மயிலின் மரணம் எப்படி? உயிரிழப்புக்கான காரணம் குறித்து ஆய்வு!
சென்னை கோட்டூர்புரம், காந்தி மண்டபம் சாலையோரப் பிளாட்பாரத்தில் இறந்து கிடந்த ஒரு பெண் மயிலை வனத்துறையினர் மீட்டுள்ளனர். மயிலின் மரணத்திற்கான காரணம் குறித்து அவர்கள் தீவிர விசாரணை நடத்தி வருகின்றனர்.
சென்னை பல்கலைக்கழகத்தின் கிண்டி வளாகச் சுவருக்கு அருகில், ஒரு பெண் மயில் இறந்து கிடந்ததை அவ்வழியாகச் சென்ற சக்திவேல் என்பவர் கண்டறிந்தார். உடனடியாக அவர் கோட்டூர்புரம் போலீசாருக்குத் தகவல் கொடுத்தார். சம்பவ இடத்திற்கு விரைந்து வந்த போலீசார், வனத்துறைக்குத் தகவல் தெரிவித்தனர்.
இதையடுத்து, வனத்துறை ஊழியர் அர்ஜுன் நேரில் வந்து, இறந்து கிடந்த மயிலை ஆய்வு செய்தார். பின்னர், அவர் மயிலை மீட்டுச் சென்றார். மயிலின் உடலை உடற்கூறு ஆய்வு செய்து, அதன் இறப்புக்கான காரணத்தைக் கண்டறிய வனத்துறையினர் முடிவு செய்துள்ளனர். மின்சாரம் தாக்கியதா அல்லது வேறு ஏதேனும் காரணத்தால் இறந்ததா என்பது குறித்த விசாரணை நடைபெற்று வருகிறது.
