<p style="text-align: justify;">காஞ்சிபுரம் மாவட்டம் சுங்குவார்சத்திரம் அருகே உள்ள மாம்பாக்கம் பகுதியில் இயங்கி வரும் உலகப் புகழ்பெற்ற செயின்ட்-கோபைன் (Saint-Gobain) கண்ணாடி உற்பத்தி தொழிற்சாலையில், தமிழக முதலமைச்சர் ஜோசப் சி. <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> திங்கள்கிழமை நேரில் சென்று விரிவான ஆய்வு மேற்கொண்டார். இந்த ஆய்வின்போது தொழிற்சாலையின் பல்வேறு உற்பத்திப் பிரிவுகள், அதிநவீன தொழில்நுட்ப வசதிகள், தரக்கட்டுப்பாட்டு முறைகள் மற்றும் தொழிலாளர் பாதுகாப்பு நடைமுறைகளை அவர் நேரில் பார்வையிட்டார். முதலமைச்சரின் வருகையை முன்னிட்டு தொழிற்சாலை வளாகம் மற்றும் சுங்குவார்சத்திரம் சுற்றுவட்டாரப் பகுதிகளில் பலத்த போலீஸ் பாதுகாப்பு ஏற்பாடுகள் செய்யப்பட்டிருந்தன.</p>
<h3 style="text-align: justify;">தொழிற்துறை மையமும் முதலமைச்சரின் ஆய்வும்</h3>
<p style="text-align: justify;">தமிழகத்தின் மிக முக்கிய தொழிற்துறை மாவட்டங்களில் ஒன்றாகத் திகழும் காஞ்சிபுரத்தில் ஸ்ரீபெரும்புதூர், ஒரகடம், இருங்காட்டுக்கோட்டை, மாம்பாக்கம் மற்றும் வல்லம்-வடகால் போன்ற பல்வேறு சிப்காட் தொழிற்பேட்டைகள் இயங்கி வருகின்றன. ஆட்டோமொபைல், மின்னணு சாதனங்கள், கண்ணாடி தயாரிப்பு மற்றும் இயந்திர உற்பத்தி உள்ளிட்ட பல்வேறு துறைகளைச் சேர்ந்த நூற்றுக்கணக்கான பன்னாட்டு நிறுவனங்கள் இங்கு இயங்கி வருவதால், லட்சக்கணக்கானோருக்கு நேரடி மற்றும் மறைமுக வேலைவாய்ப்புகள் கிடைக்கப் பெற்று வருகின்றன. இந்நிலையில், மாம்பாக்கத்தில் அமைந்துள்ள முன்னணி கண்ணாடி தயாரிப்பு நிறுவனமான செயின்ட்-கோபைன் தொழிற்சாலைக்கு வருகை தந்த முதலமைச்சர், அங்கு நடைபெற்று வரும் தினசரி உற்பத்தி முறைகளை நேரில் பார்வையிட்டு ஆய்வு செய்தார்.</p>
<h3 style="text-align: justify;">எதிர்கால விரிவாக்கம் மற்றும் உற்பத்தித் திறன் ஆலோசனை</h3>
<p style="text-align: justify;">பிரான்ஸ் நாட்டைத் தலைமையிடமாகக் கொண்டு 350 ஆண்டுகளுக்கும் மேலான பாரம்பரியத்துடன் சர்வதேச அளவில் இயங்கி வரும் செயின்ட்-கோபைன் நிறுவனம், இந்தியாவின் முதன்மை கண்ணாடி உற்பத்தி மையங்களில் ஒன்றாக இந்த மாம்பாக்கம் தொழிற்சாலையை நடத்தி வருகிறது. இந்த ஆய்வின்போது, தொழிற்சாலையின் தற்போதைய உற்பத்தித் திறன், வெளிநாடுகளுக்கான ஏற்றுமதி செயல்பாடுகள், எதிர்கால விரிவாக்கத் திட்டங்கள், தொழில்நுட்ப மேம்பாடுகள் மற்றும் தொழிலாளர்களுக்கான நலத்திட்டங்கள் குறித்து நிறுவனத்தின் மூத்த நிர்வாகிகளிடம் முதலமைச்சர் விரிவாகக் கேட்டறிந்தார்.</p>
<h3 style="text-align: justify;">நவீன தொழில்நுட்ப வசதிகள் மற்றும் கட்டமைப்பு</h3>
<p style="text-align: justify;">முழுமையான தானியங்கி தொழில்நுட்பத்துடன் இயங்கி வரும் இந்த உற்பத்தி வளாகத்தில், கட்டிடங்களுக்கான ஃப்ளோட் கண்ணாடி (Float Glass), ஆர்க்கிடெக்சுரல் கண்ணாடி, சோலார் கண்ட்ரோல் கண்ணாடி, ஆற்றல் சேமிப்பு லோ-இ (Low-E) கண்ணாடி, வாகனங்களுக்கான கண்ணாடிகள் மற்றும் உட்புற அலங்கார தயாரிப்புகள் உற்பத்தி செய்யப்படுகின்றன. இத்தொழிற்சாலையில் அமைக்கப்பட்டுள்ள உலகத் தரத்திலான தரக்கட்டுப்பாட்டு ஆய்வகங்கள், சர்வதேச பரிசோதனை வசதிகள், சுற்றுச்சூழல் பாதுகாப்பு முறைகள், மின்சாரம் மற்றும் எரிசக்தி சேமிப்பு தொழில்நுட்பங்கள், மேலும் கண்ணாடி கழிவுகளை மறுசுழற்சி செய்து மூலப்பொருளாக மாற்றும் நவீன அமைப்புகள் ஆகியவற்றையும் முதலமைச்சர் பார்வையிட்டார்.</p>
<h3 style="text-align: justify;">அரசு பிரதிநிதிகள் வரவேற்பும் பலத்த பாதுகாப்பும்</h3>
<p style="text-align: justify;">முன்னதாக தொழிற்சாலைக்கு வருகை தந்த முதலமைச்சரை, மாவட்ட பொறுப்பு அமைச்சரும் வெளிநாடு வாழ் தமிழர்கள் நலத்துறை அமைச்சருமான எஸ்.பி.கே. தென்னரசு, வனத்துறை அமைச்சர் ஆர்.வி. ரஞ்சித்குமார், காஞ்சிபுரம் மாவட்ட ஆட்சியர் தி. சினேகா மற்றும் நிறுவனத்தின் உயர்மட்ட நிர்வாகிகள் மலர்க்கொத்து வழங்கி வரவேற்றனர்.</p>
<p style="text-align: justify;">ஆய்வின் தொடர்ச்சியாக, தொழிலாளர்களின் நலன், பாதுகாப்பு நடவடிக்கைகள் மற்றும் தொழிற்துறை வளர்ச்சி குறித்து அதிகாரிகளுடன் முதலமைச்சர் ஆலோசனை நடத்தினார். முதலமைச்சரின் இந்த ஆய்வையொட்டி வடக்கு மண்டல காவல்துறை ஐ.ஜி. தலைமையில் ஏராளமான காவல்துறையினர் பாதுகாப்புப் பணியில் ஈடுபடுத்தப்பட்டனர்.</p>
Source: Read Full Article
