<p>மின்வெட்டு பிரச்னையை சரி செய்ய முடியாமல் தவெக அரசு தட்டு தடுமாறுகிறது- ஆர்.பி.உதயகுமார்.</p>
<div dir="auto"> </div>
<div dir="auto"><strong>தமிழகத்தில் மின்வெட்டு பிரச்னை விஸ்வரூபம் எடுத்துள்ளது- ஆர்.பி.உதயகுமார். </strong></div>
<div dir="auto"> </div>
<div dir="auto">அவர் வெளியிட்டுள்ள வீடியோவில்...," தமிழக வெற்றிக் கழகம் விஜய் தலைமையில் ஆட்சி அமைத்ததில் இருந்து இந்த நான்கு மாத காலத்தில் மக்கள் பிரச்னைகளுக்கு தீர்வு காண முடியாமல் திக்கு முக்காடிக்கொண்டு போய் இருப்பதாக அதிமுக முன்னாள் அமைச்சர் ஆர்.பி.உதயகுமார் தெரிவித்துள்ளார். தமிழகத்தில் தற்போது மின்வெட்டு பிரச்சனை விஸ்வரூபம் எடுத்துள்ளதால் தொழிற்சாலைகள், வணிக நிறுவனங்கள், சிறுகுறு தொழில்கள் முடங்கிப் போய் உள்ளது. தொழிலாளர்கள் வேலை இழக்கும் அபாயத்தை சந்தித்துக் கொண்டுள்ளனர். விவசாயிகளுக்கு போதிய மின்சாரம் கிடைக்காததால் விவசாயம் அழியும் நிலை ஏற்பட்டுள்ளது. பெண்கள், மாணவர்கள் இரவு நேர தூக்கத்தை தொலைத்து தமிழகத்தின் வீதிகளில் போராடக்கூடிய காட்சிகளை பார்க்க முடிகிறது. டெங்கு காய்ச்சலை கட்டுப்படுத்த முடியாத சூழ்நிலையில் தவெக அரசு உள்ளது. நிலைமை கைமீறி சென்றுள்ளது. இதனால் மக்கள் அச்சத்தில் உறைந்து இருக்கிறார்கள்.</div>
<div dir="auto"> </div>
<div dir="auto">
<div dir="auto"><strong>தவெக அரசு தட்டித தடுமாறிக்கொண்டு உள்ளது.</strong></div>
</div>
<div dir="auto"> </div>
<div dir="auto">இந்தச் சூழலில் முதலமைச்சர் விஜய் முதல் முறையாக சென்னை மின்வாரிய அலுவலகத்தில் ஆய்வு செய்தபோது, ஒருபுறம் மின்சார வாரிய ஊழியர்கள் கள உதவியாளர் பணியை ஒப்பந்த அடிப்படையில் நிரப்புவதற்கு எதிர்ப்பு தெரிவித்து தவெக அரசுக்கு எதிராக கண்டன முழக்கங்களை எழுப்பினர். ஆட்சி அமைத்து நான்கு மாதங்களிலேயே இந்த இயலாமை அரசு இவ்வளவு வெறுப்பையும், எதிர்ப்புகளையும் சம்பாதித்துள்ளது என்பதற்கு சான்றாக, ஒரு புறம் முதலமைச்சர் ஆய்வு, மறுபுறம் அரசுக்கு எதிர்ப்பு என்ற நிலை இருந்தது. தவெக அரசின் அனுபவமின்மை, அணுகுமுறை மக்கள் பிரச்னைகளில் 100% தோற்றுக்கொண்டே வருகிறது. மின்வெட்டு பிரச்னைகளை சரி செய்ய முடியாமல் தவெக அரசு தட்டித தடுமாறிக்கொண்டு உள்ளது.</div>
<div dir="auto"> </div>
<div dir="auto"><strong>நிச்சயமாக தாராபுரம் தொகுதியில் இரட்டை இலை மலரும்</strong></div>
<div dir="auto"> </div>
<div dir="auto">மின்வெட்டு பிரச்னையால் தொழில் நிறுவனங்களின் உற்பத்தி குறைந்து வருகிறது. விவசாயிகள் விவசாயம் செய்ய முடியாமல் கண்ணீரில் தத்தளிக்கிறார்கள். மின்வெட்டு பிரச்னையை சரி செய்ய <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> அரசு முன்வருமா? அல்லது வழக்கம் போல திசை திருப்பும் அரசியலை மேற்கொள்ளுமா? இல்லை கடந்த ஆட்சி மீதும், ஆட்சியாளர்கள் மீதும் குற்றம் சுமத்தி விஜய் அனுதாபத்தை தேட முயற்சிப்பாரா? திசை திருப்பும் அரசியலை, அனுதாபம் தேடும் அரசியலை கைவிட்டு தமிழகத்தில் மின்வெட்டு பிரச்சனையை சரி செய்ய வேண்டும். தாராபுரம் தொகுதியில் வாக்கு கேட்க வராத முதல்வர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a>, ஜனநாயக படுகொலையை நிகழ்த்தி வாக்கு கேட்கிறார். மக்கள் தகுந்த பாடம் புகட்டுவார்கள். தாராபுரம் மக்கள் இரட்டை இலை மீதும், எடப்பாடி பழனிச்சாமி மீதும் நல்ல அபிப்ராயம் வைத்துள்ளார்கள். நிச்சயமாக தாராபுரம் தொகுதியில் இரட்டை இலை மலரும் என ஆர்.பி.உதயகுமார் பேசினார்.</div>
Source: Read Full Article
