<p><strong>TVK Vijay:</strong> தமிழக வெற்றிக் கழகத்தின் சில சட்டமன்ற உறுப்பினர்கள் அடுத்தடுத்து சர்ச்சையில் சிக்கும் சூழலில், முதலமைச்சர் விஜய் தலைமையில் ஆலோசனைக் கூட்டம் ஏற்பாடு செய்யப்பட்டுள்ளது.</p>
<h2>தவெக எம்.எல்.ஏக்கள் கூட்டம்:</h2>
<p>முதலமைச்சர் விஜய் தலைமையிலான தவெக அரசு அமைந்து ஆறு மாதங்கள் நிறைவடைந்துள்ள சூழலில், அக்கட்சியின் எம்.எல்.ஏக்கள் கூட்டத்திற்கு அழைப்பு விடுக்கப்பட்டுள்ளது. பனையூரில் உள்ள தவெக தலைமை அலுவகலத்தில் கட்சி தலைவர் விஜய் தலைமையில் நாளை இந்த ஆலோசனைக் கூட்டம் நடைபெற உள்ளது. இதில் அடுத்தடுத்து எழுந்து வரும் சர்ச்சைகள் மற்றும் அரசியல் நகர்வுகள் தொடர்பாக ஆலோசிக்கப்படும் என எதிர்பார்க்கப்படுகிறது. இதில் கட்சியை வலுப்படுத்துவது, எம்.எல்.ஏக்கள் கட்டுப்பாடுடனும், ஒழுக்கத்துடனும் செயல்பட்டு மக்களின் பிரச்னைகளுக்கு தீர்வு காண்பது தொடர்பாகவும் ஆலோசிக்கப்பட்டு, அறிவுறுத்தல்கள் வழங்கப்படும் என கூறப்படுகிறது.</p>
<p><iframe title="YouTube video player" src="https://www.youtube.com/embed/yZL5a70ol_E?si=MevPLEhT6KXH_mJY" width="560" height="315" frameborder="0" allowfullscreen="allowfullscreen"></iframe></p>
<h2><strong>அடுத்தடுத்து சர்ச்சையில் சிக்கும் எம்.எல்.ஏக்கள்:</strong></h2>
<p>மாற்றத்தை வழங்குவதாக ஆட்சிக்கு வந்த விஜய், முதலமைச்சராக சிறப்பாக செயல்பட்டு வருவதாக பாராட்டப்பட்டாலும், தவெக எம்.எல்.ஏக்களே பிரச்னைகளாக உருவெடுத்து தலைவலியை ஏற்படுத்தி வருகின்றனர். குறிப்பாக துணை சபாநாயகர் ரவிசங்கர் மற்றும் கள்ளக்குறிச்சி எம்.எல்.ஏ., அருள் விக்னேஷ் ஆகியோர் மீது எழுந்துள்ள புகார்கள் எதிர்க்கட்சிகளால் பூதாகரமாக்கப்பட்டுள்ளன.</p>
<h3>ரவிசங்கர் விவகாரம்:</h3>
<p>துறையூர் தொகுதி எம்.எல்.ஏவும், துணை சபாநாயகருமான ரவிசங்கர் கட்சியின் மாவட்ட செயலாளராகவும் உள்ளார். தனது பகுதியில் நிலவும் குடிநீர் பிரச்னை உள்ளிட்டவை தொடர்பாக பேச வந்த கார்த்திக்குமார் என்பவரை, துணை சபாநாயகர் தாக்கியதாக வெளியான வீடியோ சர்ச்சையை ஏற்படுத்தியுள்ளது. அதோடு, அந்த நபரை மிரட்டி தான் தாக்கப்படவில்லை என்ற வீடியோவை பதிவு செய்து வெளியிட்டதாகவும் கூறப்படுகிறது. இந்த விவகாரத்தில் கட்சியின் ஒழுங்கு நடவடிக்கை குழு விசாரணை நடத்த தவெக தலைமை உத்தரவிட்டுள்ளதாம்.</p>
<p><a title="Anbil Mahesh: 16 நாட்களாக சிறையில்..! அன்பில் மகேஷிற்கு இன்று ஜாமின் கிடைக்குமா? நீதிமன்ற தீர்ப்பு என்ன?" href="https://tamil.abplive.com/news/politics/chennai-special-court-will-deliver-judgement-on-dmk-ex-minister-anbil-mahesh-bail-petion-over-pvt-school-scam-case-tn-politics-279267" target="_self">இதையும் படியுங்கள்: Anbil Mahesh: 16 நாட்களாக சிறையில்..! அன்பில் மகேஷிற்கு இன்று ஜாமின் கிடைக்குமா? நீதிமன்ற தீர்ப்பு என்ன?</a></p>
<h3><strong>கலெக்டருக்கு ஆபாச குறுஞ்செய்தி?</strong></h3>
<p>இதனிடையே, கள்ளக்குறிச்சி தொகுதி தவெக எம்.எல்.ஏ-வான அருள் விக்னேஷ், மாவட்ட ஆட்சியருக்கு தவறான நோக்கத்தில் குறுஞ்செய்தி அனுப்பியதாகவும், மதுபோதையில் வீட்டிற்கே சென்று பிரச்னை செய்ததகாவும் சமூக வலைதளங்களில் தீவிரமாக பேசப்பட்டு வருகிறது. ஆனால், இந்த குற்றச்சாட்டு முற்றிலும் பொய்யானவை எனவும், திமுகவினரால் திட்டமிட்டு பரப்பப்படுவதாகவும் அருள் விக்னேஷ் விளக்கமளித்துள்ளார்.</p>
<h2><strong>முதலமைச்சர் வார்னிங்கா? ஆக்‌ஷனா?</strong></h2>
<p>பொதுவாக <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a>வில் எம்.எல்.ஏக்களின் ஆலோசனைக் கூட்டம் என்.ஆனந்த் தலைமையிலேயே நடைபெறும். ஆனால், நாளைய கூட்டம் முதலமைச்சர் விஜய் தலைமையிலேயே நேரடியாக நடைபெற உள்ளதாக கூறப்படுகிறது. இதனால் அடுத்தடுத்து அரங்கேறியுள்ள சம்பவங்கள் முதலமைச்சருக்கு அதிருப்தியை ஏற்படுத்தியுள்ளது என்பது ஊர்ஜிதமாகிறது. எனவே, சட்டமன்ற உறுப்பினர்களுக்கு கட்சி தலைமை சார்பில் கடும் எச்சரிக்கை வழங்கப்படும் என கூறப்படுகிறது. அதோடு, ஒழுங்கு நடவடிக்கை மூலம் சிலரின் மீது தீவிரமான நடவடிக்கைகளும் பாயலாம் என எதிர்பார்க்கப்படுகிறது. ஏற்கனவே, என்ன பிரச்னை கிடைக்கும் என ஒட்டுமொத்த எதிர்க்கட்சிகளும் தீவிரமாக கண்காணித்து வரும் நிலையில், சொந்த கட்சியினரே இப்படி சர்ச்சைகளை ஏற்படுத்துவதை <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> சுத்தமாக விரும்பவில்லையாம். இதனால் நாளைய கூட்டம் காரசாரமாகவும், காட்டமாகவும் இருக்கும் என பனையூர் வட்டாரங்கள் தெரிவிக்கின்றன.</p>
Source: Read Full Article
