<p><strong>Tamil Nadu By Election 2026:</strong> தமிழ்நாட்டில் நடந்து முடிந்த சட்டமன்ற தேர்தலில் முன்னாள் ஆளுங்கட்சிகளான திமுக மற்றும் அதிமுக இரண்டிற்கும் அரசியல் புதுமுகமான தவெக அதிர்ச்சி அளித்தது. இந்த தேர்தலில் இரண்டாவது இடத்திற்கு திமுக-வும், 3வது இடத்திற்கு அதிமுக-வும் தள்ளப்பட்டது. </p>
<h2><strong>இடைத்தேர்தல்:</strong></h2>
<p>தவெக மீது எதிர்க்கட்சிகளான திமுக-வும், அதிமுக-வும் மிகவும் அதிருப்தியிலும் ஆதங்கத்திலும் உள்ளனர். இந்த சூழலில், தமிழ்நாட்டில் திருச்சி கிழக்கு, தாராபுரம், பெருந்துறை, மதுராந்தகம், விராலிமலை மற்றும் அம்பாசமுத்திரம் ஆகிய 6 தொகுதிகளில் இடைத்தேர்தல் நடைபெற உள்ளது. இந்த இடைத்தேர்தலில் தவெக-வை வீழ்த்த வேண்டும் என்று திமுக மற்றும் அதிமுக ஆகிய கட்சிகள் உறுதியாக இருப்பதாக கூறப்படுகிறது. குறிப்பாக, தவெக-வை வீழ்த்த வேண்டும் என்று திமுக மிகவும் மும்முரமாக உள்ளனர்.</p>
<p>இந்த சூழலில், திமுக தமிழ்நாட்டில் விரைவில் நடைபெற உள்ள சட்டமன்ற இடைத்தேர்தலில் எதிர்க்கட்சிகள் சார்பில் பொது வேட்பாளரை நிறுத்த திட்டமிட்டுள்ளதாக தகவல் வெளியாகியுள்ளது. அதற்காக அதிமுக, நாம் தமிழர் உள்ளிட்ட கட்சியினருடனும் பேச்சுவார்த்தை நடத்தி வருவதாகவும் கூறப்படுகிறது. </p>
<h2><strong>அம்பாசமுத்திரத்தில் சீமான்?</strong></h2>
<p>இந்த திட்டம் நிறைவேறினால் அம்பாசமுத்திரம் தொகுதியில் பொது வேட்பாளராக நாம் தமிழர் ஒருங்கிணைப்பாளர் சீமான் களமிறங்க வாய்ப்பு இருப்பதாக கூறப்படுகிறது. நடந்து முடிந்த சட்டமன்ற தேர்தலில் அம்பாசமுத்திரம், ஆலங்குளம், காரைக்குடி ஆகிய தொகுதிகளில் நாம் தமிழர் அதிக வாக்குகள் பெற்றது. </p>
<p>இதனால், வரும் சட்டமன்ற தேர்தலில் அம்பாசமுத்திரம் தொகுதியில் சீமானை பொதுவேட்பாளராக களமிறக்க முடிவு செய்துள்ளனர். ஏனென்றால், இந்த தொகுதியில் போட்டியிட்ட <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a>, காங்கிரஸ் மற்றும் அதிமுக வேட்பாளராக களமிறங்கிய இசக்கி சுப்பையா 3 பேரும் தற்போது ஓரணியில் உள்ளனர். இந்த தொகுதியில் நாம் தமிழர் வேட்பாளர் சிவசங்கரன் 14 ஆயிரத்து 906 வாக்குகள் பெற்றார். </p>
<h2><strong>தொண்டர்கள் ஏற்பார்களா?</strong></h2>
<p>இந்த தொகுதியில் நாடார் சமுதாய வாக்குகளும் அதிகளவு உள்ளது. இதனால், சீமான் நேரடியாக களமிறங்கினால் அவர் வெற்றி பெறுவதற்கான வாய்ப்புகள் அதிகளவு இருக்கும் என்று திமுக கணக்கு போட்டுள்ளது. கடந்த சட்டமன்ற தேர்தல் பரப்புரையில் நாம் தமிழர் அதிகளவு திமுக-வை விமர்சிக்கவில்லை. மேலும், தேர்தல் முடிவுகளுக்கு பிறகு சீமானுக்கு குழந்தை பிறந்ததற்கு திமுக முன்னாள் அமைச்சர் அனிதா ராதாகிருஷ்ணன் நேரில் சென்று சீர் செய்தார். இந்த சம்பவங்கள் திமுக-வுடன் சீமான் இணக்கமாக செல்வதையே குறிக்கிறது.</p>
<p>அதேசமயம், திராவிட கட்சிகளை மிக கடுமையாக விமர்சிக்கும் சீமான் குறிப்பாக திமுக-வை மிக கடுமையாக விமர்சிக்கும் நாம் தமிழர் கட்சி அதே திமுக-வின் ஆதரவுடன் பொது வேட்பாளராக சீமானே களமிறங்கினால் அது அவர்களுக்கு பின்னடைவாக இருக்கும் என்றும் அரசியல் நிபுணர்கள் கணித்துள்ளனர்.</p>
<p><iframe class="vidfyVideo" style="border: 0px;" src="https://tamil.abplive.com/web-stories/auto/why-does-the-clutch-plate-wear-out-quickly-264411" width="631" height="381" scrolling="no"></iframe></p>
Source: Read Full Article
