<h3><strong><a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> ஆட்சியில் கோரச் சம்பவங்கள்</strong></h3>
<p>சென்னை அண்ணா அறிவாலயத்தில் செய்தியாளர்களைச் சந்தித்த தி.மு.க அமைப்புச் செயலாளர் ஆர்.எஸ்.பாரதி ; </p>
<p>முதலமைச்சர் விஜய் பொறுப்பை ஏற்றுக் கொண்ட நாள் முதல் மக்களுக்குக் கொடுத்த வாக்குறுதிகளை நிறைவேற்றுவதில் எவ்வித அக்கறையும்<br />காட்டாமல் இருக்கிறார். அவரது ஆட்சியில் அரங்கேறி வரும் கோரச் சம்பவங்கள் மற்றும் பாலியல் குற்றங்கள் குறித்து அவர் இதுவரை வாய் திறக்கவில்லை. முறையான பதிலும் சொல்லவில்லை.</p>
<h3><strong>அரசியலில் இருந்தே ஓடியிருப்பார்</strong></h3>
<p>இன்ஸ்டாகிராம் மற்றும் சமூக வலைதளங்கள் மூலமாகவே ஆட்சிக்கு வந்தவர் விஜய். கடந்த காலங்களில் அவர் பேசிய கருத்துக்களுக்காக, தி.மு.க ஆட்சியில் இருந்த போது வழக்குத் தொடர்ந்திருந்தால், அவர் அரசியலை விட்டே ஓடியிருப்பார்.</p>
<h3><strong>24 மணி நேரம் டைம் </strong></h3>
<p>சைதாப்பேட்டையில் தி.மு.க-வைச் சேர்ந்த 'ஜென் - சி' இளைஞர் ஒருவர்<br />தாக்கப்பட்ட விவகாரத்தில் புகார் அளித்து 3 நாட்கள் ஆகிறது. ஆனால், இதுவரை<br />காவல் துறை வழக்குப் பதிவு செய்யவில்லை. இன்னும் 24 மணி நேரத்திற்குள் காவல் துறையினர் வழக்குப் பதிவு செய்யவில்லை என்றால், தி.மு.க சார்பில் சைதாப்பேட்டை<br />காவல் நிலையம் முன்பு மாபெரும் போராட்டம் நடத்தப்படும்.</p>
<p>தமிழக வெற்றிக் கழக அரசுக்கு ஒன்று<br />சொல்லிக் கொள்ள விரும்புகிறேன். தி.மு.க இதுபோன்ற பூச்சாண்டிகளுக்கு எல்லாம் ஒரு போதும் பயப்படாது. ஜென்சி இளைஞர்கள் தி.மு.க-வை நோக்கி வருவதை விஜயால் தாங்கிக் கொள்ள முடியவில்லை. <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> சட்டப் பேரவையில் ஆடியது போல வெளியிலும் ஆட<br />முடியாது.</p>
<h3><strong>முதலமைச்சரால் பொறுத்து கொள்ள முடியவில்லை</strong></h3>
<p>த.வெ.க ஆட்சியில் ஒரே இரவில் பாலியல் குற்றம் செய்தவர்களை இந்த அரசு கைது செய்ததா ? ஆனால், இரவு 10 மணிக்கு சமூக வலைதளத்தில் பதிவிட்டவரை 12 மணிக்கே சென்று பிடிக்க காவல்துறை துடிக்கிறது. ஜென்சி இளைஞர்கள்<br />பேசுவதைக் கூட முதலமைச்சரால் பொறுத்துக் கொள்ள முடியவில்லை.</p>
<p>திருடனைப் பிடிப்பது போலக் காவல் துறையினர் வீடுகளுக்குச் செல்கிறார்கள். சமூக வலைதளத்தில் ஒரு செய்தியை வெளியிட ஒருவரைத் தடுத்தால், அதே செய்தியை ஒரு லட்சம் பேர் வெளியிடுவோம். தி.மு.க என்பது அடக்கு முறைகளையும், மிசா - வையும் பார்த்த கட்சி என்பதை நினைவில் கொள்ள வேண்டும் என இவ்வாறு ஆர்.எஸ்.பாரதி கூறினார்.</p>
Source: Read Full Article
