Emmanuel Macron - Brigitte Macron: வயது ஒரு தடையா? ஆசிரியை-மாணவர் காதலுக்கு இடையூறாக நின்ற சவால்கள்! Is age a barrier? The challenging love story of a teacher and her student

பிரெஞ்சு அதிபர் இம்மானுவேல் மக்ரோன் மற்றும் அவரது மனைவி பிரிஜிட் மக்ரோன் காதலின் சுவாரஸ்யப் பயணம்!

பிரான்ஸ் நாட்டின் அதிபராக இருக்கும் இம்மானுவேல் மக்ரோன் மற்றும் அவரது மனைவி பிரிஜிட் மக்ரோன் ஆகியோரின் காதல் கதை, அரசியல் உலகில் பெரும் பரபரப்பை ஏற்படுத்திய ஒரு சுவாரஸ்யமான நிகழ்வு. ஆசிரியைக்கும் அவரது மாணவருக்கும் இடையே மலர்ந்த இந்தக் காதல், பல சவால்களை எதிர்கொண்ட ஒரு நீண்ட பயணமாகும்.

பிரிஜிட் மக்ரோன், 1993-ஆம் ஆண்டு, பிரான்ஸ் நாட்டில் உள்ள கத்தோலிக்கப் பள்ளி ஒன்றில் நாடக ஆசிரியராகப் பணியாற்றிக்கொண்டிருந்தார். அப்போது அவருக்கு வயது 39. அந்தப் பள்ளியில் படித்த இம்மானுவேல் மக்ரோனுக்கு அப்போது வயது 15. நாடக ஒத்திகையின்போது இருவருக்கும் இடையே ஏற்பட்ட நெருக்கம், பின்னர் காதலாக மலர்ந்தது. அப்போது திருமணமாகி மூன்று குழந்தைகளின் தாயாக இருந்த பிரிஜிட், இந்த உறவு குறித்துத் தயக்கம் காட்டினார்.

இந்தக் காதல் குறித்து அறிந்த இம்மானுவேல் மக்ரோனின் பெற்றோர்கள் கடும் அதிர்ச்சி அடைந்தனர். பிரிஜிட்-ஐச் சந்தித்து, தங்கள் மகனிடமிருந்து விலகி இருக்க வேண்டுமெனக் கேட்டுக்கொண்டனர். ஆனால், நான் உங்களுக்கு எந்த வாக்குறுதியும் தர முடியாது எனப் பிரிஜிட் தெரிவித்துள்ளார். 

பின்னர், மக்ரோனின் பெற்றோர்கள் அவரை பாரிஸில் உள்ள ஒரு உறைவிடப் பள்ளிக்கு அனுப்பி வைத்தனர். ஆனால், உங்களை நான் திருமணம் செய்துகொள்வேன் என மக்ரோன் பிரிஜிட்டிடம் உறுதியளித்ததாகக் கூறப்படுகிறது.

இம்மானுவேல் மக்ரோன் பாரிஸ் சென்ற பிறகும், பிரிஜிட் மீது கொண்ட காதல் குறையவில்லை. சுமார் 10 ஆண்டுகள் இருவரும் கடிதங்கள் மூலமும், தொலைபேசி வாயிலாகவும் தொடர்பில் இருந்துள்ளனர். 

பிரிஜிட் தனது குடும்பத்தின் நலனை கருத்தில் கொண்டு, இந்த உறவுக்கு ஒரு இடைவெளி கொடுத்தார். இருப்பினும், இம்மானுவேல் மீது தான் வைத்த காதல் உண்மையானது என்பதை உணர்ந்த பிறகு, 2006-ஆம் ஆண்டு தனது கணவரை விவாகரத்து செய்தார். 

பின்னர், 2007-ஆம் ஆண்டு, 29 வயதான இம்மானுவேல் மக்ரோன், 54 வயதான பிரிஜிட்-ஐத் திருமணம் செய்துகொண்டார். வயது வித்தியாசத்தைக் கடந்து, தங்கள் காதலின் ஆழத்தால் அவர்கள் உலகிற்கே ஓர் எடுத்துக்காட்டாகத் திகழ்கின்றனர்.