<h2><strong>"இன்ஸ்டாகிராமில் ஏற்பட்ட பழக்கம்"</strong></h2>
<p>சென்னை வண்ணாரப்பேட்டை காவல் மாவட்டத்தில் வசிக்கும் 33 வயது பெண் ஒருவர் , கணவருடன் ஏற்பட்ட கருத்து வேறுபாடு காரணமாக கடந்த 2024ஆம் ஆண்டு தனியாக வசித்து வந்ததாக கூறப்படுகிறது. அப்போது இன்ஸ்டாகிராம் மூலம் ஹரிகிருஷ்ணன் என்பவர் அந்தப் பெண்ணுக்கு அறிமுகமாகியுள்ளார்.</p>
<p>தான் வழக்கறிஞர் என்றும் , அந்தப் பெண்ணின் தம்பியின் நண்பர் என்றும் அறிமுகப்படுத்திக் கொண்ட ஹரிகிருஷ்ணன், அவரது கணவருடன் ஏற்பட்ட பிரச்சினைக்கு சட்டரீதியாக உதவி செய்வதாகக் கூறி அவருடன் பேசி பழகி வந்ததாக போலீசார் தெரிவித்துள்ளனர்.</p>
<p>மேலும், அந்தப் பெண்ணுக்கு தெரியாமல் அவரது அந்தரங்க புகைப்படங்களை செல்போனில் எடுத்து வைத்திருந்ததாகவும் கூறப்படுகிறது. இதற்கிடையே பெண்ணின் உறவினர்கள் சமரசம் பேசி, அவரையும் அவரது கணவரையும் மீண்டும் சேர்த்து வைத்ததாக கூறப்படுகிறது.</p>
<p>அதன் பிறகு ஹரிகிருஷ்ணன் அவ்வப்போது பல்வேறு காரணங்களைக் கூறி அவசரமாக பணம் தேவைப்படுவதாகவும், நகைகளை கொடுத்தால் அவற்றை அடகு வைத்து பின்னர் விரைவில் மீட்டுத் தருவதாகவும் கூறி அவ்வப்போது பெண்ணிடம் பணம் மற்றும் நகை வாங்கியுள்ளார்.</p>
<p>இதனை நம்பிய அந்தப் பெண், கடந்த 2024ஆம் ஆண்டு ஜூலை முதல் சிறுகச் சிறுக என மொத்தம் சுமார் 155 சவரன் தங்க நகைகளை ஹரி கிருஷ்ணனிடம் கொடுத்ததாக புகாரில் தெரிவித்துள்ளார்.</p>
<h2><strong>"உன் அந்தரங்க போட்டோவை சமூக வலைதளங்களில் லீக் பண்ணிடுவேன்"</strong></h2>
<p>பின்னர் அந்தப் பெண்ணும் அவரது கணவரும் ஹரிகிருஷ்ணனிடம் தங்க நகைகளை திருப்பிக் கேட்டுள்ளனர். அப்போது நகைகளை திருப்பித் தர முடியாது எனக் கூறிய அவர், தொடர்ந்து நகைகளை கேட்டால் அந்தப் பெண்ணின் " உன் அந்தரங்க போட்டோவை சமூக வலைதளங்களில் லீக் பண்ணிடுவேன் " மிரட்டியதாக கூறப்படுகிறது. மேலும், தான் ஏற்கனவே சிறைக்குச் சென்று வந்தவன் எனக் கூறி கொலை மிரட்டலும் விடுத்ததாக போலீஸாரிடம் அந்தப் பெண் புகார் அளித்துள்ளார்.</p>
<p>இதையடுத்து ஹரிகிருஷ்ணன் குறித்து விசாரித்த போது, அவர் வழக்கறிஞர் இல்லை என்பதும் , பொய்யான தகவல்களை கூறி சட்ட உதவி செய்வதாக நம்ப வைத்து பழகியதும் தெரிய வந்ததாக புகாரில் தெரிவிக்கப்பட்டுள்ளது. இதையெடுத்து பாதிக்கப்பட்ட பெண், தனது தங்க நகைகளை மீட்டுத் தருவதுடன், ஹரிகிருஷ்ணன் மீது உரிய நடவடிக்கை எடுக்க வேண்டும் என W-14 திருவொற்றியூர் அனைத்து மகளிர் காவல் நிலையத்தில் புகார் அளித்தார்.</p>
<p>அதன் அடிப்படையில் போலீசார் மோசடி, தமிழ்நாடு பெண் வன்கொடுமை தடுப்புச் சட்டம் மற்றும் தகவல் தொழில்நுட்பச் சட்டம் உள்ளிட்ட தொடர்புடைய பிரிவுகளின் கீழ் வழக்குப் பதிவு செய்து விசாரணை மேற்கொண்டனர்.இந்த வழக்கில் தொடர்புடையதாகக் கூறப்படும் திருவொற்றியூரைச் சேர்ந்த ஹரிகிருஷ்ணன் ( வயது 27 ) என்பவரை கைது செய்தனர். அவரிடமிருந்து ஒரு செல்போன் பறிமுதல் செய்யப்பட்டது. தொடர்ந்து விசாரணை மேற்கொண்ட போலீசார், கைது செய்யப்பட்ட ஹரிகிருஷ்ணனை நீதிமன்றத்தில் ஆஜர்படுத்தினர். நீதிமன்ற உத்தரவின்படி அவர் சிறையில் அடைக்கப்பட்டார்.</p>
Source: Read Full Article
