DMK vs TVK: தவெக வெள்ளை அறிக்கை VS தவெக பட்ஜெட்! கம்பேர் செய்த திமுக - பரபரப்பு அறிக்கை

<p><a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a>யின் தவெக அரசு நேற்று தனது ஆட்சியின் முதல் பட்ஜெட்டை தாக்கல் செய்தது. இந்த நிலையில், இன்று வேளாண் நிதிநிலை அறிக்கையை தவெக அரசு தாக்கல் செய்தது.&nbsp;</p> <p>இந்த நிலையில், தவெக அரசின் நிதிநிலை &nbsp;அறிக்கையையும், அவர்கள் வெளியிட்ட வெள்ளை அறிக்கையயும் ஒப்பிட்டு இன்று திமுக வெளியிட்டுள்ளது.</p> <p>தவெகவை அம்பலப்படுத்திய தவெக: வெள்ளை அறிக்கை பொய் என்பதை நிரூபித்த பட்ஜெட்! தவெக வெள்ளை அறிக்கை vs தவெக பட்ஜெட் 2026-27: ஓர் ஒப்பீடு!</p> <p>சமீபத்தில் தவெக அரசு வெளியிட்ட வெள்ளை அறிக்கைக்கும், அவர்கள் தாக்கல் செய்த 2026-27 ஆம் ஆண்டிற்கான முதல் பட்ஜெட்டிற்கும் இடையே உள்ள நிதி முரண்பாடுகள்:</p> <h2><strong>1. மாநிலத்தின் சொந்த வரி வருவாய் (SOTR)</strong></h2> <p>முந்தைய திமுக அரசின் இடைக்கால பட்ஜெட்டில், மாநில வரி வருவாய் 19% அதிகரிக்கும் என்றும், அது ரூ.2,29,579 கோடியாக இருக்கும் என்றும் கூறப்பட்டிருந்தது.</p> <p>இது மிகவும் சாத்தியமற்றது என்றும், உண்மையில் 8% (ரூ.2,08,000 கோடி) மட்டுமே வரி வருவாய் வளரும் என்றும் தவெக தனது வெள்ளை அறிக்கையில் கடுமையாக விமர்சித்தது.</p> <p>ஆனால், தற்போதைய தவெக பட்ஜெட்டில், தங்களின் புதிய திட்டங்களைச் செயல்படுத்துவதற்காக வரி வருவாய் 17.79% அதிகரிக்கும் (ரூ.2,26,740 கோடி) என்று கணக்குக் காட்டியுள்ளனர்.</p> <p>திமுக கணித்த 19% வருவாய் வளர்ச்சி இலக்கு சாத்தியம் தான் என்பதை தவெக அரசு தனது சொந்த பட்ஜெட் மூலமாகவே மறைமுகமாக ஒப்புக்கொண்டுள்ளது.</p> <h2><strong>2. மொத்த வருவாய் வரவுகள் (TRR)</strong></h2> <p>திமுக பட்ஜெட்டில் மொத்த வருமானம் ரூ.3,44,575 கோடியாகக் கணிக்கப்பட்டிருந்தது மிகைப்படுத்தப்பட்ட கணக்கு என்றும், உண்மையான வருமானம் ரூ.3,30,575 கோடியாக மட்டுமே இருக்கும் என்றும் வெள்ளை அறிக்கை குறை கூறியது.</p> <p>ஆனால், தவெகவின் புதிய பட்ஜெட்டில் மொத்த வருமானம் ரூ.3,50,027 கோடியாக இருக்கும் என்று கணக்கிடப்பட்டுள்ளது.</p> <p>திமுக காட்டிய வருமானமே மிக அதிகம் என்று விமர்சித்த தவெக, அவர்களை விட ரூ.5,452 கோடி கூடுதலாக வருமானம் வரும் என்று தற்போதைய பட்ஜெட்டில் காட்டியுள்ளது என்றால் அது எவ்வாறு வரும்? மக்கள் மீதான வரி சுமையை மேலும் அதிகரிக்க போகிறதா?</p> <h2><strong>3. வருவாய் பற்றாக்குறை (Revenue Deficit)</strong></h2> <p>திமுக பட்ஜெட்டில் ரூ.48,696 கோடி வருவாய் பற்றாக்குறை என்று காட்டப்பட்டதை மறுத்த வெள்ளை அறிக்கை, அவர்கள் பல செலவுகளை மறைத்துவிட்டதாகவும், உண்மையான பற்றாக்குறை சுமார் ரூ.90,500 கோடியாக இருக்கும் என்றும் கூறியது.</p> <p>ஆனால், தற்போதைய தவெக பட்ஜெட்டில் மொத்த வருவாய் பற்றாக்குறை ரூ.55,775 கோடியாக மட்டுமே காட்டப்பட்டுள்ளது.</p> <p>வெள்ளை அறிக்கை கூறிய பற்றாக்குறையில், சுமார் ரூ.34,725 கோடி தற்போதைய பட்ஜெட்டில் திடீரென எப்படிக் குறைந்தது அல்லது எங்கே மறைக்கப்பட்டது என்ற கேள்வி எழுகிறது.</p> <h2>4. மூலதனச் செலவினம் (Capital Expenditure)</h2> <p>மாநிலத்தின் உள்கட்டமைப்புக்காக திமுக அரசு ஒதுக்கிய ரூ.59,562 கோடி மிகவும் குறைவானது என்றும், இது தவறான அணுகுமுறை என்றும் வெள்ளை அறிக்கை கூறியது.</p> <p>ஆனால், தவெக அரசின் பட்ஜெட்டில் உள்கட்டமைப்புக்காக ரூ.56,985 கோடி மட்டுமே ஒதுக்கப்பட்டுள்ளது.</p> <p>திமுக ஒதுக்கிய நிதியே மிகக் குறைவு என்று குற்றம் சாட்டியவர்கள், தற்போதைய பட்ஜெட்டில் அதைவிட ரூ.2,577 கோடியைக் குறைத்து ஒதுக்கியுள்ளது மிகப்பெரிய முரண்பாடாகும்.</p> <h2>குற்றப்பத்திரிகை:</h2> <p>இந்தத் தரவுகளை ஒப்பிட்டுப் பார்க்கும்போது, <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> அரசு தங்களது வெள்ளை அறிக்கையை மாநிலத்தின் உண்மையான நிதி நிலையைக் காட்டும் ஆவணமாகப் பயன்படுத்தவில்லை என்பது தெளிவாகிறது. மாறாக, அது உண்மையான தரவுகளைத் தருவதற்குப் பதிலாக, முந்தைய திமுக அரசின் மீது குற்றம் சுமத்துவதற்கான ஒரு அரசியல் குற்றப்பத்திரிகையாகவே பயன்படுத்தப்பட்டுள்ளது.</p> <p>இவ்வாறு அதில் தெரிவிக்கப்ட்டுள்ளது.&nbsp;</p> <p>&nbsp;</p>

Source: Read Full Article