மத்திய குற்றப்பிரிவு போலீசார் அதிரடி நடவடிக்கை; இதுவரை மொத்தம் 19 பேர் கைதாகியுள்ளனர்!
மதுரை மாநகராட்சியில் நடைபெற்ற ரூ.150 கோடி மதிப்பிலான வரி மோசடி வழக்கில், மேலும் நான்கு பேரை மத்திய குற்றப்பிரிவு காவல்துறையினர் இன்று கைது செய்து சிறையில் அடைத்தனர். இந்தச் சம்பவம் மாநகராட்சி ஊழியர்கள் மத்தியில் பெரும் அதிர்ச்சியை ஏற்படுத்தியுள்ளது.
இந்த வழக்கில், மண்டலம் 3-ன் கணிணி உதவியாளர் சங்கையா, மண்டலம் 4-ன் கணிணி உதவியாளர் பிரேம்குமார், பில்லிங் செக்ஷன் தற்காலிக ஊழியர் லீமா ரோஸ்மேரி, மற்றும் மற்றொரு கணிணி உதவியாளர் ராஜ்குமார் ஆகிய நான்கு பேரை போலீசார் இன்று கைது செய்தனர். இவர்கள் அனைவரும் இந்த வரி மோசடிக்கு உடந்தையாக இருந்ததாகக் குற்றம் சாட்டப்பட்டுள்ளது.
இந்த மோசடி தொடர்பாக மத்திய குற்றப்பிரிவு போலீசார் இதுவரை மேற்கொண்ட விசாரணையில், தற்போது வரை 19 பேர் கைது செய்யப்பட்டுள்ளனர். இந்த மோசடிக்கு மேலும் யார் யாருக்குத் தொடர்பு உள்ளது என்பது குறித்து தொடர்ந்து விசாரணை நடைபெற்று வருகிறது.
