<p>"ஸ்க்ரப் டைஃபஸ் / உன்னிக் காய்ச்சல்" அலர்ட்</p>
<p>தமிழ்நாட்டில் பரவலாகக் காணப்படும் ஸ்க்ரப் டைஃபஸ் காய்ச்சல் குறித்த விழிப்புணர்வுப் பதிவை சிவகங்கை பொது நல மருத்துவர் Dr.அ.ப.ஃபரூக் அப்துல்லா வெளியிட்டுள்ளார்.</p>
<p><strong>இதுகுறித்து இன்று அவர் கூறி உள்ளதாவது:</strong></p>
<p>ஸ்க்ரப் டைஃபஸ் என்பது ஒருவகை ஒட்டுண்ணிக் கடியால் பரவும் காய்ச்சலாகும்.</p>
<p>ஓரியன்சியா சுட்சுகாமுஷி ( கண்டறிந்தவர் ஒரு ஜப்பானியர் என்பதால் அவரது பெயர் வைக்கப்பட்டுள்ளது) எனும் பாக்டீரியா டிக் மைட்ஸ் எனும் உன்னிகளில் தொற்றை ஏற்படுத்துகின்றது.</p>
<p>உலகின் அனைத்துப் பகுதிகளிலும் பரவலாக இந்த பாக்டீரியா காணப்பட்டாலும்,</p>
<p>கிழக்கே பாகிஸ்தான்</p>
<p>மேற்கே ஜப்பான்</p>
<p>தெற்கே ஆஸ்திரேலியா</p>
<p>இந்த மூன்று நாடுகளை மூன்று புள்ளிகளாகக் கொண்டு முக்கோணம் வரைந்தால் அது "சுட்சுகாமுஷி முக்கோணம்" என்றழைக்கப்படுகிறது. இந்த முக்கோணம் இருக்கும் பகுதியில் சுமார் நூறு கோடி மக்கள் இந்த ஸ்க்ரப் டைஃபஸ் காய்ச்சல் பாதிப்புக்கு உள்ளாகும் ஆபத்து ரேடாரில் வருகிறார்கள் . வருடந்தோறும் இந்தப் பகுதியில் வாழும் பத்து லட்சம் பேருக்கு ஸ்க்ரப் டைஃபஸ் நோய் ஏற்பட்டு வருகிறது.</p>
<p>இப்பகுதியில் உள்ள மக்களுக்கு ஏற்படும் காய்ச்சல் அறிகுறியில் நான்கில் ஒன்று ஸ்க்ரப் டைஃபஸ் காய்ச்சலாக இருக்கிறது. தமிழ்நாடும் இந்த சுட்சுகாமுஷி முக்கோணத்துக்குள் வருகிறது.</p>
<p>குறிப்பாக,</p>
<p>சென்னை</p>
<p>காஞ்சிபுரம்</p>
<p>திருவள்ளூர்</p>
<p>செங்கல்பட்டு</p>
<p>திருப்பத்தூர்</p>
<p>மற்றும்</p>
<p>மேற்குத் தொடர்ச்சி மலை மாவட்டங்கள் ஆகியவற்றில் இந்த நோயின் தாக்கம் சற்று அதிகமாக இருக்கிறது.</p>
<p>தொற்றுக்குள்ளான உன்னிகள் மனிதர்களைக் கடிக்கும் போது நமக்கும் தொற்று பரவுகிறது. உன்னிகளில் இந்த பாக்டீரியாக்கள் வாழ்ந்து வருகின்றன.</p>
<p>பாதிக்கப்பட்ட உன்னிகள் மனிதனைக் கடிக்கும் போது மனிதனுக்குப் பரவுகிறது. மனிதனன்றி பூனை, நாய், எலி போன்ற மனிதனிடம் நெருங்கி வாழும் விலங்குகளிடமும் இந்த பாக்டீரியா தொற்று ஏற்படுத்துகிறது.</p>
<p><strong>நோய் பரவ வாய்ப்பு </strong></p>
<p>எனவே இந்த டிக் மைட் வகை உன்னி பாதிப்புக்குள்ளான வளர்ப்புப் பிராணிகளிடம் நெருங்கிப் பழகும் மனிதர்களுக்கும் இந்த நோய் ஏற்படுத்தும் உன்னிகள் கடித்து நோய் பரவ வாய்ப்பு உள்ளது.</p>
<p>இந்தத் தொற்று மனிதனிடம் இருந்து மற்றொரு மனிதனுக்கு வேறு வழிகளில் பரவுவதில்லை. எனவே இது தொற்று நோய் இல்லை.</p>
<p>இவ்வாறு உன்னிக் கடி பட்டதில் இருந்து பதினான்கு நாட்களில்</p>
<p>காய்ச்சல்</p>
<p>குளிர் நடுக்கம்</p>
<p>உடல் சோர்வு</p>
<p>உடல் வலி</p>
<p>தலைவலி</p>
<p>இருமல்</p>
<p>நெறிகட்டிக் கொள்ளுதல் போன்றவை ஏற்படும்</p>
<p><strong>கவனிக்காமல் விட்டால்</strong></p>
<p>இரண்டாவது வாரம்</p>
<p>- பிதற்றல் நிலை</p>
<p>- நியூமோனியா</p>
<p>- குழப்ப நிலை</p>
<p>- கோமா</p>
<p>- திடீர் சுவாச செயலிழப்பு</p>
<p>- மஞ்சள் காமாலை</p>
<p>- மூளைக் காய்ச்சல் ஏற்படலாம்</p>
<p>கல்லீரல் , சிறுநீரகங்கள் போன்ற முக்கிய உறுப்புகள் செயலிழந்து மரணமடைவதற்கான வாய்ப்பு - 30% என்று ஆய்வுகள் கூறுகின்றன.</p>
<p>மேற்சொன்ன அறிகுறிகளுடன்</p>
<p>உன்னி கடித்த இடம் சிவந்து சிகரெட்டில் சுட்டது போன்ற நீள்வட்டமான புண் உருவாகும். பிறகு அந்தப் புண் கருப்பு நிறத்தில் உலரும். இதை "எஸ்கர்" என்போம்.</p>
<p>இந்த எஸ்கர்</p>
<p>நமது உடலில் கதகதப்பும் வேர்வை சுரப்பும் ஒருங்கே இருக்கும்</p>
<p>கழுத்து , கக்கம், அக்குள் ஆகிய இடங்களில் தென்படலாம்.</p>
<p>தொப்புளுக்குக் கீழே இந்தப் புண் இருக்கலாம்</p>
<p>பெண்களைப் பொருத்தவரை</p>
<p>மார்பகங்களிலும் மார்பகங்களுக்கு கீழ் உள்ள பகுதியிலும் இந்தப் புண் இருக்கலாம்.</p>
<p>இந்த பாக்டீரியா தொற்றுக்கு உள்ளானதும்</p>
<p>சிகிச்சை அளிக்காமல் கடத்தும் நாட்களில்</p>
<p>உடல் முழுவதும் உள்ள ரத்த நாளங்களில் தீவிர அழற்சி நிலை தோன்றும்.</p>
<p>ரத்த நாளங்களைச் சுற்றியுள்ள பகுதிகளில் அழற்சி</p>
<p>ரத்த நாளங்களில் கசிவு</p>
<p>இதன் விளைவாக முக்கிய உறுப்புகள் பாதிப்புக்குள்ளாகும்.</p>
<p>எனவே மருத்துவரை சந்திப்பதிலும் சிகிச்சை எடுப்பதிலும் காலதாமதம் இருத்தல் கூடாது.</p>
<p>வயது முதிர்ந்தோர்,</p>
<p>ஊட்டச்சத்துக் குறைபாடு இருப்பவர்கள், கட்டுப்பாடற்ற நீரிழிவு கொண்டவர்கள்,</p>
<p>கூடவே இதய/ சிறுநீரக/கல்லீரல் சார்ந்த இணை நோய்களைக் கொண்டிருப்பவர்கள் ஆகியிருக்கு இந்தத் தொற்று ஏற்படும் போது தீவிரத்தன்மையுடன் வெளிப்படும் வாய்ப்பு உண்டு.</p>
<p>மாறிவரும் பருவநிலை மாற்றத்தின் காரணமாக, வெப்பமும் கூடவே ஈரப்பதமும் தொடர்ந்து நிலவுவதால் இந்த வகை உன்னிகள் நன்றாக வளர்ந்து செழிக்க முடிகின்றது.</p>
<p>நமது உடலில் கூட</p>
<p>ஈரப்பதமும் வெப்பமும் இருக்கும் பகுதிகளான அக்குள், கக்கம் ஆகிய பகுதிகளில் தான் முதலில் கடித்துப் புண் ஏற்படுத்துகிறது.</p>
<p>ஒருவருக்கு காய்ச்சல் அடிக்கும் போது</p>
<p>வேறெந்த அறிகுறிகளும் இல்லாமல்</p>
<p>தீவிரக் காய்ச்சல்</p>
<p>அதீத தலைவலி</p>
<p>அதீத உடல் சோர்வு</p>
<p>இருப்பின்</p>
<p>உடலில் எங்காவது சிகரெட்டால் வைத்து சுட்டது போன்ற வட்ட வடிவ புண் இருக்கிறதா? அல்லது கருப்பு நிறத்தில் வட்ட வடிவில் காய்ந்த புண் இருக்கிறதா? என்பதைப் பார்த்து அதையும் மருத்துவரிடம் தெரிவிக்க வேண்டும்.</p>
<p>இந்த ஓரியன்சியா சுட்சுகாமுஷி பாக்டீரியா - உடல் முழுவதும் உள்ள ரத்த நாளங்களைத் தாக்கி அழற்சி ஏற்படுத்தும் என்பதால் விரைவாகக் கண்டறிந்து அதற்குரிய ஆண்டிபயாடிக் சிகிச்சை அளித்திட வேண்டும்.</p>
<p>டாக்சிசைக்ளின் - அசித்ரோமைசின் - க்ளோராம்ஃபெனிகால் ஆகிய ஆண்டிபயாடிக்குகள் இந்த பாக்டீரியாவுக்கு எதிராகச் சிறப்பாக செயல்படுகின்றன.</p>
<p>எவ்வாறு இந்தத் தொற்றில் இருந்து தற்காத்துக் கொள்வது?</p>
<p>- இந்த உன்னிகளிடம் இருந்து கடிபடாமல் இருப்பதே முதல் தற்காப்பு நடவடிக்கை</p>
<p>- நமது வீடுகளில் உபயோகப்படுத்தும் தலையணை மற்றும் படுக்கை விரிப்புகளை சரியாக சுத்தம் செய்து பராமரிக்க வேண்டும்.</p>
<p>- உன்னிகள் வளராதவாறு உன்னிக் கொல்லி மருந்துகளை நமது வீட்டைச் சுற்றி உள்ள பகுதிகளில் தெளித்து வர வேண்டும். ஆனால் அது பிராக்டிகலாக சாத்தியமற்றது.</p>
<p>- வனாந்திரங்களுக்கு ட்ரெக்கிங் , ஹைக்கிங் , டூர் செல்வீர்கள் என்றால் கொசு விரட்டி உன்னி விரட்டிக் களிம்புகளை தேய்த்துக் கொள்ள வேண்டும்.</p>
<p>காய்ச்சல் அறிகுறிகள் தென்பட்டால்</p>
<p>எப்போதும் இந்த ஸ்க்ரப் டைஃபஸ் நியாபகமும் நம் அனைவருக்கும் இருக்க வேண்டும் என்று மருத்துவர் அ.ப.ஃபரூக் அப்துல்லா தெரிவித்துள்ளார்.</p>
Source: Read Full Article
