மயோசிடிஸ் நோயிலிருந்து மீண்ட அனுபவத்தைப் பகிர்ந்து மனம் உருகிய நடிகை
ஒருவருக்கு உடல்நலக்குறைவு ஏற்பட்டால், அவரது கவனம் முழுவதும் உடல்நலம் மீது மட்டுமே இருக்கும் என நடிகை சமந்தா உருக்கமாகத் தெரிவித்துள்ளார். மயோசிடிஸ் நோயிலிருந்து மீண்ட தனது அனுபவத்தைப் பகிர்ந்துகொண்ட அவர், தற்போது ஆரோக்கியம், நல்ல உணவு மற்றும் மன அமைதிக்கு மட்டுமே முக்கியத்துவம் கொடுப்பதாகக் கூறியுள்ளார்.
மயோசிடிஸ் எனும் அரிய நோயால் பாதிக்கப்பட்டிருந்த சமந்தா, அதிலிருந்து மீண்டுவரக் கடுமையாகப் போராடினார். அந்த அனுபவங்களைப் பற்றிப் பேசிய அவர், உடல்நலம் பாதிக்கப்பட்டிருக்கும்போது நாம் மற்ற எதைப் பற்றியும் சிந்திக்க மாட்டோம். அப்போது நம் முழு கவனமும், நம் உடலை குணப்படுத்துவது, அதற்கான மருந்து மாத்திரைகள், மற்றும் சிகிச்சையில் மட்டுமே இருக்கும். இந்த அனுபவங்களுக்குப் பிறகு, தற்போது தான் நல்ல உணவு, நிம்மதியான தூக்கம், மற்றும் மன ஆரோக்கியம் ஆகியவற்றில் மட்டுமே கவனம் செலுத்தி வருவதாகத் தெரிவித்தார். அதன் காரணமாகவே, தற்போது தான் மிகவும் அமைதியாகவும், ஆரோக்கியமாகவும் உணர்வதாகவும் சமந்தா கூறினார்.
மயோசிடிஸ் நோயிலிருந்து மீண்ட அவர், தற்போது கடுமையாக உடற்பயிற்சிகளை மேற்கொண்டு வருகிறார். அவரது இந்தப் பேச்சு, பலருக்கும் உத்வேகம் அளிப்பதாக அமைந்துள்ளது.
