<p style="text-align: justify;">காஞ்சிபுரம் மாவட்ட ஆட்சித்தலைவர் தி.சினேகா வெளியிட்டுள்ள செய்திக்குறிப்பில், மத்திய அரசின் சமூகநீதி மற்றும் அதிகாரமளித்தல் துறை சார்பில் இதர பிற்படுத்தப்பட்டோர் (OBC), பொருளாதாரத்தில் பின்தங்கியவர்கள் (EBC) மற்றும் சீர்மரபினர் (DNT) பிரிவைச் சேர்ந்த மாணவ, மாணவியருக்காக 'பிரதம மந்திரியின் கல்வி உதவித்தொகை திட்டம்' (PM YASASVI) செயல்படுத்தப்பட்டு வருவதாகத் தெரிவித்துள்ளார். 2026-27-ஆம் கல்வியாண்டிற்கு, தேசிய கல்வி உதவித்தொகை இணையதளத்தில் அறிவிக்கப்பட்டுள்ள சிறந்த செயல்பாடுடைய (100% தேர்ச்சி பெற்ற) பள்ளிகளில் 9-ஆம் வகுப்பு முதல் 12-ஆம் வகுப்பு வரை பயிலும் தமிழகத்தைச் சேர்ந்த தகுதியான மாணவர்கள் இத்திட்டத்தின் கீழ் பயன் பெற விண்ணப்பிக்கலாம்.</p>
<h3 style="text-align: justify;">உதவித்தொகை விவரம் மற்றும் தகுதிகள்</h3>
<p style="text-align: justify;">இத்திட்டத்தின் கீழ் 9 மற்றும் 10-ஆம் வகுப்புகளில் பயிலும் மாணவர்களுக்கு ஆண்டொன்றுக்குக் கல்விக் கட்டணம் மற்றும் விடுதிக் கட்டணமாக அதிகபட்சமாக 75,000 ரூபாயும், 11 மற்றும் 12-ஆம் வகுப்புகளில் பயிலும் மாணவர்களுக்கு அதிகபட்சமாக 1,25,000 ரூபாயும் ஒன்றிய அரசால் வழங்கப்படும். மேலும், மொத்த பயன்பாட்டில் 30 சதவீதம் மாணவியர்களுக்கு பிரத்யேகமாக ஒதுக்கீடு செய்யப்பட்டுள்ளது.</p>
<p style="text-align: justify;">இத்திட்டத்தில் விண்ணப்பிக்க விரும்புவோர் பிற்படுத்தப்பட்டோர், பொருளாதாரத்தில் பின்தங்கியவர் அல்லது சீர்மரபினர் பிரிவைச் சேர்ந்தவராக இருக்க வேண்டும். மாணவர்களின் குடும்ப ஆண்டு வருமானம் 2.50 லட்சத்திற்கு மிகாமல் இருக்க வேண்டும் என்பதும், 2025-26 கல்வியாண்டில் 100% தேர்ச்சி பெற்று மத்திய அரசின் பட்டியலிலுள்ள பள்ளிகளில் பயிலும் மாணவராக இருக்க வேண்டும் என்பதும் முக்கியமான நிபந்தனைகளாகும்.</p>
<h3 style="text-align: justify;">புதுப்பித்தல் மற்றும் புதிய விண்ணப்பங்கள்</h3>
<p style="text-align: justify;">கடந்த 2025-26 நிதியாண்டில் இத்திட்டத்தின் கீழ் உதவித்தொகை பெற்று தற்போது 10 மற்றும் 12-ஆம் வகுப்புகளில் பயிலும் மாணவர்கள், தங்களது விண்ணப்பங்களை தேசிய கல்வி உதவித்தொகை இணையதளத்தில் (https://scholarships.gov.in) புதுப்பித்தல் (Renewal) செய்து, உரிய படிவத்தைப் பூர்த்தி செய்து 31.08.2026-க்குள் சமர்ப்பிக்க வேண்டும். இவ்வாறு இணையத்தில் பூர்த்தி செய்யப்பட்ட விண்ணப்பங்களைப் பள்ளித் தலைமை ஆசிரியர்கள் சரிபார்ப்பதற்கான கடைசி நாள் 15.09.2026 ஆகும். 2026-27 கல்வியாண்டில் 9 மற்றும் 11-ஆம் வகுப்புகளில் புதிதாகச் சேரும் தகுதியுள்ள மாணவர்கள் விண்ணப்பிப்பதற்கான தேதிகள் விரைவில் NSP இணையதளத்தில் அறிவிக்கப்படும்.</p>
<h3 style="text-align: justify;">கூடுதல் தகவல்கள்</h3>
<p style="text-align: justify;">இத்திட்டம் குறித்த கூடுதல் விவரங்களை அறிந்துகொள்ள விரும்பும் மாணவர்கள் மற்றும் பெற்றோர்கள் தேசிய கல்வி உதவித்தொகை இணையதளம் (https://scholarships.gov.in) அல்லது மத்திய அரசின் சமூகநீதி மற்றும் அதிகாரமளித்தல் துறையின் அதிகாரப்பூர்வ இணையதளத்தைப் (http://socialjustice.gov.in) பார்வையிடலாம். தகுதியுடைய மாணவ, மாணவியர் அனைவரும் இந்த நல்வாய்ப்பைப் பயன்படுத்தி விண்ணப்பித்து பயன்பெறுமாறு மாவட்ட ஆட்சித்தலைவர் கேட்டுக்கொண்டுள்ளார்.</p>
Source: Read Full Article
