<p style="text-align: justify;">சென்னை நகரின் முக்கிய போக்குவரத்து வழித்தடங்களில் ஒன்றான மதுரவாயல் பகுதியில் போக்குவரத்து நெரிசலைக் குறைத்து, வெளிவட்டச் சாலையுடன் வேகமான இணைப்பை ஏற்படுத்தும் வகையில் திட்டமிடப்பட்டுள்ள மதுரவாயல் – சென்னை வெளிவட்டச் சாலை உயர்மட்ட மேம்பாலத் திட்டம் தொடர்ந்து தாமதமாகி வருகிறது. சுமார் 8.14 கிலோமீட்டர் நீளத்தில், ரூ.1,228.87 கோடி மதிப்பீட்டில் செயல்படுத்த திட்டமிடப்பட்டுள்ள இந்த ஆறு வழிச்சாலை மேம்பாலத்திற்கான டெண்டர் திறப்பு தேதி இதுவரை 15 முறை மாற்றியமைக்கப்பட்டுள்ளது.</p>
<h3 style="text-align: justify;">நிதி ஒப்புதலுக்காக காத்திருக்கும் திட்டம்</h3>
<p style="text-align: justify;">இந்திய தேசிய நெடுஞ்சாலை ஆணையமான NHAI சார்பில், தேசிய நெடுஞ்சாலை 48-ன் கீழ் ஹைபிரிட் அன்னுவிட்டி முறையில் (HAM) திட்டத்தை செயல்படுத்துவதற்கான டெண்டர் கடந்த 2025 ஆகஸ்ட் 18-ஆம் தேதி வெளியிடப்பட்டது. ஆனால், திட்டத்துக்கான நிதி ஒப்புதல் கிடைப்பதில் ஏற்பட்டுள்ள தாமதம் காரணமாக டெண்டர் பணிகள் அடுத்த கட்டத்துக்கு நகராமல் தொடர்ந்து ஒத்திவைக்கப்பட்டு வருகின்றன.</p>
<p style="text-align: justify;">டெண்டர் கோரப்பட்டு ஓராண்டுக்கும் மேலாகியும், நிதி ஒப்புதல் நிலுவையில் இருப்பதால் ஒவ்வொரு முறையும் பிட் திறப்பு தேதி மாற்றப்பட்டு வருகிறது. தற்போது திருத்தப்பட்ட அட்டவணையின்படி, டெண்டர் பிட்கள் 2026 அக்டோபர் 16-ஆம் தேதி திறக்கப்படும் என எதிர்பார்க்கப்படுகிறது.</p>
<h3 style="text-align: justify;">பெங்களூரு – சென்னை விரைவுச்சாலையுடன் இணைப்பு</h3>
<p style="text-align: justify;">மதுரவாயல் முதல் வெளிவட்டச் சாலை வரையிலான இந்த உயர்மட்டச் சாலை, பெங்களூரு – சென்னை விரைவுச்சாலை தொடர்பான விரிவான இணைப்பு திட்டத்தின் முக்கிய பகுதியாகக் கருதப்படுகிறது. மொத்தம் 23.2 கிலோமீட்டர் நீளத்தில் ஸ்ரீபெரும்புதூர் வரை உயர்மட்டச் சாலை அமைக்க திட்டமிடப்பட்ட நிலையில், அதன் முதல் கட்டமாக மதுரவாயல் முதல் வெளிவட்டச் சாலை வரையிலான பகுதி முன்னெடுக்கப்படுகிறது.</p>
<p style="text-align: justify;">வெளிவட்டச் சாலை முதல் ஸ்ரீபெரும்புதூர் வரையிலான அடுத்த கட்டப் பணிகள், அந்த வழித்தடத்தில் திட்டமிடப்பட்டுள்ள சென்னை மெட்ரோ ரயில் திட்டத்துடன் ஒருங்கிணைக்கும் வகையில் ஒத்திவைக்கப்பட்டுள்ளன.</p>
<h3 style="text-align: justify;">மெட்ரோவும் சாலையும் செல்லும் ‘டபுள் டெக்கர்’ அமைப்பு</h3>
<p style="text-align: justify;">பூந்தமல்லி – சுங்குவார்சத்திரம் இடையே சுமார் 27.9 கிலோமீட்டர் நீளத்தில் திட்டமிடப்பட்டுள்ள மெட்ரோ ரயில் பாதையுடன் எதிர்காலத்தில் இந்த கட்டமைப்பு ஒருங்கிணைக்கப்பட உள்ளது. இதன் காரணமாக, ஒரே கட்டமைப்பில் கீழ் அடுக்கில் வாகனப் போக்குவரத்தும், மேலடுக்கு பகுதியில் மெட்ரோ ரயில் போக்குவரத்தும் செல்லும் வகையிலான ‘டபுள் டெக்கர்’ அமைப்பை உருவாக்கும் திட்டமும் இடம்பெற்றுள்ளது.</p>
<p style="text-align: justify;">இதன் மூலம் எதிர்காலத்தில் சாலை மற்றும் மெட்ரோ போக்குவரத்துக்கான ஒருங்கிணைந்த உள்கட்டமைப்பை உருவாக்குவதற்கான வாய்ப்பு ஏற்படும் என திட்ட வடிவமைப்பில் குறிப்பிடப்பட்டுள்ளது.</p>
<h3 style="text-align: justify;">தினசரி அதிகரிக்கும் வாகனப் போக்குவரத்து</h3>
<p style="text-align: justify;">மதுரவாயல் – பூந்தமல்லி வழித்தடம் சென்னையின் மேற்குப் பகுதிகளையும், தொழில் மற்றும் புறநகர் பகுதிகளையும் இணைக்கும் முக்கிய போக்குவரத்து பாதையாக உள்ளது. போக்குவரத்து ஆய்வுகளின்படி, மதுரவாயல் பகுதியில் சென்னை – பூந்தமல்லி திசையில் தினசரி சுமார் 97,304 வாகனங்களும், பூந்தமல்லி அருகே 69,536 வாகனங்களும் பயணிக்கின்றன.</p>
<p style="text-align: justify;">மறுமார்க்கத்தில் மதுரவாயல் பகுதியில் சுமார் 94,747 வாகனங்களும், பூந்தமல்லி அருகே 62,655 வாகனங்களும் பயணிப்பதாக கணக்கிடப்பட்டுள்ளது. இவ்வளவு அதிகமான வாகனப் போக்குவரத்து உள்ள நிலையில், உயர்மட்ட இணைப்புச் சாலை அமைக்கப்படுவது போக்குவரத்து ஓட்டத்தை மேம்படுத்துவதற்கான முக்கிய உள்கட்டமைப்பு நடவடிக்கையாக பார்க்கப்படுகிறது.</p>
<h3 style="text-align: justify;">சென்னை துறைமுகம் – மதுரவாயல் மேம்பாலத்துடன் இணைப்பு</h3>
<p style="text-align: justify;">மதுரவாயல் – வெளிவட்டச் சாலை மேம்பாலம், தற்போது கட்டுமானத்தில் உள்ள சென்னை துறைமுகம் – மதுரவாயல் உயர்மட்டச் சாலையுடனும் இணைக்கப்பட உள்ளது. இந்த இரண்டு முக்கிய உயர்மட்டச் சாலைகளையும் ஒருங்கிணைக்கும் வகையில் சென்னை பைபாஸ் சாலைக்கு மேல் இரண்டாம் நிலை கிளோவர்லீஃப் இன்டர்சேஞ்ச் அமைக்க திட்டமிடப்பட்டுள்ளது.</p>
<p style="text-align: justify;">இந்த இணைப்பு நிறைவேற்றப்பட்டால், சென்னை துறைமுகம், மதுரவாயல், வெளிவட்டச் சாலை மற்றும் மேற்குப் புறநகர் பகுதிகளுக்கு இடையிலான வாகனப் போக்குவரத்துக்கு கூடுதல் இணைப்பு கிடைக்கும்.</p>
<h3 style="text-align: justify;">சாலை அகலம் அதிகரிப்பு.. அவசர நிறுத்தப் பாதைகள்</h3>
<p style="text-align: justify;">திருத்தப்பட்ட திட்ட விவரங்களில் சில முக்கிய மாற்றங்களும் செய்யப்பட்டுள்ளன. இரு திசைகளிலும் அமைக்கப்படும் சாலையின் அகலம் 65 மீட்டரிலிருந்து 68 மீட்டராக அதிகரிக்கப்பட்டுள்ளது. அதேபோல், வெளிவட்டச் சாலை – தாம்பரம் சந்திப்பில் குறுக்குச் சாலையின் அகலம் 7.5 மீட்டராக உயர்த்தப்பட்டுள்ளது.</p>
<p style="text-align: justify;">மேம்பாலத்தில் செல்லும் வாகனங்கள் பழுதடைந்தாலோ அல்லது அவசரநிலை ஏற்பட்டாலோ பாதுகாப்பாக ஒதுங்குவதற்காக இரண்டு அவசர நிறுத்தப் பகுதிகளும் அமைக்கப்பட உள்ளன. மேம்பாலத்தின் கீழ் உள்ள சர்வீஸ் சாலைகள் மற்றும் முக்கிய சந்திப்புகளையும் மேம்படுத்தும் பணிகள் திட்டத்தில் சேர்க்கப்பட்டுள்ளன.</p>
<h3 style="text-align: justify;">கண்காணிப்பு கேமராக்கள் முதல் கட்டுப்பாட்டு மையம் வரை</h3>
<p style="text-align: justify;">திட்டத்தின் ஒரு பகுதியாக நவீன போக்குவரத்து மேலாண்மை முறைமையான Advanced Traffic Management System (ATMS) செயல்படுத்தப்பட உள்ளது. இதன் கீழ் போக்குவரத்தை கண்காணிக்கும் கேமராக்கள், விபத்துகளை கண்டறியும் கருவிகள், வாகன ஓட்டிகளுக்கு தகவல்களை வழங்கும் மாறும் தகவல் பலகைகள் மற்றும் ஒருங்கிணைந்த கட்டுப்பாட்டு மையம் உள்ளிட்ட வசதிகள் ஏற்படுத்தப்பட உள்ளன.</p>
<p style="text-align: justify;">மேலும், மதுரவாயல் மற்றும் வெளிவட்டச் சாலை பகுதிகளில் இரண்டு சுங்கச்சாவடிகள் அமைக்க திட்டமிடப்பட்டுள்ளது. அவசர காலங்களில் வாகன ஓட்டிகளுக்கு உதவும் வகையில் 24 மணி நேர ஆம்புலன்ஸ் சேவை, ரோந்து வாகனங்கள் மற்றும் மருத்துவ உதவி வசதிகளும் திட்டத்தில் இடம்பெற்றுள்ளன.</p>
<h3 style="text-align: justify;">எப்போது பணிகள் தொடங்கும்?</h3>
<p style="text-align: justify;">ரூ.1,228.87 கோடி மதிப்பிலான இந்த முக்கியமான உள்கட்டமைப்புத் திட்டத்துக்கு நிதி ஒப்புதல் கிடைப்பது அடுத்தகட்ட நடவடிக்கைகளுக்கு முக்கியமானதாக உள்ளது. டெண்டர் திறப்பு தேதி ஏற்கனவே 15 முறை மாற்றப்பட்டுள்ள நிலையில், தற்போது 2026 அக்டோபர் 16-ஆம் தேதி பிட்களை திறக்க திட்டமிடப்பட்டுள்ளது. நிதி ஒப்புதல் மற்றும் டெண்டர் செயல்முறை நிறைவடைந்த பின்னரே திட்டத்தின் அடுத்தகட்ட பணிகள் வேகமெடுக்கும்.</p>
Source: Read Full Article
