<p style="text-align: justify;"><strong>தஞ்சாவூர்:</strong> போதிய தண்ணீரின்றி நிலங்கள் காய்ந்து வரும் வேளையில், மறுபுறம் பயிர் காப்பீடு செய்வதற்கான காலக்கெடு முடிவடைய உள்ளதால், அதற்கான சாகுபடிச் சான்றிதழை வழங்க கிராம நிர்வாக அலுவலர்கள் (விஏஓ) பிடிவாதமாக மறுத்து வருகின்றனர். காவிரி ஆற்றில் பாசனத்திற்குத் தண்ணீர் உரிய காலத்தில் திறக்கப்படாததால், குறுவை சாகுபடி செய்யத் தயாராக இருந்த தஞ்சை மாவட்ட விவசாயிகள் தற்போது நடுத்தெருவுக்கு வரும் நிலைக்குத் தள்ளப்பட்டுள்ளனர். </p>
<p style="text-align: justify;">இதனால், வாழ்வாதாரத்தை இழந்து நிற்கும் டெல்டா விவசாயிகள் மிகுந்த மன உளைச்சலுக்கும், வேதனைக்கும் ஆளாகியுள்ளனர்.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/07/06/d36a4894f34e8989fb8df7bf4ddcb9db1783343322758733_original.JPG" /></p>
<p style="text-align: justify;"><strong>பாலைவனமாகும் நெற்களஞ்சியம்: காய்ந்து கருகிய நாற்று மேடைகள்</strong></p>
<p style="text-align: justify;">தமிழகத்தின் நெற்களஞ்சியமான தஞ்சாவூர், மற்றும் அதன் சுற்றுவட்டார டெல்டா மாவட்டங்களில் இந்த ஆண்டு குறுவை சாகுபடியை எப்படியாவது நல்ல முறையில் செய்து முடிக்க வேண்டும் என்று விவசாயிகள் ஆவலோடு இருந்தனர். இதற்காகத் தங்களின் நகைகளையும், உடைமைகளையும் அடகு வைத்துப் பணத்தைத் திரட்டி, நிலங்களைச் சீரமைத்து, நாற்று மேடைகளையும் அமைத்துத் தண்ணீர் வரும் என்று இரவும் பகலும் காத்துக் கிடந்தனர். </p>
<p style="text-align: justify;">ஆனால், மேட்டூர் அணையில் இருந்து போதிய தண்ணீர் உரிய நேரத்தில் வராததாலும், பருவமழை கைகொடுக்காததாலும் பல ஆயிரம் ஏக்கர் நிலங்கள் சாகுபடி செய்ய முடியாமல், பிளவெடுத்துத் தரிசாகக் காட்சியளிக்கின்றன. கண்ணெதிரே நிலங்கள் காய்ந்து போவதைக் கண்டு விவசாயிகள் செய்வதறியாது திகைத்து நிற்கின்றனர்.</p>
<p style="text-align: justify;"><strong>விவசாயிகளின் வயிற்றில் அடித்து முட்டுக்கட்டை போடும் அதிகாரிகள்</strong></p>
<p style="text-align: justify;">இயற்கைப் பேரிடர், வறட்சி, அல்லது போதிய நீர் ஆதாரமின்மை காரணமாக விதைப்பு செய்ய முடியாமல் போனால், அந்தப் பகுதியை அரசு அதிகாரப்பூர்வமாக 'விவசாயம் தடைபட்ட பகுதி' (Prevented Sowing Area) என அறிவிக்க வேண்டும் என்பது விதியாகும். இத்தகைய இக்கட்டான சூழலில், பயிர் காப்பீட்டுத் தொகையில் 25 விழுக்காடு இழப்பீடாகப் பெற விவசாயிகளுக்கு உரிமை உண்டு.</p>
<p style="text-align: justify;">இதற்கு, "நாங்கள் சாகுபடி செய்யத் தயாராக இருந்தும், நீர் ஆதாரமின்மையால் சாகுபடி செய்ய இயலவில்லை" என்பதை உறுதிப்படுத்தும் சான்றிதழை அந்தந்தப் பகுதி கிராம நிர்வாக அலுவலர்களிடம் (விஏஓ) பெற்று சமர்ப்பிக்க வேண்டும். ஆனால், இதற்கான சான்றிதழ்களை வழங்க கிராம நிர்வாக அலுவலர்கள் முற்றிலுமாகத் தயக்கம் காட்டி வருகின்றனர்.</p>
<p style="text-align: justify;">அரசின் தெளிவான வழிகாட்டுதல்கள் இருந்தபோதிலும், பல கிராமங்களில் அதிகாரிகள் சான்றிதழ் தர மறுப்பதோடு, பல்வேறு சாக்குப்போக்குகளைக் கூறி விவசாயிகளை அலைக்கழித்து, அவர்களின் வயிற்றில் அடித்து வருவதாகப் புகார்கள் எழுந்துள்ளன.</p>
<p style="text-align: justify;"><strong>எவ்விதத் தடையுமின்றி சான்றிதழ் வழங்குங்கள்</strong></p>
<p style="text-align: justify;">அதிகாரிகளின் இந்த அலட்சியப் போக்கைக் கண்டித்தும், விவசாயிகளின் வாழ்வாதாரத்தைக் காக்கக் கோரியும், தமிழ்நாடு விவசாயிகள் சங்க மாவட்டச் செயலாளர் என்.வி.கண்ணன் தலைமையில் திரளான விவசாயிகள், இன்று திங்கள்கிழமை தஞ்சை மாவட்ட ஆட்சியர் அலுவலகத்தில் நடைபெற்ற மக்கள் குறைதீர் கூட்டத்தில் மாவட்ட ஆட்சியர் இரா.ரேவதியிடம் நேரில் கண்ணீர் மல்க மனு அளித்தனர்.</p>
<p style="text-align: justify;">பின்னர் செய்தியாளர்களைச் சந்தித்த என்.வி.கண்ணன் ஆவேசமாகப் பேசியதாவது: "காவிரி நீர் உரிய நேரத்தில் வராதது விவசாயிகளின் தவறு கிடையாது. இயற்கையும், அரசும் கைவிட்ட நிலையில், காப்பீட்டுத் தொகையாவது கிடைக்கும் என்ற நம்பிக்கையில் சான்றிதழ் பெறச் சென்றால், கிராம நிர்வாக அலுவலர்கள் எங்களை ஏளனமாக நடத்துகிறார்கள். காப்பீடு செய்வதற்கான காலக்கெடு நெருங்கிவிட்டது. உரிய காலத்தில் சான்றிதழ் கிடைக்காவிட்டால், பயிர் காப்பீட்டுத் தொகையைப் பெற முடியாமல் விவசாயிகள் ஒட்டுமொத்தமாக நடுத்தெருவுக்கு வந்துவிடுவார்கள்.</p>
<p style="text-align: justify;">எனவே, மாவட்ட ஆட்சியர் உடனடியாகத் தலையிட்டு, எவ்விதத் தடையுமின்றி விவசாயிகளுக்குச் சான்றிதழ் வழங்க கிராம நிர்வாக அலுவலர்களுக்குக் கடுமையான உத்தரவிட வேண்டும்." என்று அவர் வலியுறுத்தினார்.</p>
<p style="text-align: justify;"><strong>பயிர் காப்பீடு காலக்கெடுவை நீட்டிக்கக் கோரிக்கை</strong></p>
<p style="text-align: justify;">தற்போதைய இக்கட்டான சூழ்நிலையைக் கருத்தில் கொண்டு, பயிர் காப்பீடு செய்வதற்கான கடைசித் தேதியை மேலும் சில வாரங்களுக்கு நீட்டிக்கத் தமிழக அரசு மத்திய அரசுக்கு அழுத்தம் தர வேண்டும் என்றும் விவசாயிகள் கோரிக்கை விடுத்துள்ளனர். தஞ்சை மாவட்டத்தின் முதுகெலும்பான விவசாயமும், விவசாயிகளின் வாழ்வாதாரமும் முழுமையாக அழிந்து போவதற்குள், மாவட்ட நிர்வாகமும், தமிழக அரசும் போர்க்கால அடிப்படையில் நடவடிக்கை எடுத்து உரிய தீர்வு காண வேண்டும் என்பதே ஒட்டுமொத்த டெல்டா விவசாயிகளின் தற்போதைய எதிர்பார்ப்பாகும்.</p>
Source: Read Full Article
