
<p><strong>TN Govt Vellore Investment:</strong> டாசே க்ளோபல் நிறுவனம் வேலூரில் செமிகன்டக்டர் ஆலையை நிறுவ, தமிழ்நாடு அரசின் ஒப்புதலுக்காக காத்திருக்கிறதாம்.</p>
<h2><strong>வேலூரில் செமிகன்டக்டர் ஆலை: </strong></h2>
<p>சென்னையைத் தலைமையிடமாகக் கொண்டு அமெரிக்காவிலும் செயல்பட்டு வரும் Tase Global நிறுவனம், வேல்யூகுவெஸ்ட் நிறுவனத்திடமிருந்து அண்மையில் ரூ.300 கோடி நிதியுதவியைப் பெற்றது. இதையடுத்து விண்வெளி மற்றும் மருத்துவ சாதனங்கள் துறையை உள்ளடக்கிய ரூ.1,000 கோடி விரிவாக்கப் பணிகளை மேற்கொள்ள அந்நிறுவனம் திட்டமிட்டுள்ளது. இதோடு செமிகன்டக்டர் துறையிலும் தனது பயணத்தை தொடங்க, வேலூரில் உள்ள 360 ஏக்கர் நிலப்பகுதிக்கு மாநில அரசின் ஒப்புதலை நாடியுள்ளதாம்.</p>
<p><iframe title="YouTube video player" src="https://www.youtube.com/embed/UkRBxtiU8tA?si=0p16diPgH17CJzZo" width="560" height="315" frameborder="0" allowfullscreen="allowfullscreen"></iframe></p>
<p>நடப்பு ஆண்டில் நிறுவனத்தின் செமிகன்டக்டர் வணிகம் வளர்ச்சி காணும் என எதிர்பார்க்கப்படுகிறது. இதற்காக, ஒரு புதிய கட்டுப்பாட்டு அறையை அமைத்து, சிறப்புத் தயாரிப்பு வரிசை ஆதரவிற்காக இரண்டு முதல் மூன்று பெரிய உலகளாவிய அசல் உபகரண உற்பத்தியாளர்களுடன் பேச்சு நடத்தி வருகிறது. இந்தப் புதிய பிரிவிலிருந்து வருவாய் 2028-ஆம் ஆண்டின் மூன்றாம் காலாண்டில் வரத் தொடங்கும் என எதிர்பார்க்கப்படுகிறது.</p>
<h2><strong>18 மாதங்களில் இரட்டிப்பாக்க இலக்கு</strong></h2>
<p> Tase Global நிறுவனத்தின் நிறுவனர், தலைவர் மற்றும் தலைமைச் செயல் அதிகாரியான சங்கர் ராமன் வைத்தியநாதன் இதுகுறித்து பேசுகையில், "உலகின் முதல் ஐந்து முன்னணி நிறுவனங்களில் ஒன்று விரைவில் சென்னைக்கு வரவுள்ளது. குறிப்பிட்ட தயாரிப்பு வரிசை ஆதரவை வழங்குவதற்காக, இரண்டு முதல் மூன்று மிகப்பெரிய உண்மையான உபகரண உற்பத்தி நிறுவனங்களுடன் நாங்கள் பேச்சுவார்த்தை நடத்தி வருகிறோம். செமிகன்டக்டர் துறையில் ஒரு முதல் நிலை உற்பத்தி நிறுவனத்துடனான கூட்டு முயற்சி, நிறுவனத்தின் திட்டங்களுக்கு மேலும் உத்வேகம் அளிக்கும் என எதிர்பார்க்கப்படுகிறது. இந்தக் கூட்டாண்மை 18 மாதங்களில் வணிகத்தை இரட்டிப்பாக்க உதவும் என்றும், அதன் பிறகு வளர்ச்சி மேலும் வேகமெடுக்கும் என்றும்” நம்புவதாக வைத்தியநாதன் தெரிவித்துள்ளார்.</p>
<p><a title="Gold Rate: 11 மாத காத்திருப்பு..! ரூ.1 லட்சத்திற்கும் கீழ் சரிந்த தங்கம் விலை - ஒரு சவரன், கிராம் எவ்வளவு தெரியுமா?" href="https://tamil.abplive.com/business/after-11-months-one-sovereign-gold-rate-dropped-below-one-lakh-know-today-gold-silver-price-today-279909" target="_self">இதையும் படியுங்கள்: Gold Rate: 11 மாத காத்திருப்பு..! ரூ.1 லட்சத்திற்கும் கீழ் சரிந்த தங்கம் விலை - ஒரு சவரன், கிராம் எவ்வளவு தெரியுமா?</a></p>
<h2><strong>வேலூர் தேர்வு செய்யப்பட்டது ஏன்?</strong></h2>
<p>முன்மொழியப்பட்ட வேலூர் ஆலை என்பது, நிறுவனத்தின் அனைத்து வணிகப் பிரிவுகளிலும் அதன் விரிவாக்கத்திற்கு ஆதரவளிக்கும். திறமையான மனிதவளம் கிடைப்பது, குறைந்த இயக்கச் செலவுகள் மற்றும் தமிழ்நாட்டின் உற்பத்தித் தளம் ஆகியவற்றை கருத்தில் கொண்டு, அந்நிறுவனம் தனது அடுத்தகட்ட வளர்ச்சிக்காக சென்னையை தாண்டி புதிய தளத்தை தேடியுள்ளது.</p>
<h2><strong>ஆலை விரிவாக்க திட்டம்</strong></h2>
<p>ரூ. 450 கோடி மதிப்புள்ள இந்த நிறுவனம் தற்போது தனது வருவாயில் 65-67% விண்வெளித் துறையிலிருந்தும், மீதமுள்ள வருவாயை மருத்துவ சாதனங்கள் துறையிலிருந்தும் பெறுகிறது. சென்னையில், Tase Global நிறுவனம் தனது ஸ்ரீபெரும்புதூர் ஆலையில் ஒரு லட்சம் சதுர அடி பரப்பளவைச் சேர்க்கிறது இதில் 70,000 சதுர அடி உற்பத்திப் பணிகளுக்காக ஒதுக்கப்பட்டுள்ளது. விரிவாக்கப்பட்ட இந்த ஆலை வரும் ஜனவரி மாதம் திறக்கப்படும் என எதிர்பார்க்கப்படுகிறது. மேலும் விரிவாக்கத்திற்காக ஸ்ரீபெரும்புதூருக்கு அருகில் 15 ஏக்கர் நிலத்தையும் இந்நிறுவனம் தேடி வருகிறது.</p>
<h2><strong>தமிழ்நாடு தேர்வானது எப்படி?</strong></h2>
<p>ஹிந்துஸ்தான் எரோநாட்டிகல் லிமிடெட் உருவாக்கிய சூழலமைப்பால் பயனடைந்த பெங்களூருவைப் போலல்லாமல், ஒரு முக்கிய விண்வெளி மையமாக உருவெடுப்பதற்குத் தமிழ்நாடு தனது உற்பத்தித் திறன்களை முழுமையாகப் பயன்படுத்திக்கொள்ளவில்லை என்று வைத்தியநாதன் கவலை தெரிவித்துள்ளார். ஆனால், தமிழ்நாட்டின் நிலையான தொழிலாளர் சக்தி, அதிலுள்ள தகவல் தொழில்நுட்பம் மற்றும் உற்பத்தித் திறன் ஆகியவற்றின் காரணமாகவே, நாங்கள் இங்கு இருக்க வேண்டும் எனத் திட்டமிட்டுள்ளோம் என சுட்டிக்காட்டியுள்ளார்.</p>
<h2><strong>சர்வதேச அளவில் தாக்கம்:</strong></h2>
<p>ஹனிவெல், காலின்ஸ் ஏரோஸ்பேஸ், ஜிஇ, ஈட்டன் மற்றும் ரோச் உள்ளிட்ட உலகளாவிய வாடிக்கையாளர்களுக்குச் சேவை வழங்கும் இந்நிறுவனம், தனது துல்லியமான உலோக ஒருங்கிணைப்புத் திறன்களை வலுப்படுத்துவதற்காக, அமெரிக்காவைச் சேர்ந்த ஜாயின்ட் அலாய்ஸ் நிறுவனத்தை அக்டோபர் 2025-ல் ரூ. 106 கோடிக்குக் கையகப்படுத்தியது. வேல்யூகுவெஸ்ட் நிறுவனத்திடமிருந்து சமீபத்தில் கிடைத்த ரூ. 300 கோடி நிதியுதவி உறுதிப்பாட்டில், ரூ. 200 கோடி தற்போதைய விரிவாக்கம் மற்றும் செயல்பாட்டு மூலதனத்திற்காகப் பயன்படுத்தப்படும், மீதமுள்ள தொகைக்கு அமெரிக்க வெளிநாட்டு முதலீட்டுக் குழுவின் (CFIUS) ஒப்புதல் தேவைப்படுகிறது.</p>
Source: Read Full Article