ஆந்திராவில் பெய்து வரும் கனமழையால் கலவகுண்டா அணை நிரம்பியது; உபரி நீர் திறப்பால் வெள்ள அபாயம்!
ஆந்திர மாநிலத்தின் கலவகுண்டா அணையிலிருந்து உபரி நீர் திறக்கப்பட்டுள்ளதால், வேலூர் மாவட்டத்தில் உள்ள பொன்னையாற்றில் வெள்ளப்பெருக்கு ஏற்பட வாய்ப்புள்ளது. இதனால், பொன்னை ஆற்றின் கரையோரம் வசிக்கும் மக்களுக்கு ஒலிபெருக்கி மூலம் வெள்ள அபாய எச்சரிக்கை விடுக்கப்பட்டுள்ளது.
ஆந்திரப் பிரதேசத்தில் உள்ள பகுடா ஆற்றின் நீர்ப்பிடிப்புப் பகுதிகளில் கடந்த சில நாட்களாகக் கனமழை பெய்து வருகிறது. இதன் காரணமாக, சித்தூர் அருகே உள்ள கலவகுண்டா அணை நிரம்பி, உபரி நீர் வெளியேற்றப்பட்டு வருகிறது. இந்த நீர் பொன்னை ஆற்றின் வழியே பயணிப்பதால், வேலூர் மாவட்டத்தின் கரையோர கிராமங்களுக்கு வெள்ள அபாயம் ஏற்பட்டுள்ளது.
வேலூர் மாவட்ட ஆட்சியர் சுப்புலட்சுமி நேற்று இரவு இது குறித்து அறிக்கை ஒன்றை வெளியிட்டார். அதில், பொன்னை, மாதாண்ட குப்பம், எருக்கம்பட்டு, வள்ளிமலை, மேல்பாடி, ஸ்ரீபாதநல்லூர், தேன்பள்ளி, குகையநல்லூர், மற்றும் திருவலம் ஆகிய கிராமங்களைச் சேர்ந்த மக்கள் ஆற்றங்கரைகளுக்குச் செல்வதைத் தவிர்க்க வேண்டும் எனவும், பாதுகாப்பான இடங்களுக்குச் செல்ல வேண்டும் எனவும் அறிவுறுத்தினார்.
இந்த எச்சரிக்கையின் அடிப்படையில், நேற்று எருக்கம்பட்டு கிராமத்தில் ஊராட்சி மன்றத் தலைவர் கோமதி சுதாகர் தலைமையில், கிராம நிர்வாக அலுவலர் திலீப் மற்றும் ஊராட்சிச் செயலர் பாரதி ஆகியோர் வீடு வீடாகச் சென்று ஒலிபெருக்கி மூலம் வெள்ள அபாய எச்சரிக்கையை விடுத்தனர். கலவகுண்டா அணையிலிருந்து திறக்கப்பட்ட நீரால் பொன்னையாற்றில் நீர்வரத்து அதிகரித்து வருவதாகத் தகவல்கள் தெரிவிக்கின்றன.
in
தமிழகம்
