<p>புதுச்சேரி: மத்திய உள்துறை அமைச்சர் அமித் ஷா வரும் 8-ம் தேதி இரண்டு நாள் அரசுமுறைப் பயணமாகப் புதுச்சேரி மற்றும் தமிழகத்திற்கு வருகை தரவுள்ளார். இப்பயணத்தின் போது புதுச்சேரி காவல் துறைக்குக் குடியரசுத் தலைவரின் 'வண்ண விருது' வழங்குதல், திருவண்ணாமலையில் கோவில் தரிசனம் மற்றும் தமிழக பாஜக மூத்த தலைவர்களுடனான முக்கிய ஆலோசனை எனப் பல்வேறு நிகழ்வுகளில் அவர் பங்கேற்கிறார்.</p>
<h2>ஒத்திவைக்கப்பட்ட பயணம் மீண்டும் உறுதி:</h2>
<p>புதுச்சேரி காவல் துறையின் நீண்டகால சிறப்பான சேவை, மிகச் சிறந்த ஒழுக்கம் மற்றும் பொதுமக்களின் பாதுகாப்பை உறுதி செய்வதில் அவர்கள் ஆற்றிய தன்னிகரற்ற பங்களிப்பைப் பாராட்டி, குடியரசுத் தலைவரின் உயரிய ‘வண்ண விருது’ (President's Police Colour) அறிவிக்கப்பட்டது. இந்த விருதினை வழங்கும் விழா புதுச்சேரி காவல் மைதானத்தில் கடந்த மாதமே நடைபெற திட்டமிடப்பட்டு, அதில் மத்திய அமைச்சர் அமித் ஷா பங்கேற்பதாக இருந்தது. ஆனால், டெல்லியில் மாணவர்கள் மற்றும் இளைஞர்களின் போராட்டங்கள் தீவிரமடைந்ததால், அவரது பாதுகாப்பு கருதி அப்பயணம் அப்போது ரத்து செய்யப்பட்டது. இந்நிலையில், ஒத்திவைக்கப்பட்ட அந்த விழா தற்போது மீண்டும் உறுதி செய்யப்பட்டு, அதற்கான பயணத்திட்டம் இறுதி செய்யப்பட்டுள்ளது.</p>
<h2> அமித் ஷாவின் இரண்டு நாள் பயணத்திட்டம்: </h2>
<p>ஆகஸ்ட் 8 (இரவு): டெல்லியிலிருந்து புறப்படும் மத்திய அமைச்சர் அமித் ஷா, அன்றைய தினம் இரவு புதுச்சேரி வந்தடைந்து அங்குத் தங்கி ஓய்வெடுக்கிறார்.</p>
<p>ஆகஸ்ட் 9 (காலை): புதுச்சேரி காவல் மைதானத்தில் நடைபெறும் பிரம்மாண்ட விழாவில் பங்கேற்று, புதுச்சேரி காவல் துறைக்குக் குடியரசுத் தலைவரின் 'வண்ண விருதை' வழங்கி கௌரவிக்கிறார். </p>
<p>ஆகஸ்ட் 9 (மதியம்): புதுச்சேரி நிகழ்வுகளை முடித்துக் கொண்டு, சாலை மார்க்கமாகத் திருவண்ணாமலைக்குச் செல்கிறார். அங்குள்ள உலகப்புகழ் பெற்ற ஸ்ரீ ரமண மகரிஷி ஆசிரமத்தில் நடைபெறும் நிகழ்வுகளில் கலந்து கொள்கிறார். அதனைத் தொடர்ந்து, வரலாற்றுச் சிறப்புமிக்க அருள்மிகு <a title="அண்ணாமலை" href="https://tamil.abplive.com/topic/annamalai" data-type="interlinkingkeywords">அண்ணாமலை</a>யார் திருக்கோயிலில் சாமி தரிசனம் செய்யவுள்ளார்.</p>
<p>ஆகஸ்ட் 9 (மாலை/இரவு): திருவண்ணாமலை பயணத்தை முடித்துக் கொண்டு சென்னை விமான நிலையம் வந்தடையும் அவர், அங்கேயே தமிழக பாஜகவின் மூத்த தலைவர்களுடன் மாநில அரசியல் நிலவரங்கள் மற்றும் கட்சி நடவடிக்கைகள் குறித்து முக்கிய ஆலோசனை நடத்துகிறார். ஆலோசனைக் கூட்டம் நிறைவடைந்ததும், அன்றைய தினமே தனி விமானம் மூலம் டெல்லிக்குப் புறப்பட்டுச் செல்கிறார். </p>
<h2>பலத்த பாதுகாப்பு ஏற்பாடுகள்:</h2>
<p>மத்திய உள்துறை அமைச்சரின் வருகையை முன்னிட்டு புதுச்சேரி மற்றும் திருவண்ணாமலையில் பலத்த போலீஸ் பாதுகாப்பு ஏற்பாடுகள் செய்யப்பட்டு வருகின்றன. முக்கிய இடங்கள், அவர் பயணிக்கும் பாதைகள் மற்றும் தங்கும் விடுதிகள் அனைத்தும் தீவிர கண்காணிப்பின் கீழ் கொண்டு வரப்பட்டுள்ளன.</p>
Source: Read Full Article
