்சி அடைந்து வருகிறது. தற்போது சுமார் ரூ.35,000 கோடி மதிப்புடையதாகக் கருதப்படும் இந்திய பம்ப் சந்தையை, 2031-ஆம் ஆண்டிற்குள் ரூ.50,000 கோடியாக உயர்த்த இலக்கு நிர்ணயிக்கப்பட்டுள்ளது.</p>
<p dir="ltr" style="text-align: justify;">உலகளாவிய பம்ப் சந்தையின் மதிப்பு சுமார் 60.9 பில்லியன் அமெரிக்க டாலராக இருக்கும் நிலையில், உயர்மதிப்பு கொண்ட நவீன பம்புகளுக்கான சர்வதேச சந்தையில் இந்தியாவின் பங்களிப்பு தற்போது வெறும் 1 முதல் 2 சதவீதம் அளவிலேயே இருப்பதாக தொழில்துறை தரப்பில் தெரிவிக்கப்படுகிறது. இதனால், இந்திய உற்பத்தியாளர்களுக்கு சர்வதேச சந்தையில் இன்னும் மிகப்பெரிய வாய்ப்பு இருப்பதாக பார்க்கப்படுகிறது.</p>
<h3 dir="ltr" style="text-align: justify;">தொழிற்துறை பம்புகளில் தன்னிறைவை நோக்கி இந்தியா</h3>
<p dir="ltr" style="text-align: justify;">ஒரு காலத்தில் தொழிற்துறைக்கு தேவையான பல்வேறு நவீன பம்புகளுக்காக இந்தியா இறக்குமதியை அதிகமாக நம்பியிருந்தது. ஆனால் தற்போது அந்த நிலை படிப்படியாக மாறி வருகிறது. இந்திய உற்பத்தியாளர்கள் உள்நாட்டுத் தேவையில் சுமார் 60 முதல் 70 சதவீதத்தை பூர்த்தி செய்யும் அளவுக்கு வளர்ந்துள்ளதாக தொழில்துறை தரப்பில் கூறப்படுகிறது.</p>
<p dir="ltr" style="text-align: justify;">இதில் கோவை நிறுவனங்களின் பங்களிப்பும் முக்கியமானதாக உள்ளது. விவசாய பம்புகளைத் தாண்டி தொழிற்சாலை பயன்பாடு, கழிவுநீர் அகற்றுதல், சுரங்கம், மின்சாரம் உள்ளிட்ட துறைகளுக்கான உயர் தொழில்நுட்ப பம்புகளை உருவாக்குவதில் கவனம் செலுத்தப்படுகிறது.</p>
<h3 dir="ltr" style="text-align: justify;">சோலார் பம்புகளில் புதிய தொழில்நுட்பத்துக்கு அதிகரிக்கும் தேவை</h3>
<p dir="ltr" style="text-align: justify;">புதுப்பிக்கத்தக்க எரிசக்தியின் பயன்பாடு அதிகரித்து வரும் நிலையில், சோலார் பம்புகளுக்கான சந்தையும் விரிவடைந்து வருகிறது. குறிப்பாக குறைந்த மின்சார நுகர்வு மற்றும் அதிக செயல்திறன் கொண்ட BLDC மோட்டார்களுக்கான தேவை அதிகரித்து வருகிறது.</p>
<p dir="ltr" style="text-align: justify;">சோலார் மின்சாரத்தை பயன்படுத்தி நீர்ப்பாசனம் மற்றும் நீர் இறைக்கும் பணிகளை மேற்கொள்ளும் பம்ப் அமைப்புகளில் BLDC தொழில்நுட்பம் முக்கிய பங்கு வகிக்கிறது. இதனால் எதிர்காலத்தில் சோலார் பம்புகள் மற்றும் அதனுடன் தொடர்புடைய நவீன மோட்டார் தொழில்நுட்பங்கள் கோவை உற்பத்தியாளர்களுக்கு புதிய சந்தை வாய்ப்புகளை உருவாக்கும் என எதிர்பார்க்கப்படுகிறது.</p>
Source: Read Full Article
