<p>புதுச்சேரி: புதுச்சேரியில் நடைபெற்ற பள்ளி விழா ஒன்றில், தமிழக நீர்வளத்துறை அமைச்சர் ஆனந்த் மற்றும் புதுச்சேரி மாநில அதிமுக அமைப்பாளர் அன்பழகன் ஆகியோர் ஒரே மேடையில் பங்கேற்று, அரசியல் கலந்த கலகலப்பான நேரடி விவாதத்தில் ஈடுபட்டது அங்கிருந்தவர்களிடையே பெரும் சுவாரசியத்தை ஏற்படுத்தியது.</p>
<h2>விஜய் விசுவாசியான அமைச்சர்: அன்பழகன் பாராட்டு</h2>
<p>புதுச்சேரியில் நடைபெற்ற பள்ளி விழா ஒன்றில், தமிழக நீர்வளத்துறை அமைச்சர் ஆனந்த் மற்றும் புதுச்சேரி மாநில அ.தி.மு.க. அமைப்பாளர் அன்பழகன் ஆகியோர் ஒரே மேடையில் பங்கேற்றனர். விழாவில் இருவருக்கும் இடையே நடைபெற்ற கலகலப்பான நேரடி விவாதம் மேடையில் பெரும் சுவாரசியத்தை ஏற்படுத்தியது. விழாவில் முதலில் பேசிய அதிமுக அமைப்பாளர் அன்பழகன், மேடையில் இருந்த தமிழக அமைச்சர் ஆனந்தை வெகுவாகப் பாராட்டிப் பேசினார். அப்போது, "அமைச்சர் ஆனந்தின் 25 ஆண்டு கால விசுவாசத்தையும் உழைப்பையும் நான் நேரில் பார்த்திருக்கிறேன். நடிகர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> மீது அவர் கொண்ட பற்றினாலும், காட்டிய விசுவாசத்தினாலும்தான் இன்றைக்கு அவர் இந்த உயர்நிலையை அடைந்துள்ளார்" என்று குறிப்பிட்டார்.</p>
<h2>மாற்றுக் கட்சியினரை இழுக்க வேண்டாம்: அதிமுக கோரிக்கை</h2>
<p>தொடர்ந்து தனது அரசியல் பயணம் குறித்துப் பேசிய அன்பழகன், "நான் 17 வயதிலிருந்து அதிமுகவில் விசுவாசமாக இருந்து வருகிறேன். பிற கட்சிகளில் உண்மையாகவும் விசுவாசமாகவும் இருப்பவர்களை மனம் மாற்றி, வேறு கட்சிக்கு இழுப்பது தவறான ஒன்று. எனவே, மாற்றுக் கட்சியினரை மனம் மாற்றும் செயல்களில் ஈடுபட வேண்டாம்" என அமைச்சர் ஆனந்திற்கு மேடையிலேயே கோரிக்கை விடுத்தார்.</p>
<h2>அன்பழகனுக்கு அமைச்சர் ஆனந்த் கொடுத்த கலகலப்பான பதிலடி!</h2>
<p>இதற்குப் பதிலளித்துப் பேசிய அமைச்சர் ஆனந்த், "செய்திகளில் எப்படி இடம்பெற வேண்டும் என்பது சகோதரர் அன்பழகனுக்கு நன்றாகவே தெரியும். அவர் ஒரு திறமையான மற்றும் உண்மையான அரசியல்வாதி" என்று முதலில் அவருக்குப் புகழாரம் சூட்டினார்.</p>
<p>அதன்பின், கட்சித் தாவல் குறித்த அன்பழகனின் புகாருக்குத் தனது பாணியில் நகைச்சுவையாகப் பதிலடி கொடுத்தார். "நீங்க உங்க கட்சியினரை ஒழுங்காக வைத்துக்கொண்டால், அவர்கள் ஏன் வேறு இடத்திற்கு வரப்போகிறார்கள்? எந்த இடம் நல்ல இடம், எது ஊழல் இல்லாத இடம் என்பதைப் புரிந்து கொண்டுதான் அவர்கள் எங்களிடம் வருகிறார்கள்" என்று அவர் பேச, அரங்கமே சிரிப்பலையில் அதிர்ந்தது.</p>
<p>ஒரே மேடையில் இரு வேறு கட்சிகளைச் சேர்ந்த தலைவர்கள், எவ்வித கசப்புணர்வும் இன்றி அரசியல் கருத்துக்களை நகைச்சுவையோடும் கலகலப்பாகவும் பரிமாறிக்கொண்ட இந்த நிகழ்வு பொதுமக்களிடையே பெரும் கவனத்தை ஈர்த்துள்ளது.</p>
Source: Read Full Article
