ஒரு மாதமாக பதிலின்றி காத்திருக்கும் காணாமல் போன மலேசியர்களின் குடும்பத்தினருக்கு, மீட்பு நடவடிக்கைகள் விரைவில் மறு கட்டத்திற்கு மாறும் என புத்ராஜாயாவில் நடந்த கூட்டத்தில் தெரிவிக்கப்பட்டுள்ளது.
நேபாளத்தில் ஏற்பட்ட வெள்ளப் பேரிடரில் காணாமல் போன மலேசியர்களின் குடும்பத்தினர், ஒரு மாதத்திற்கும் மேலாக எந்தவொரு உறுதியான தகவலும் இன்றி காத்திருந்த நிலையில், தேடுதல் மற்றும் மீட்பு நடவடிக்கைகளை (SAR) நேபாள அரசு விரைவில் நிறுத்தும் திட்டத்தில் இருப்பதாக அறிவிக்கப்பட்டுள்ளது. இதையடுத்து, தங்கள் உறவினர்களைப் பற்றிய அனைத்து சாத்தியக்கூறுகளையும் ஏற்றுக்கொள்ளும் மனநிலைக்கு அக்குடும்பங்கள் தள்ளப்பட்டுள்ளன.
புத்ராஜாயாவில் உள்ள விஸ்மா புத்ராவில் இன்று அரசு நிறுவனங்களுடன் நடந்த கூட்டத்தில், இறந்தவர்களுக்கான சான்றிதழ் தொடர்பான நடைமுறைகள் குறித்தும் உறவினர்களுக்கு விளக்கமளிக்கப்பட்டது. குடும்பங்களின் பாதிப்புகளை குறைக்கும் வகையில் இந்த சான்றிதழ்கள் விரைவுபடுத்தப்பட்டு வருகின்றன.
காணாமல் போன மலேசியர் ஒருவரின் மகனான எஸ். சங்கரா, நேபாள அரசு விரைவில் மீட்பு நடவடிக்கை கட்டத்தை முடித்துக்கொண்டு, பிணங்களை கண்டறியும் நடவடிக்கைக்கு மாறும் என்பதே விஸ்மா புத்ரா தரப்பில் தங்களுக்கு தெரிவிக்கப்பட்டதாக கூறினார். "பெறப்பட்ட விளக்கத்தின்படி, தேடுதல் மற்றும் மீட்பு நடவடிக்கை தற்போது தொடர்ந்து நடைபெற்று வருகிறது. இறந்தவர்களுக்கான சான்றிதழ் உள்ளிட்ட ஆவணப்படுத்தல் செயல்முறை குறித்து குடும்பத்திற்கு விளக்கமளிக்கப்பட்டது" என அவர் ஊடகங்களிடம் தெரிவித்தார்.
காலை 10.15 மணிக்கு தொடங்கி மதியம் 3 மணி வரை நான்கு மணி நேரம் நடைபெற்ற இந்த கூட்டத்தில், தேடுதல் மற்றும் மீட்பு நடவடிக்கைகள், டி.என்.ஏ மாதிரிகள் மேலாண்மை, சட்ட மற்றும் ஆவணப்படுத்தல் செயல்முறைகள் தொடர்பாக பல்வேறு நிறுவனங்கள் விளக்கமளித்தன.
இதற்கிடையே, மத சடங்கு ஒன்றுக்காக நேபாளத்தில் இருந்த தனது 57 வயது தாயார் கே. கலைமதியை இழந்த வேதனையிலிருந்து இன்னும் விடுபடாத நிலையிலும், தங்கள் வாழ்க்கையை முடிந்தவரை இயல்பாக்க முயற்சிப்பதாக சங்கரா தெரிவித்தார்.
63 வயதான தனது கணவர் டாக்டர் மொஹ்ட் பட்ஸில் தரோஸுக்கான காத்திருப்பு இன்னும் முடிவுக்கு வரவில்லை என்று அதுரா மசூத் தெரிவித்தார். கணவரைப் பற்றிய புதிய தகவல் ஏதேனும் உள்ளதா என கேட்டதற்கு, "இன்னும் இல்லை. எந்த தகவலும் இல்லை" என்று அவர் பதிலளித்தார். தேடுதல் குழுக்கள் மேற்கொண்ட முயற்சிகள் குறித்து இன்றைய கூட்டத்தில் விளக்கமளிக்கப்பட்டதாகவும், ஆனால் பாதிக்கப்பட்டவரின் இருப்பிடம் தொடர்பாக பெரிய முன்னேற்றம் எதுவும் இல்லை எனவும் அவர் கூறினார். "பெரிதாக முன்னேற்றம் இருப்பதாக நான் நினைக்கவில்லை. அங்கு என்ன நடந்தது என்பதை அவர்கள் விளக்கினார்கள், அது ஒரு சுருக்கமான விளக்கம் மட்டுமே" என்றார். எனினும், தேடுதல் பணியில் ஈடுபட்ட குழுவினர் தங்களால் இயன்றதைச் செய்திருப்பதாக அதுரா நம்பிக்கை தெரிவித்தார்.
ரசுவகதி-கெருங் எல்லையில் இருந்து சுமார் 18 கிலோமீட்டர் தொலைவில் இருந்தபோது காணாமல் போனதாக அறிவிக்கப்பட்ட "டீம் லோ" எனப்படும் குழுவில் மொஹ்ட் பட்ஸிலும் இடம்பெற்றிருந்தார். இக்குழு நான்கு சக்கர வாகனத்தில் காத்மாண்டுவிலிருந்து நேபாளம்-திபெத் எல்லையை நோக்கி பயணித்துக் கொண்டிருந்த போதே ரசுவா பகுதியில் இப்பேரிடர் ஏற்பட்டதாக தெரிவிக்கப்பட்டுள்ளது.
இந்த பயணத்தில், மலேசிய தீயணைப்பு மற்றும் மீட்பு துறையின் (JBPM) சிறப்புக் குழு உறுப்பினர்களான மொஹ்ட் ஃபக்ருல் முனிர் மொஹ்ட் ஈசா மற்றும் JBPM தீயணைப்பு மற்றும் மீட்பு நடவடிக்கை பிரிவின் துணை இயக்குநர் மொஹ்ட் சானி ஹரூல் ஆகியோரும் இடம்பெற்றிருந்தனர். இதே பணியில் கணேஷ் நியூபேன், ஷபுதீன் மூன், அஸ்மான் கரீம், முகமது ஹசிக் இஸ்மாயில், மொஹ்ட் நோஹான் சலீம், ஜேசன் என்கியோ மற்றும் முகமட் நசீர் அப்துல் தலீப் ஆகியோரும் பங்கேற்றிருந்தனர்.
ஆகஸ்ட் 26-ம் தேதி ஏற்பட்ட பேரிடலுக்குப் பிறகு, ஐந்து நாட்களில் ஆகஸ்ட் 30-ம் தேதி பாதிக்கப்பட்ட குடும்பங்களுடன் அரசு முதன்முறையாக அதிகாரப்பூர்வமாக சந்தித்திருந்தது. ஆனால் அப்போது அனைத்து குடும்பங்களும் பிரதிநிதித்துவப்படுத்தப்படவில்லை. இன்றைய கூட்டம் அத்தொடரின் இரண்டாவது கூட்டமாகும். தேசிய பேரிடர் மேலாண்மை நிறுவனம் (Nadma), சிறப்பு மலேசியா பேரிடர் உதவி மற்றும் மீட்புக் குழு (SMART), மலேசிய அரச காவல்துறை (PDRM), மலேசிய வேதியியல் துறை, தேசிய பதிவுத் துறை (JPN), காத்மாண்டுவில் உள்ள மலேசிய தூதரகம் மற்றும் சமூக நல துறை (JKM) ஆகிய நிறுவனங்களின் பிரதிநிதிகள் இக்கூட்டத்தில் கலந்துகொண்டனர்.
திபெத்தில் உள்ள மேல்பகுதி லெண்டே கோலா நீர்நிலைப் பகுதியில் ஏற்பட்ட பனிக்கட்டி-பாறை சரிவால் ஆகஸ்ட் 26-ம் தேதி ஏற்பட்ட இந்த வெள்ளம் மற்றும் சேற்று வெள்ளப்பெருக்கில், 1,450-க்கும் அதிகமானோர் உயிரிழந்ததாகவும், ஆயிரக்கணக்கானோர் இன்னும் காணாமல் போயுள்ளதாகவும் தெரிவிக்கப்பட்டுள்ளது. — பெர்நாமா
