<p style="text-align: justify;">தஞ்சாவூர்: வெளிநாட்டு படிப்புக்கு இவ்வளவு கட்டணமா? இந்தியாவிலேயே மாற்று வழிகளை தேடுகின்றனர் ‘ஜென் ஸி’ மாணவர்கள். ஆமாங்க வெளிநாட்டு படிப்பு ஆசைக்கு முற்றுப்புள்ளி வைத்து வருகின்றனர்.</p>
<p style="text-align: justify;">கட்டுக்கடங்காமல் உயர்ந்து வரும் கல்விக் கட்டணங்கள், கடுமையான விசா மற்றும் குடியேற்றக் கட்டுப்பாடுகள், பாதுகாப்பு மற்றும் சர்வதேசப் புவிசார் அரசியல் சூழல் குறித்த கவலைகள் காரணமாக, வெளிநாட்டில் உயர்கல்வி பயில வேண்டும் என்ற தங்களது திட்டங்களை இந்திய ‘ஜென் ஸி’ (Gen Z) தலைமுறை மாணவர்கள் தீவிரமாக மறுபரிசீலனை செய்யத் தொடங்கியுள்ளனர். முன்னணி கல்வித் தொழில்நுட்ப நிறுவனமான 'எமெரிட்டஸ்' நடத்திய புதிய ஆய்வின் அதிர்ச்சி முடிவுகள் இதனை வெளிப்படுத்தியுள்ளன என்று தகவல்கள் வெளியாகி உள்ளது.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/09/02/892d8b8e3632f5fa14d210586c0e71b21788357553761733_original.jpg" /></p>
<p style="text-align: justify;">இந்தியாவின் முக்கிய பெருநகரங்களில் 15 முதல் 28 வயதுக்குட்பட்ட 1,010 மாணவர்களிடம் நடத்தப்பட்ட 'India’s Gen Z Outlook 2026' என்ற பிரத்யேகக் கள ஆய்வின்படி:</p>
<p style="text-align: justify;"><strong>ஆர்வம் குறைவு:</strong> வெளிநாட்டில் படிக்கத் திட்டமிட்டிருந்தவர்களில் 48 சதவீதம் பேர், கடந்த ஓராண்டுக்கு முன்பு இருந்ததை விட தற்போது மிகக் குறைந்த ஆர்வத்தையே வெளிப்படுத்தியுள்ளனர்.</p>
<p style="text-align: justify;"><strong>முக்கியக் காரணங்கள்:</strong> இந்த மனமாற்றத்திற்கு முதன்மைக் காரணியாக நிதிச் சுமையே (37%) உருவெடுத்துள்ளது. இதற்கடுத்தபடியாக விசா மற்றும் குடியேற்றம் தொடர்பான சிக்கல்கள் (26%) மற்றும் சொந்தப் பாதுகாப்பு குறித்த கவலைகள் (24%) ஆகியவை மாணவர்களைப் பின்வாங்க வைத்துள்ளன.</p>
<p style="text-align: justify;"><strong>அமெரிக்காவிற்குச் செல்லத் தயங்கும் இந்திய மாணவர்கள்!</strong></p>
<p style="text-align: justify;">அமெரிக்காவைத் தங்களின் முதன்மை இலக்காகக் கொண்டிருந்த மாணவர்களிடையே இந்த எதிர்ப்பு மனநிலை கணிசமாக உயர்ந்துள்ளது. அமெரிக்காவிற்குச் செல்லத் திட்டமிட்டிருந்தவர்களில் 42 சதவீதம் பேர், கடந்த ஓராண்டில் தங்களது எண்ணத்தைக் கைவிட்டுள்ளனர்.</p>
<p style="text-align: justify;">இவர்களில் 41 சதவீதம் பேர் விண்ணை முட்டும் கல்விக் கட்டணத்தையும், 34 சதவீதம் பேர் நாளுக்கு நாள் கடினமாகும் விசா பரிசோதனை நடைமுறைகளையும் முக்கியத் தடையாகச் சுட்டிக்காட்டியுள்ளனர்.</p>
<p style="text-align: justify;"><strong>இந்தியாவிலேயே சர்வதேசக் கல்வி: புதிய டிரெண்ட்!</strong></p>
<p style="text-align: justify;">வெளிநாடு செல்லும் திட்டம் குறைந்தாலும், சர்வதேச அளவிலான உலகத்தரம் வாய்ந்த கல்வியைப் பெறுவதற்கான விருப்பம் இந்திய மாணவர்களிடம் குறையவில்லை. அதிக அளவிலான நிதியிழப்பு மற்றும் நடைமுறைச் சிரமங்களை எதிர்கொள்வதற்குப் பதிலாக, குறைந்த செலவில் பன்னாட்டுத் தரத்திலான கல்வியைப் பெறுவதற்கான மாற்று வழிகளை மாணவர்கள் தீவிரமாக ஆராய்ந்து வருகின்றனர்.</p>
<p style="text-align: justify;">இந்திய வளாகங்கள் மீது ஆர்வம்: வெளிநாட்டுச் சிக்கல்கள் ஏதுமின்றி, சர்வதேசப் பல்கலைக்கழகங்கள் இந்தியாவிலேயே நேரடியாக வழங்கும் கல்வித் திட்டங்களில் சேர 68 சதவீதத்திற்கும் அதிகமான மாணவர்கள் விருப்பம் தெரிவித்துள்ளனர்.</p>
<p style="text-align: justify;">விசா கெடுபிடிகளுக்கு முற்றுப்புள்ளி: இளங்கலையிலிருந்து முதுகலை படிப்பிற்கு மாறும் 69 சதவீதம் பேர், விசா தொடர்பான நிச்சயமற்ற தன்மைகளை முற்றிலுமாகத் தவிர்க்க, இந்தியாவை மையமாகக் கொண்டு இயங்கும் சர்வதேசப் படிப்புகளையே முதன்மையாகத் தேர்ந்தெடுக்கின்றனர்.</p>
<p style="text-align: justify;"><strong>கலப்பினக் கல்வி முறைகளுக்கு (Hybrid Models) அதிகரிக்கும் ஆதரவு</strong></p>
<p style="text-align: justify;">இந்தியாவில் படிப்பைத் தொடங்கி, பின்னர் குறுகிய கால வெளிநாட்டுப் படிப்புடன் இணைக்கும் கலப்பின (Hybrid / Pathway) கல்வி மாதிரிகளுக்கு வரவேற்பு கணிசமாக உயர்ந்துள்ளது.</p>
<p style="text-align: justify;">கல்லூரிப் படிப்பில் சேரத் தயாராகும் மாணவர்களில் 27 சதவீதம் பேரும், உயர்கல்விக்கு மாறும் மாணவர்களில் 39 சதவீதம் பேரும் பகுதிநேர வெளிநாட்டுப் பரிமாற்றப் படிப்புகளை விரும்புவதாகக் கூறியுள்ளனர்.</p>
<p style="text-align: justify;">முதுகலைப் படிப்பைத் தொடரும் மாணவர்களில் 50 சதவீதம் பேர் இந்திய வளாகங்களிலேயே சர்வதேசப் படிப்புகளைப் படிக்க விரும்புவதாகவும், 38 சதவீதம் பேர் இதையே தங்களது முதல் தேர்வாகக் கொள்வதாகவும் தெரிவித்துள்ளனர்.</p>
<p style="text-align: justify;"><strong>நிதியமைப்பும் நடைமுறைச் சாத்தியங்களும்!</strong></p>
<p style="text-align: justify;">ஆய்வில் பங்கேற்ற 72 சதவீத மாணவர்கள், வெளிநாட்டுப் பல்கலைக்கழகங்கள் இந்தியாவில் வழங்கும் படிப்புகள், உலகளாவிய கல்வித் தரத்தைத் தக்கவைத்துக்கொள்வதோடு, செலவையும் கணிசமாகக் கட்டுப்படுத்துவதாக நம்புகின்றனர்.</p>
<p style="text-align: justify;">முன்பு போல் வெறும் "வெளிநாட்டுப் பட்டம்" என்ற போலி கௌரவத்திற்காக லட்சிய முடிவுகளை எடுக்காமல், படிப்புக்கான செலவு, தொழில்முறைத் தொடர்புகள், வேலைவாய்ப்பு சாத்தியக்கூறுகள் மற்றும் நீண்டகால வளர்ச்சி ஆகியவற்றைக் கணக்கிட்டு, மிகவும் முதிர்ச்சியான நடைமுறை முடிவுகளை இந்திய ‘ஜென் ஸி’ மாணவர்கள் தற்போது எடுக்கத் தொடங்கியுள்ளனர்.</p>
Source: Read Full Article
