விஜய் மாடலில் ரங்கசாமி கோட்-சூட்! அஜித் ரேஸர் கெட்டப்... புதுச்சேரியில் தொண்டர்கள் செய்த சம்பவம்!

<p>புதுச்சேரி : புதுச்சேரி முதலமைச்சரும், என்.ஆர். காங்கிரஸ் கட்சியின் நிறுவனருமான ந.ரங்கசாமியின் பிறந்தநாளையொட்டி, அவரது தொண்டர்கள் வைத்துள்ள புதுமையான பேனர்கள் மற்றும் கட்-அவுட்டுகள் புதுச்சேரி மாநிலத்தில் பெரும் கவனத்தை ஈர்த்துள்ளன.</p> <p>1950 ஆகஸ்ட் 4-ம் தேதி பிறந்த ரங்கசாமி, இளம் வயதிலேயே பெருந்தலைவர் காமராஜருக்கு மன்றம் அமைத்து பொதுவாழ்க்கையில் ஈடுபட்டவர். நடிகர் திலகம் சிவாஜி கணேசனின் தீவிர ரசிகரான இவர், புதுச்சேரி வரலாற்றிலேயே அதிக ஆண்டுகள் முதலமைச்சராகப் பொறுப்பு வகித்தவர் என்ற பெருமைக்குரியவர். தற்போது பா.ஜ.க தலைமையிலான என்.டி.ஏ கூட்டணியில் இரண்டாவது முறையாகத் தொடர்ந்து ஆட்சியை நடத்தி வருகிறார்.</p> <h2>'ஜனநாயகன்' முதல் 'தமிழ் கடவுள் முருகன்' வரை: பேனர் கலாச்சாரம்</h2> <p>ஆண்டுதோறும் முதலமைச்சர் ரங்கசாமியின் பிறந்தநாளை கோலாகலமாகக் கொண்டாடும் என்.ஆர். காங்கிரஸ் தொண்டர்கள், இம்முறை சற்று வித்தியாசமான பாதையைத் தேர்ந்தெடுத்துள்ளனர். வழக்கமான அரசியல் வாழ்த்துப் படங்களைத் தாண்டி, சுவாரசியமான மாடல்களில் பேனர்களை வடிவமைத்துள்ளனர்:</p> <p><strong>விஜய் மாடல் &amp; ஜனநாயகன் ஸ்டைல்:</strong> தற்போதைய அரசியல் சூழலில் ட்ரெண்டிங்கில் உள்ள நடிகர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a>யின் 'ஜனநாயகன்' படப் பாணியிலும், தமிழக அரசியல் களத்தில் அவர் அணியும் கோட்-சூட் உடைகளுடனும் ரங்கசாமியின் முகத்தைப் பொருத்தி பேனர்கள் வைத்துள்ளனர்.</p> <p><strong>அஜித் &amp; சூர்யா கெட்டப்:</strong> நடிகர் அஜித்தின் கார் ரேஸர் லுக், 'கருப்பு' பட ஸ்டைல் மற்றும் சூர்யாவின் பிரபல கதாபாத்திரங்களின் பாணியிலும் ரங்கசாமியைச் சித்தரித்துள்ளனர்.</p> <p><strong>கடவுள் முருகன் வடிவம்:</strong> இதன் உச்சக்கட்டமாக, தமிழ் கடவுளான முருகனின் திருவுருவப் படங்களில் ரங்கசாமியின் முகத்தைப் பொருத்திப் ஏராளமான பேனர்கள் நகரின் முக்கிய இடங்களில் வைக்கப்பட்டுள்ளன.</p> <p><strong>விளையாட்டு வீரர்கள்:</strong> ரங்கசாமிக்கு டென்னிஸ் விளையாட்டு மீது மிகுந்த ஈர்ப்பு உண்டு என்பதால், கிரிக்கெட், கால்பந்து மற்றும் டென்னிஸ் வீரர்களின் உடைகளில் அவரைப் போன்ற கட்-அவுட்டுகளும் இடம் பெற்றுள்ளன.</p> <p>"தற்போது ட்ரெண்டிங்கில் இருக்கும் திரைப்படங்கள் மற்றும் நடிகர்களின் ஸ்டைலில் எங்களது தலைவரை ஸ்டைலாகக் காட்டவே இந்த முயற்சியை மேற்கொண்டோம்," என தொண்டர்கள் உற்சாகத்துடன் தெரிவிக்கின்றனர்.</p> <h2>நற்பணி மன்ற நிகழ்வுகள்</h2> <p>பிறந்தநாளை முன்னிட்டுப் பல்வேறு நலத்திட்ட உதவிகளையும் தொண்டர்கள் திட்டமிட்டுள்ளனர்:</p> <p>திருக்கோயில்களில் சிறப்புப் பூஜைகள் மற்றும் வழிபாடுகள், ஏழை எளிய மக்களுக்குப் பிரம்மாண்ட அன்னதானம், பசுமையைப் போற்றும் வகையில் மரக்கன்றுகள் நடுதல், பள்ளி மாணவ, மாணவிகளுக்குச் சீருடைகள் மற்றும் கல்வி உபகரணங்கள் வழங்குதல், அவசரக் காலத் தேவைகளுக்கான ரத்த தான முகாம்கள்</p> <h2>தொடரும் பேனர் தடை: பொதுமக்கள் கவலை</h2> <p>புதுச்சேரி நகரை அழகுபடுத்தும் நோக்கிலும், பாதுகாப்பைக் கருத்தில் கொண்டும் கடந்த 2009-ம் ஆண்டிலேயே விளம்பரப் போஸ்டர்கள் மற்றும் பேனர்கள் வைக்கத் தடை விதிக்கப்பட்டது. இருப்பினும், ஒவ்வொரு ஆண்டும் அரசியல் கட்சியினரின் பிறந்தநாள் விழாக்களின் போது இச்சட்டம் கண்டுகொள்ளப்படுவதில்லை என்ற குற்றச்சாட்டு எழுகிறது.</p> <p>குறிப்பாக, குறுகலான சாலைகள், முக்கியச் சாலைத் திருப்பங்கள் மற்றும் சிக்னல் பகுதிகளில் பிரம்மாண்டமாக வைக்கப்பட்டுள்ள பேனர்கள், வாகன ஓட்டிகளின் கவனத்தைச் சிதறடித்து விபத்துகளுக்கு வழிவகுக்கும் எனப் பொதுமக்கள் கவலை தெரிவிக்கின்றனர். கொண்டாட்டங்கள் வரவேற்கத்தக்கவை என்றாலும், பொதுமக்களின் பாதுகாப்பைக் கருத்தில் கொண்டு சாலைத் திருப்பங்களிலாவது பேனர்கள் வைப்பதைத் தவிர்க்க வேண்டும் என்பதே புதுச்சேரி மக்களின் முதன்மை கோரிக்கையாக உள்ளது.</p>

Source: Read Full Article