<p style="text-align: justify;">தஞ்சாவூர்: நாகப்பட்டினம் மாவட்டம் வேளாங்கண்ணி பேராலய திருவிழாவை ஒட்டி தாம்பரத்தில் இருந்து திருவாரூருக்கு சிறப்பு ரயில் இயக்கப்படுகிறது. அதேபோல் தஞ்சாவூர் வழித்தடத்தில் திருவாரூர், நாகை வழியாக வேளாங்கண்ணிக்கு சிறப்பு ரயில் இயக்க வேண்டும் என்று பக்தர்கள் எதிர்பார்த்துள்ளனர்.</p>
<p style="text-align: justify;">நாகப்பட்டினம் மாவட்டம் வேளாங்கண்ணியில் நடைபெறும் உலகப் புகழ்பெற்ற புனித ஆரோக்கிய மாதா பேராலய ஆண்டு திருவிழாவை முன்னிட்டு, பக்தர்கள் மற்றும் சுற்றுலாப் பயணிகளின் வசதிக்காக தாம்பரம்–திருவாரூருக்கு சிறப்பு ரயில்களை தெற்கு ரயில்வே அறிவித்துள்ளது. இதன் மூலம் திருவிழா காலத்தில் வேளாங்கண்ணி செல்லும் பக்தர்களுக்கு கூடுதல் ரயில் போக்குவரத்து வசதி கிடைத்துள்ளது.</p>
<p style="text-align: justify;"><strong>தாம்பரத்தில் இருந்து சிறப்பு ரயில்</strong></p>
<p style="text-align: justify;">தாம்பரம்–திருவாரூர் எக்ஸ்பிரஸ் சிறப்பு ரயில் (வண்டி எண் 06067) வருகிற 28-ம் தேதி தாம்பரத்தில் இருந்து இரவு 11.50 மணிக்கு புறப்பட்டு, மறுநாள் காலை 7.45 மணிக்கு திருவாரூர் சென்றடையும்.<br />மறுமார்க்கத்தில் திருவாரூர்–தாம்பரம் எக்ஸ்பிரஸ் சிறப்பு ரயில் (வண்டி எண் 06068) 29-ம் தேதி இரவு 11.55 மணிக்கு திருவாரூரில் இருந்து புறப்பட்டு, மறுநாள் காலை 8.30 மணிக்கு தாம்பரம் வந்தடையும்.<br />இந்த சிறப்பு ரயில்கள் செங்கல்பட்டு, விழுப்புரம், கடலூர் துறைமுகம், சிதம்பரம், மயிலாடுதுறை, திருநள்ளாறு, காரைக்கால், நாகூர், நாகப்பட்டினம் உள்ளிட்ட முக்கிய ரயில் நிலையங்களில் நின்று செல்லும். சிறப்பு ரயில்களுக்கான முன்பதிவு நேற்று 23-ம் தேதி காலை 8 மணி முதல் தொடங்கியுள்ளது.</p>
<p style="text-align: justify;"><strong>தஞ்சாவூர் வழியாகவும் சிறப்பு ரயில் வேண்டும்!</strong></p>
<p style="text-align: justify;">தாம்பரம்–திருவாரூர் சிறப்பு ரயில் அறிவிப்பு பக்தர்களுக்கு ஓரளவு நிம்மதியை அளித்துள்ள நிலையில், சென்னையில் இருந்து தஞ்சாவூர் வழியாக திருவாரூர், நாகப்பட்டினம், வேளாங்கண்ணி வரை நேரடியாக சிறப்பு ரயில் இயக்க வேண்டும் என்ற கோரிக்கையும் எழுந்துள்ளது.</p>
<p style="text-align: justify;">குறிப்பாக தஞ்சாவூர், கும்பகோணம், பாபநாசம் உள்ளிட்ட பகுதிகளிலிருந்து வேளாங்கண்ணி திருவிழாவுக்கு செல்லும் பக்தர்கள் அதிகளவில் உள்ளனர். தற்போதைய சிறப்பு ரயில் இயக்கத்தில் தஞ்சாவூர் இடம்பெறாததால், இந்தப் பகுதிகளைச் சேர்ந்த பக்தர்கள் கூடுதல் பேருந்து அல்லது வேறு ரயில் இணைப்புகளை நாட வேண்டிய நிலை ஏற்படுகிறது.</p>
<p style="text-align: justify;">எனவே, திருவிழா நாட்களில் சென்னை–தஞ்சாவூர்–திருவாரூர்–நாகப்பட்டினம்–வேளாங்கண்ணி வழித்தடத்தில் கூடுதல் சிறப்பு ரயிலை இயக்க தெற்கு ரயில்வே நடவடிக்கை எடுக்க வேண்டும் என பக்தர்கள் எதிர்பார்க்கின்றனர். இதுபோன்ற ரயில் இயக்கம் தஞ்சாவூர் மாவட்டம் மட்டுமின்றி டெல்டா மாவட்ட பக்தர்களுக்கும் பெரும் பயனளிக்கும்.</p>
<p style="text-align: justify;"><strong>உலகப் புகழ்பெற்ற வேளாங்கண்ணி பேராலயம்</strong></p>
<p style="text-align: justify;">வேளாங்கண்ணியில் அமைந்துள்ள புனித ஆரோக்கிய மாதா பேராலயம் இந்தியாவின் முக்கிய கிறிஸ்தவ புனிதத் தலங்களில் ஒன்றாக விளங்குகிறது. மத வேறுபாடுகளைத் தாண்டி பல்வேறு சமூகங்களைச் சேர்ந்த மக்கள் இங்கு வந்து பிரார்த்தனை செய்வது இதன் தனிச்சிறப்பாகும்.</p>
<p style="text-align: justify;">கடற்கரையை ஒட்டியுள்ள இந்தப் பேராலயம் அதன் வெள்ளை நிறக் கட்டிட அமைப்பு, கோபுரங்கள் மற்றும் தனித்துவமான கட்டிடக்கலை காரணமாகவும் புகழ்பெற்றது. இங்கு ஆண்டுதோறும் நடைபெறும் ஆரோக்கிய மாதா ஆண்டு திருவிழா பல்வேறு பகுதிகளில் இருந்தும் பக்தர்களை ஈர்க்கிறது.</p>
<p style="text-align: justify;"><strong>லட்சக்கணக்கான பக்தர்கள் கூடும் திருவிழா</strong></p>
<p style="text-align: justify;">ஆண்டு திருவிழா காலத்தில் வேளாங்கண்ணியில் பக்தர்களின் எண்ணிக்கை கணிசமாக அதிகரிக்கும். பாதயாத்திரையாகவும், சிறப்பு பேருந்துகள், ரயில்கள், கார்கள் உள்ளிட்ட பல்வேறு வாகனங்கள் மூலமாகவும் பல்வேறு மாவட்டம், மாநிலங்களில் இருந்தும் பக்தர்கள் வந்து செல்கின்றனர்.<br />இதனால் திருவிழா காலத்தில் ரயில் சேவைகளை அதிகரிப்பது போக்குவரத்து நெரிசலை குறைப்பதுடன், பக்தர்களின் பயணச் சிரமத்தையும் பெருமளவில் குறைக்க உதவும். குறிப்பாக சென்னை முதல் தஞ்சாவூர் வழியாக வேளாங்கண்ணி வரை சிறப்பு ரயில் இயக்கப்பட்டால், ஆயிரக்கணக்கான பயணிகள் ஒரே சேவையில் பயணம் செய்யும் வாய்ப்பு உருவாகும்.</p>
<p style="text-align: justify;">எனவே, ஏற்கெனவே அறிவிக்கப்பட்டுள்ள தாம்பரம்–திருவாரூர் சிறப்பு ரயில்களுடன், தஞ்சாவூர் வழியாக திருவாரூர், நாகப்பட்டினம் வழித்தடத்தையும் இணைத்து வேளாங்கண்ணி வரை கூடுதல் சிறப்பு ரயில் இயக்க தெற்கு ரயில்வே விரைந்து நடவடிக்கை எடுக்க வேண்டும் என்பதே பக்தர்களின் முக்கிய எதிர்பார்ப்பாக உள்ளது.</p>
Source: Read Full Article
