<h3><strong>3 மடங்கு லாபம் தருவதாக முதலீடு</strong></h3>
<p>தமிழகத்தில் கடந்த 2016-ம் ஆண்டு செயல்பட்ட நியோ மேக்ஸ் நிறுவனம் மாநிலம் முழுவதும் 60,000-க்கும் மேற்பட்டோரிடம் ரூ.8,000 கோடி வரை மோசடி செய்ததாக குற்றச்சாட்டு எழுந்தது. பலரிடம் பணம் பெற்று, அதை ரியல் எஸ்டேட் துறையில் முதலீடு செய்து 3 மடங்கு லாபம் தருவதாக கூறி பலரை முதலீடு செய்ய வைத்ததாக கூறப்படுகிறது. பின்னர் நிறுவனம் செயலிழந்த நிலையில், அதன் நிர்வாகிகள் மீது விசாரணை நடைபெறுகிறது.</p>
<p>இந்த வழக்கில் தொடர்புடைய வரும், நியோமேக்ஸ் நிறுவனத்தின் முன்னாள் பங்குதாரருமான சென்னை மேடவாக்கத்தைச் சேர்ந்த சார்லஸ் ( வயது 56), கடந்த 27-ம் தேதி தனது கார் ஓட்டுநர் ஷியாம் விக்னேஷ் ( வயது 30) உடன் ஓ.எம்.ஆர். சாலையில் உள்ள நாவலூர் பகுதிக்கு சென்றிருந்தார்.</p>
<div class="text__StyledText-sc-n3xoc4-0 hRGIKp">
<p>அங்கு சாலையோரம் காரை நிறுத்திய சார்லஸ், எதிரே உள்ள வணிக வளாகத்தில் சில பொருட்கள் வாங்கி வருமாறு ஓட்டுநரிடம் கூறினார். ஓட்டுநர் 15 நிமிடங்கள் கழித்து வந்தபோது, சார்லஸைக் காணவில்லை. காரும் இல்லை. செல்போன் லைனும் கிடைக்கவில்லை.</p>
<h3><strong>சிசிடிவி காட்சிகள் ஆய்வு</strong></h3>
<p>இதையடுத்து ஓட்டுநர் காவல் கட்டுப்பாட்டு அறைக்கு தகவல் தெரிவித்தார். தாழம்பூர் போலீஸார் சிசிடிவி காட்சிகளை ஆய்வு செய்த போது, மற்றொரு காரில் வந்த நால்வர், அவரை அவரது காருடன் அழைத்துச் செல்வது பதிவாகி இருந்தது.</p>
<p>கடத்தல் கும்பல் 2 கார்களில் பிரிந்து பயணித்ததும், ஒரு கார் தென்காசி நோக்கியும் மற்றொரு கார் கோவை நோக்கியும் சென்றதும் தெரிந்தது. தென்காசி மாவட்டத்தில் உள்ள ஒரு பண்ணையில் அடைத்து வைக்கப்பட்டிருந்த சார்லஸை தனிப்படை போலீஸார் மீட்டனர். அங்கு இருந்த தினேஷ் பாண்டின் ( வயது 34 ) கைது செய்யப்பட்டார்.</p>
<p> அவர் அளித்த தகவலின் பேரில், கோவையில் பதுங்கியிருந்த கருத்தபாண்டி ( வயது 24), ராமநாதபுரத்துக்கு தப்பிச் சென்ற தினேஷ்குமார் ( வயது 33), சபரி என்ற வேல் சபரி ( வயது 26) ஆகியோரையும் கைது செய்தனர்.</p>
<p>இந்த கும்பல், கடந்த 7 மாதங்களுக்கு முன்பே சார்லஸை மிரட்டி ரூ.1.40 கோடியை பறித்துள்ளது. அது தொடர்பாக சார்லஸ் புகார் அளிக்காததால், தற்போது அவரை ரூ.2 கோடி கேட்டு, மிரட்டி, கடத்தியுள்ளது விசாரணையில் தெரிய வந்துள்ளது. அவர்களிடம் இருந்து 2 கார்களும், சார்லஸின் காரும் பறிமுதல் செய்யப்பட்டன.</p>
</div>
Source: Read Full Article
