புதிய சட்டத்தால் டிரீம்11 வெளியேறிய நிலையில், பிசிசிஐ எடுத்த அதிரடி முடிவு; அப்போலோ டயர்ஸ் லோகோ இனி இந்திய ஜெர்சியில் மின்னும்!
இந்திய கிரிக்கெட் அணியின் புதிய ஜெர்சி ஸ்பான்சராக பிரபல வாகன டயர் தயாரிப்பு நிறுவனமான அப்போலோ டயர்ஸ் அதிகாரப்பூர்வமாக ஒப்பந்தம் செய்யப்பட்டுள்ளது. ஆன்லைன் விளையாட்டு தளமான டிரீம்11 உடனான ஒப்பந்தம், அரசின் புதிய சட்டங்களால் முடிவுக்கு வந்த நிலையில், இந்திய கிரிக்கெட் வாரியம் (பிசிசிஐ) இந்த அதிரடி முடிவை எடுத்துள்ளது. வர்த்தக உலகில் இது ஒரு முக்கிய நகர்வாகப் பார்க்கப்படுகிறது.
பிசிசிஐ வட்டாரங்கள் தெரிவித்துள்ள தகவலின்படி, அப்போலோ டயர்ஸ் நிறுவனத்துடனான இந்த ஒப்பந்தம் மூன்று ஆண்டுகளுக்கு கையெழுத்தாகி உள்ளது. இதன் மதிப்பு ரூ.579 கோடி என நிர்ணயிக்கப்பட்டுள்ளது. இது, டிரீம்11 உடன் செய்யப்பட்ட முந்தைய ஒப்பந்தத்தின் மதிப்பான ரூ.358 கோடியை விட மிக அதிகமாகும். இந்த மெகா ஒப்பந்தம், 121 இருதரப்பு கிரிக்கெட் போட்டிகள் மற்றும் 21 ஐசிசி போட்டிகளை உள்ளடக்கியது.
சமீபத்தில் மத்திய அரசு கொண்டு வந்த, `ஆன்லைன் விளையாட்டு ஊக்குவிப்பு மற்றும் ஒழுங்குமுறை சட்டம் 2025`-இன்படி, பணம் வைத்து விளையாடும் ஆன்லைன் விளையாட்டுகள் தடை செய்யப்பட்டதால், டிரீம்11 நிறுவனம் ஸ்பான்சர் பொறுப்பிலிருந்து விலகியது. இதைத் தொடர்ந்து, பிசிசிஐ புதிய ஸ்பான்சரைத் தேர்வு செய்வதற்கான டெண்டர்களை வெளியிட்டது. இதில், ஆன்லைன் சூதாட்டம், புகையிலை, மதுபானம் மற்றும் கிரிப்டோகரன்சி போன்ற நிறுவனங்கள் விலக்கப்பட்ட நிலையில், அப்போலோ டயர்ஸ் நிறுவனம் ஒப்பந்தத்தைப் பெற்றுள்ளது.
🚨 𝙉𝙀𝙒𝙎 🚨#TeamIndia 🤝 Apollo Tyres
— BCCI (@BCCI) September 16, 2025
BCCI announces Apollo Tyres as new lead Sponsor of Team India.
All The Details 🔽 @apollotyreshttps://t.co/dYBd2nbOk2
