<p style="text-align: justify;">தஞ்சாவூர்: காவிரி டெல்டா மாவட்டங்களில் நடைபெற உள்ள சம்பா மற்றும் தாளடி நெல் சாகுபடிக்குத் தேவையான பாசன நீர், வரலாற்றுச் சிறப்புமிக்க கல்லணையிலிருந்து நேற்று திறந்து விடப்பட்டது. அமைச்சர்கள் மற்றும் மக்கள் பிரதிநிதிகள் மேளதாளத்துடன் ஊர்வலமாகச் சென்று காவிரி, வெண்ணாறு, கல்லணைக் கால்வாய் மற்றும் கொள்ளிடம் ஆகியவற்றில் தண்ணீரை திறந்து வைத்தனர்.</p>
<p style="text-align: justify;">தஞ்சாவூர் உள்ளிட்ட காவிரி டெல்டா மாவட்டங்கள் தமிழகத்தின் முக்கிய நெல் உற்பத்திப் பகுதிகளாக விளங்கி வருகின்றன. இப்பகுதிகளில் ஆண்டுதோறும் குறுவை, சம்பா, தாளடி என மூன்று போகங்களில் நெல் சாகுபடி நடைபெறுகிறது. இந்த சாகுபடிகளுக்குத் தேவையான பாசன நீர் மேட்டூர் அணையிலிருந்து காவிரி ஆற்றில் திறந்து விடப்பட்டு, பின்னர் கல்லணை வழியாக டெல்டா மாவட்டங்களின் பல்வேறு பகுதிகளுக்கு பிரித்து வழங்கப்படுகிறது.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/09/06/0e4c530e72f398db5d56adee6f92089e1788694463208733_original.jpg" /></p>
<p style="text-align: justify;">வழக்கமாக ஜூன் 12-ம் தேதி மேட்டூர் அணையிலிருந்து டெல்டா பாசனத்துக்காக தண்ணீர் திறக்கப்படும். ஆனால் இந்த ஆண்டு மேட்டூர் அணையில் போதிய நீர் இருப்பு இல்லாததால், குறிப்பிட்ட நாளில் தண்ணீர் திறக்கப்படவில்லை. இதனால் சம்பா மற்றும் தாளடி சாகுபடி குறித்து டெல்டா விவசாயிகள் கவலை அடைந்தனர்.</p>
<p style="text-align: justify;">இந்நிலையில், மேட்டூர் அணைக்கு நீர் வரத்து அதிகரித்து நீர்மட்டம் 90 அடியை எட்டியதைத் தொடர்ந்து, விவசாயிகளின் கோரிக்கையை ஏற்று கடந்த செப்டம்பர் 1-ம் தேதி தமிழக முதல்வர் விஜய் மேட்டூர் அணையிலிருந்து பாசனத்துக்காக தண்ணீரை திறந்து வைத்தார்.</p>
<p style="text-align: justify;">தொடக்கத்தில் வினாடிக்கு 3 ஆயிரம் கனஅடி வீதம் திறக்கப்பட்ட தண்ணீரின் அளவு, பின்னர் படிப்படியாக 7 ஆயிரம் கனஅடியாக உயர்த்தப்பட்டது. மேட்டூரில் இருந்து திறக்கப்பட்ட காவிரி நீர் சுமார் 205 கிலோ மீட்டர் தூரம் பயணித்து தஞ்சாவூர் மாவட்ட எல்லையில் அமைந்துள்ள கல்லணையை நேற்று மாலை வந்தடைந்தது.</p>
<p style="text-align: justify;">இதையடுத்து காவிரி டெல்டா மாவட்டங்களின் பாசனத் தேவைக்காக கல்லணையிலிருந்து தண்ணீரை திறக்க முடிவு செய்யப்பட்டது.</p>
<p style="text-align: justify;">இந்த நிகழ்ச்சியில் வேளாண்மை மற்றும் உழவர் நலத்துறை அமைச்சர் ஆர்.வினோத், சிறுபான்மையினர் நலத்துறை அமைச்சர் ஏ.எம்.ஷாஜகான், எம்.எல்.ஏ.க்கள் ஆர்.<a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a>சரவணன், எஸ்.காமராஜ், சுப்பிரமணியன் உள்ளிட்டோர் பங்கேற்றனர். டெல்டா மாவட்ட ஆட்சியர்கள், நீர்வளத்துறை மற்றும் வேளாண்மைத் துறை அதிகாரிகள், விவசாயிகள் என ஏராளமானோர் கலந்து கொண்டனர்.</p>
<p style="text-align: justify;">கல்லணையில் உள்ள சுற்றுலா மாளிகையிலிருந்து மேளதாளத்துடன் ஊர்வலமாக புறப்பட்ட அமைச்சர்கள் மற்றும் அதிகாரிகள், காவிரி, வெண்ணாறு, கல்லணைக் கால்வாய் மற்றும் கொள்ளிடம் ஆகியவற்றில் தண்ணீரை திறந்து வைத்தனர்.</p>
<p style="text-align: justify;">அப்போது விவசாயம் செழிக்க வேண்டும் என்ற வேண்டுதலுடன் நவதானியங்கள் மற்றும் மலர்களை நீரில் தூவினர். விவசாயிகளும் உற்சாகத்துடன் நிகழ்ச்சியில் பங்கேற்றனர்.</p>
<p style="text-align: justify;">தண்ணீர் திறப்பதை முன்னிட்டு கல்லணையில் உள்ள காவிரி, வெண்ணாறு, கல்லணைக் கால்வாய் மற்றும் கொள்ளிடம் ஆறுகளின் ஷட்டர்கள் சீரமைக்கப்பட்டு புதிதாக வர்ணம் பூசப்பட்டிருந்தது. மேலும் கல்லணையை கட்டிய மாமன்னன் கரிகால சோழன் சிலை, மாமன்னன் ராஜராஜ சோழன் சிலை, அகத்தியர் சிலை, காவிரி தாய் சிலை மற்றும் சர் ஆர்தர் காட்டன் சிலை ஆகியவற்றுக்கும் வர்ணம் பூசப்பட்டு, மாலைகள் அணிவிக்கப்பட்டு மரியாதை செலுத்தப்பட்டது.</p>
<p style="text-align: justify;">தொடக்க கட்டமாக காவிரி மற்றும் வெண்ணாற்றில் தலா வினாடிக்கு 1,000 கனஅடி வீதமும், கல்லணைக் கால்வாய் மற்றும் கொள்ளிடத்தில் தலா 500 கனஅடி வீதமும் தண்ணீர் திறக்கப்பட்டது. நீர் வரத்து மற்றும் பாசனத் தேவைக்கு ஏற்ப, வரும் நாட்களில் திறக்கப்படும் நீரின் அளவு படிப்படியாக அதிகரிக்கப்படும் என அதிகாரிகள் தெரிவித்துள்ளனர்.</p>
<p style="text-align: justify;">பின்னர் செய்தியாளர்களிடம் பேசிய அமைச்சர் ஆர்.வினோத், “வரலாற்றுச் சிறப்புமிக்க கல்லணையை கட்டிய மாமன்னன் கரிகால சோழனை வணங்கி இந்த ஆண்டு தண்ணீர் திறக்கப்பட்டுள்ளது. கடந்த செப்டம்பர் 1-ம் தேதி மேட்டூர் அணையிலிருந்து முதல்வர் தண்ணீரை திறந்து வைத்தார். அந்த நீர் தற்போது கல்லணையை வந்தடைந்துள்ளது. இங்கிருந்து திறக்கப்படும் தண்ணீர் விவசாயத்துக்கும் பொதுமக்களின் குடிநீர் தேவைக்கும் பயனளிக்கும்” என்றார்.</p>
<p style="text-align: justify;">டெல்டா மாவட்டங்களில் எவ்வளவு பரப்பளவில் சம்பா மற்றும் தாளடி சாகுபடி நடைபெறும் என்ற கேள்விக்கு, அதுகுறித்து விரைவில் பதில் அளிக்கப்படும் என அமைச்சர் தெரிவித்தார்.</p>
<p style="text-align: justify;">மேட்டூரிலிருந்து தற்போது 7 ஆயிரம் கனஅடி தண்ணீர் திறக்கப்படும் நிலையில், கடைமடை பகுதிகளுக்கு தண்ணீர் எப்போது சென்றடையும் என்ற கேள்விக்கு பதிலளித்த அமைச்சர், “முதற்கட்டமாக காவிரி, வெண்ணாற்றில் தலா ஆயிரம் கனஅடியும், கல்லணைக் கால்வாய் மற்றும் கொள்ளிடத்தில் தலா 500 கனஅடியும் திறக்கப்பட்டுள்ளது. மூன்று நாட்களுக்குள் கடைமடை பகுதிகளுக்கும் தண்ணீர் சென்றடையும். நீர் வரத்துக்கு ஏற்ப கூடுதல் தண்ணீர் திறக்கப்படும்” என்றார்.</p>
<p style="text-align: justify;">முறைப்பாசன முறையை நடைமுறைப்படுத்தக் கூடாது என்றும், கிடைக்கும் தண்ணீரைக் கொண்டு முழுமையான சம்பா சாகுபடியை எவ்வாறு மேற்கொள்ள முடியும் என்றும் விவசாயிகள் எழுப்பி வரும் கேள்விக்கு, “அதற்கான ஏற்பாடுகள் செய்யப்பட்டு வருகின்றன” என அமைச்சர் பதிலளித்தார்.</p>
<p style="text-align: justify;">தற்போது டெல்டா மாவட்டங்களில் குறுவை அறுவடை நடைபெற்று வரும் நிலையில், நெல் கொள்முதலுக்கான அரசாணை இதுவரை வெளியிடப்படவில்லை என்றும், மத்திய அரசின் அனுமதி கிடைத்துள்ளதா என்றும் செய்தியாளர்கள் கேள்வி எழுப்பினர். ஆனால் அந்தக் கேள்விக்கு அமைச்சர் பதில் அளிக்காமல் அங்கிருந்து சென்றார்.</p>
<p style="text-align: justify;">இதனால், ஒருபுறம் சம்பா மற்றும் தாளடி சாகுபடிக்கான பாசன நீர் திறக்கப்பட்டதால் டெல்டா விவசாயிகள் மகிழ்ச்சி அடைந்துள்ள நிலையில், மறுபுறம் போதிய நீர் கிடைக்குமா, முறைப்பாசனம் அமல்படுத்தப்படுமா, குறுவை நெல் கொள்முதலுக்கான அரசாணை எப்போது வெளியாகும் என்ற கேள்விகள் விவசாயிகள் மத்தியில் தொடர்ந்து நீடித்து வருகின்றன.</p>
Source: Read Full Article
