<p>விழுப்புரம்: மரக்காணம் அருகே கால்கள் செயலிழந்த நிலையில், வீல் சேரின் உதவியுடன் பள்ளிக்குச் சென்று வரும் 15 வயது மாற்றுத்திறனாளி மாணவிக்கு பேட்டரி வாகனம் வழங்க வேண்டும் என அவரது பெற்றோர் மற்றும் அப்பகுதி மக்கள் கோரிக்கை விடுத்துள்ளனர்.</p>
<p>விழுப்புரம் மாவட்டம் மரக்காணம் அடுத்த முன்னூர் கிராமத்தைச் சேர்ந்த கூலித் தொழிலாளி சீனிவாசன் - புஷ்பா தம்பதியினருக்கு 2 மகள்கள் மற்றும் ஒரு மகன் உள்ளனர். இவர்களது மூத்த மகள் யாசினி (15). இவர் முன்னூர் கிராமத்தில் உள்ள அரசு உயர்நிலைப் பள்ளியில் 9-ம் வகுப்பு படித்து வருகிறார்.</p>
<h2>சிறு வயது முதலே கால்களில் பாதிப்பு</h2>
<p>யாசினி சிறு வயது முதலே கால்களைத் தாங்கித் தாங்கி சிரமத்துடன் நடந்து வந்துள்ளார். இருப்பினும், தனது உடல் நிலையைப் பொருட்படுத்தாமல் கல்வியில் ஆர்வத்துடன் பள்ளிக்குச் சென்று வந்துள்ளார்.</p>
<p>6-ம் வகுப்பு வரை ஓரளவுக்கு தட்டுத்தடுமாறி நடந்து பள்ளிக்குச் சென்று வந்ததாக கூறப்படுகிறது. ஆனால், 7-ம் வகுப்பு முடிந்து 8-ம் வகுப்பு படித்து வந்த காலகட்டத்தில் அவரது கால்களின் செயல்பாடு படிப்படியாக குறைந்து, பின்னர் முழுமையாக நடக்க முடியாத நிலை ஏற்பட்டதாக பெற்றோர் தெரிவிக்கின்றனர்.</p>
<p>மகளின் உடல்நிலையை சரிசெய்யும் நோக்கில் பெற்றோர் பல்வேறு மருத்துவமனைகளுக்கு அழைத்துச் சென்று சிகிச்சை அளித்துள்ளனர். இருப்பினும், இதுவரை அவர் மீண்டும் நடக்கக்கூடிய நிலை ஏற்படவில்லை.</p>
<h2>வீல் சேர் மட்டுமே கிடைத்தது</h2>
<p>சீனிவாசன் - புஷ்பா தம்பதியினர் மிகவும் ஏழ்மையான குடும்பத்தைச் சேர்ந்தவர்கள். இருவரும் தினக்கூலி வேலைக்குச் சென்றால் மட்டுமே குடும்பத்தின் அன்றாட செலவுகளை சமாளிக்க முடியும்.</p>
<p>மகளின் நிலையை கருத்தில் கொண்டு, கடந்த ஆட்சிக் காலத்தில் மாற்றுத்திறனாளிகளுக்கான பேட்டரி வாகனம் வழங்குமாறு பெற்றோர் கோரிக்கை விடுத்துள்ளனர். ஆனால், பேட்டரி வாகனத்துக்குப் பதிலாக வீல் சேர் மட்டுமே வழங்கப்பட்டதாக அவர்கள் கூறுகின்றனர்.</p>
<p>இதனால், தற்போது யாசினியை தினமும் யாராவது ஒருவர் வீல் சேரில் அமர வைத்து பள்ளிக்கு அழைத்துச் சென்று, மீண்டும் வீட்டிற்கு அழைத்து வர வேண்டிய நிலை ஏற்பட்டுள்ளது.</p>
<h2>பெற்றோர் வேலைக்குச் சென்றால் பள்ளிக்குச் செல்ல முடியாத நிலை</h2>
<p>பெற்றோர் இருவரும் தினக்கூலி வேலைக்குச் செல்ல வேண்டிய கட்டாயத்தில் இருப்பதால், சில நேரங்களில் யாசினியை பள்ளிக்கு அழைத்துச் செல்லவும், மாலை நேரத்தில் வீட்டிற்கு அழைத்து வரவும் ஆள் இல்லாமல் போகிறது.</p>
<p>இதனால், பள்ளிக்குச் செல்லும் ஆர்வம் இருந்தும், போக்குவரத்து வசதி இல்லாத காரணத்தால் கல்வியைத் தொடர்வதில் சிரமத்தை எதிர்கொண்டு வருகிறார்.</p>
<h2>ஆசிரியர்கள் தொடர்ந்து உதவி</h2>
<p>யாசினி படிப்பில் மிகவும் ஆர்வமும் திறமையும் கொண்டவர் என அவரது தாய் புஷ்பா தெரிவித்துள்ளார். குறிப்பாக, அவரது கையெழுத்தை ஆசிரியர்கள் பாராட்டி, பலமுறை பரிசுகள் வழங்கியுள்ளதாகவும் கூறப்படுகிறது.</p>
<p>மாணவியின் குடும்ப சூழ்நிலையையும் உடல்நிலையையும் புரிந்துகொண்ட பள்ளி தலைமை ஆசிரியர் மற்றும் ஆசிரியர்கள், அவரை தொடர்ந்து ஊக்கப்படுத்தி வருவதாகவும் பெற்றோர் தெரிவிக்கின்றனர்.</p>
<p>பெற்றோர் வேலை காரணமாக பள்ளிக்கு அழைத்துச் செல்ல முடியாத சூழ்நிலை ஏற்பட்டாலும், ஆசிரியர்களே வாகனத்தில் யாசினியின் வீட்டிற்கு வந்து அவரை அழைத்துச் சென்று பள்ளியில் சேர்ப்பதாகவும், பள்ளி முடிந்ததும் மீண்டும் வீட்டிற்கு அழைத்து வந்து விடுவதாகவும் அவரது தாய் நெகிழ்ச்சியுடன் தெரிவித்துள்ளார்.</p>
<h2>4 ஆண்டுகளாக பேட்டரி வாகனத்துக்காக காத்திருப்பு</h2>
<p>இதுகுறித்து மாணவி யாசினியின் தாய் புஷ்பா கூறுகையில்:</p>
<p>“என் மகள் சிறு வயதில் இருந்தே கஷ்டப்பட்டுத்தான் நடப்பாள். தற்போது முழுமையாக நடக்க முடியாமல் வீல் சேரில் இருக்கிறாள். பேட்டரி வாகனம் வேண்டும் என்று கடந்த 4 ஆண்டுகளாக தொடர்ந்து கோரிக்கை வைத்து வருகிறேன். விழுப்புரம் மாவட்ட மாற்றுத்திறனாளிகள் நல அலுவலகத்தில் பதிவு செய்துள்ளேன். வட்டார வள மையம் மூலமாகவும் நெட் சென்டரில் பதிவு செய்துள்ளேன்.</p>
<p>3 மாதங்களுக்கு முன்பு விழுப்புரம் மாவட்ட ஆட்சியரை நேரில் சந்தித்தும் மனு அளித்தேன். ஆனால் இதுவரை பேட்டரி வாகனம் கிடைக்கவில்லை. எங்கள் குடும்பம் மிகவும் ஏழ்மையானது. நாங்கள் இருவரும் கூலி வேலைக்குச் சென்றால்தான் குடும்பத்தை நடத்த முடியும்.</p>
<p>என் மகள் படிப்பில் மிகவும் சுட்டி. அவளது கையெழுத்தை ஆசிரியர்கள் அடிக்கடி பாராட்டுவார்கள். பள்ளி ஆசிரியர்கள் அவளை கைவிடாமல் தொடர்ந்து உதவி செய்து வருகின்றனர். ஆனால் எப்போதும் மற்றவர்களின் உதவியை எதிர்பார்த்தே பள்ளிக்குச் செல்ல வேண்டிய நிலை அவளுக்கு உள்ளது.</p>
<p>பேட்டரி வாகனம் கிடைத்தால் யாருடைய உதவியும் இல்லாமல் அவளால் தானாக பள்ளிக்குச் சென்று வர முடியும். அது அவளுடைய கல்விக்கும் தன்னம்பிக்கைக்கும் மிகப்பெரிய உதவியாக இருக்கும்” என கண்ணீர் மல்க தெரிவித்துள்ளார்.</p>
<h2>மேல்படிப்புக்கும் வாகனம் அவசியம்</h2>
<p>முன்னூர் கிராமத்தில் தற்போது 10-ம் வகுப்பு வரை மட்டுமே பள்ளி உள்ளதாக பெற்றோர் தெரிவிக்கின்றனர். 10-ம் வகுப்புக்குப் பிறகு மேல்படிப்பைத் தொடர வேண்டுமெனில் பிரம்மதேசம், வேப்பேரி உள்ளிட்ட பகுதிகளுக்குச் செல்ல வேண்டிய நிலை உள்ளது.</p>
<p>இதனால், யாசினியின் எதிர்கால கல்விக்கும் பேட்டரி வாகனம் முக்கிய தேவையாக இருப்பதாக அவரது குடும்பத்தினர் கூறுகின்றனர்.</p>
<p>“இப்போது பேட்டரி வாகனம் கிடைத்தால் பள்ளிக்கு செல்வதற்கும், எதிர்காலத்தில் மேல்படிப்பைத் தொடர்வதற்கும் அது மிகவும் உதவியாக இருக்கும். தற்போதைய அரசு எங்களது நிலையை புரிந்துகொண்டு பேட்டரி வாகனம் வழங்கும் என்ற நம்பிக்கையுடன் காத்திருக்கிறோம்” என புஷ்பா தெரிவித்துள்ளார்.</p>
<h2>கல்வியைத் தொடர உதவ வேண்டும்</h2>
<p>உடல் குறைபாடு காரணமாக கல்வியை கைவிடாமல் தொடர்ந்து படித்து வரும் யாசினிக்கு தேவையான போக்குவரத்து வசதி கிடைத்தால், அவர் தனது கல்வியை தடையின்றி தொடர முடியும் என அப்பகுதி மக்கள் தெரிவிக்கின்றனர்.</p>
<p>எனவே, படிப்பில் ஆர்வமும் திறமையும் கொண்ட ஏழை மாற்றுத்திறனாளி மாணவி யாசினியின் நிலையை கருத்தில் கொண்டு, அவரது கல்வி பாதிக்கப்படாமல் இருக்க அரசு துரித நடவடிக்கை எடுத்து பேட்டரி வாகனம் வழங்க வேண்டும் என்பதே அப்பகுதி மக்கள் மற்றும் சமூக ஆர்வலர்களின் கோரிக்கையாக உள்ளது.</p>
Source: Read Full Article
