<p>புதுச்சேரி: பனித்திட்டு மீனவ கிராமத்தில் மீனவர்களின் பொருளாதாரத்தை மேம்படுத்தும் நோக்கில் செயல்படுத்தப்பட்டு வரும் கடல்பாசி வளர்ப்பு திட்டத்தின் 2-ம் கட்டமாக பயிரிடப்பட்ட கடல்பாசி தற்போது அறுவடை செய்யப்பட்டது. இதில் 2.66 டன் (2,660 கிலோ) கடல்பாசி அறுவடை செய்யப்பட்டுள்ளது. புதுச்சேரி அரசு மீன்வளம் மற்றும் மீனவர் நலத்துறை சார்பில், மீனவ மக்களின் வாழ்வாதாரத்தை மேம்படுத்தவும், அவர்களுக்கு கூடுதல் வருமானத்தை உருவாக்கவும் கடல்பாசி வளர்ப்பு திட்டம் செயல்படுத்தப்பட்டு வருகிறது.</p>
<h2>540 கிலோ கடல்பாசி பயிரிடப்பட்டது</h2>
<p>பனித்திட்டு பகுதியில் கடந்த ஆண்டு செப்டம்பர் மாதம் கடல்பாசி வளர்ப்பு திட்டம் தொடங்கப்பட்டது. இதன் முதல் கட்டமாக கடலில் வலை அமைத்து கடல்பாசி வளர்க்கப்பட்டு, நவம்பர் மாதத்தில் முதல் அறுவடை நடைபெற்றது. இதைத்தொடர்ந்து 2-ம் கட்டமாக 540 கிலோ கடல்பாசி விதைகள் கடலில் அமைக்கப்பட்டிருந்த வலைகளில் பயிரிடப்பட்டன. கடல் பகுதியில் வளர்க்கப்பட்ட கடல்பாசி சுமார் 37 நாட்களில் முழு வளர்ச்சி அடைந்ததைத் தொடர்ந்து, தற்போது அறுவடை செய்யப்பட்டது.<br />அறுவடையின் முடிவில் பயிரிடப்பட்ட 540 கிலோ கடல்பாசியிலிருந்து 2,660 கிலோ கடல்பாசி கிடைத்துள்ளது. இதனால் கடல்பாசி வளர்ப்பில் ஈடுபட்டுள்ள மீனவ பெண்கள் மத்தியில் மகிழ்ச்சி ஏற்பட்டுள்ளது.</p>
<h2>புயல், கடல் சீற்றத்தால் தாமதம்</h2>
<p>பனித்திட்டு பகுதியில் கடல்பாசி வளர்ப்பு திட்டத்தின் முதல் கட்டம் வெற்றிகரமாக நடைபெற்ற நிலையில், அடுத்த கட்ட வளர்ப்பு பணிகள் சில காரணங்களால் தாமதமானதாக தெரிவிக்கப்பட்டுள்ளது. கடல் சீற்றம், புயல் உள்ளிட்ட இயற்கை இடர்பாடுகளுடன் சட்டப்பேரவைத் தேர்தல் நடத்தை விதிகளும் அமலில் இருந்ததால் 2-ம் கட்ட கடல்பாசி வளர்ப்பு பணிகளை திட்டமிட்டபடி தொடர்வதில் தாமதம் ஏற்பட்டது. தற்போது மீண்டும் கடல்பாசி வளர்ப்பு பணிகள் மேற்கொள்ளப்பட்டு, அதன் அறுவடை வெற்றிகரமாக நடைபெற்றுள்ளது.<br />உணவு, மருந்து தயாரிப்புக்கு அனுப்பி வைப்பு பனித்திட்டு பகுதியில் அறுவடை செய்யப்பட்ட 2,660 கிலோ கடல்பாசி, உணவுப் பொருட்கள், அழகுசாதனப் பொருட்கள் மற்றும் மருந்துகள் உள்ளிட்ட பல்வேறு பொருட்கள் தயாரிப்பதற்காக வெளிமாநிலங்களுக்கு அனுப்பி வைக்கப்பட்டது. கடல்பாசிக்கு பல்வேறு தொழில்துறைகளில் தேவை இருப்பதால், இதன் மூலம் மீனவ மக்களுக்கு கூடுதல் வருமானம் கிடைக்கும் வாய்ப்பு ஏற்பட்டுள்ளது.</p>
<h2>90 சதவீத வருமானம் மீனவ பெண்களுக்கு</h2>
<p>கடல்பாசி வளர்ப்பு திட்டத்தில் முக்கிய பங்காற்றியுள்ள மீனவ பெண்களுக்கு கிடைக்கும் வருமானத்தில் பெரும்பகுதி வழங்கப்பட உள்ளது. அதன்படி, கடல்பாசி விற்பனை மூலம் கிடைக்கும் வருமானத்தில் 90 சதவீதம் கடல்பாசி வளர்ப்பில் ஈடுபட்டுள்ள மீனவ பெண்களுக்கும், 10 சதவீதம் மீனவர் கூட்டுறவு சங்கத்துக்கும் பகிர்ந்தளிக்கப்பட உள்ளது.<br />இதன் மூலம் கடல்பாசி வளர்ப்பு திட்டம் பனித்திட்டு மீனவ கிராமத்தைச் சேர்ந்த பெண்களுக்கு கூடுதல் வருமானம் மற்றும் வாழ்வாதார வாய்ப்பை ஏற்படுத்தும் திட்டமாக உருவெடுத்துள்ளது.</p>
<h2>அதிகாரிகள் பங்கேற்பு</h2>
<p>கடல்பாசி அறுவடை நடைபெற்ற நிகழ்ச்சியில் புதுச்சேரி மீன்வளத்துறை இயக்குனர் முகமது இஸ்மாயில், துணை இயக்குனர் கோவிந்தசாமி உள்ளிட்ட மீன்வளத்துறை அதிகாரிகள் கலந்து கொண்டனர். மீனவ மக்களின் பொருளாதார நிலையை மேம்படுத்தும் வகையில் செயல்படுத்தப்பட்டு வரும் கடல்பாசி வளர்ப்பு திட்டத்தில் அடுத்தடுத்த கட்டங்களிலும் வளர்ப்பு மற்றும் அறுவடை பணிகளை மேற்கொள்ள நடவடிக்கைகள் மேற்கொள்ளப்பட்டு வருகின்றன.</p>
Source: Read Full Article
