<p><strong>Delhi Anti-CEC Rally:</strong> டெல்லி ராம் லீலா மைதானத்தில் நடைபெறும் பேரணிக்காக நான்காயிரம் போலீசார் பாதுகாப்பு பணியில் ஈடுபடுத்தப்பட்டுள்ளனர்.</p>
<h2><strong>டெல்லியில் எதிர்க்கட்சிகள் இன்று பிரமாண்ட பேரணி:</strong></h2>
<p>தலைநகர் டெல்லி இன்று ஒரு மாபெரும் போராட்டத்திற்கு தயாராகி வருவதாக கூறப்படுகிறது. காங்கிரஸ் மூத்த தலைவர் ராகுல் காந்தி தலைமையில், எதிர்க்கட்சிகளை சேர்ந்த சுமார் 10 லட்சம் பேர் இன்று ராம் லீலா மைதானத்தில் திரள வாய்ப்புள்ளதாம். போராட்டத்தை நெறிப்படுத்தவும், பொதுமக்களின் பாதுகாப்பை உறுதி செய்யவும் அங்கு சுமார் நான்காயிரம் போலீசார் குவிக்கப்பட்டுள்ளனர். தேர்தல் நடைமுறையில் முறைகேடுகள் நடைபெற்றுள்ளதாகவும், அதற்கு பொறுப்பேற்று தலைமை தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்தியும் இந்த போராட்டம் முன்னெடுக்கப்பட்டுள்ளது குறிப்பிடத்தக்கது. சிறப்பு வாக்காளர் திருத்தப் பணிகளின் போது அதிகப்படியான வாக்காளர்கள் பெயர்கள் நீக்கப்பட்டதாகவும், அதன் மூலம் வாக்குகள் திருடப்பட்டதாகவும் எழுந்த குற்றச்சாட்டின் அடிப்படையில் இந்த போராட்டம் முன்னெடுக்கப்பட்டுள்ளது.</p>
<p><iframe title="YouTube video player" src="https://www.youtube.com/embed/8CdwXLZFVm8?si=a6d_dVV8TWencSwc" width="560" height="315" frameborder="0" allowfullscreen="allowfullscreen"></iframe></p>
<h2><strong>குவியும் ஆதரவு - மாலை 5 மணி வரை பேரணி:</strong></h2>
<p>'சலோ டெல்லி' என்ற தலைப்பிலான பேரணி மின்டோ சாலை-கன்னாட் பிளேஸ் சந்திப்பிலிருந்து ராம்லீலா மைதானம் வரை நீடிக்கும். இந்த பேரணி மாலை 5 மணி வரை தொடரும் எனத் திட்டமிடப்பட்டுள்ளது. எதிர்க்கட்சிகளை சேர்ந்த கூட்டணி தலைவர்கள், காங்கிரஸ் தலைவர் மல்லிகார்ஜுன் கார்கேவின் இல்லத்திலிருந்து பேரணி தொடங்கும் இடத்திற்கு திறந்த பேருந்துகளில் பயணிப்பார்கள் என எதிர்பார்க்கப்படுகிறது. இந்தப் போராட்டம், எதிர்க்கட்சிகளின் தலைவர்களையும் ஆதரவாளர்களையும், மாணவர் குழுக்களையும், சமூக அமைப்புகளையும் ஒன்றிணைக்கும் என எதிர்பார்க்கப்படுகிறது. மாணவர்கள், இளைஞர்கள், பெண்கள் மற்றும் தொழிலாளர்கள் பங்கேற்க வேண்டும் என எதிர்க்கட்சிகளின் கூட்டணி வேண்டுகோள் விடுத்துள்ளது. கரப்பான்பூச்சி ஜனதா கட்சி மற்றும் பல மாணவர் அமைப்புகளும் இந்த பேரணிக்கு ஆதரவு அளித்துள்ளன.</p>
<p><a title="TN Weather News: சென்னைக்கு அருகே இன்று உருவாகிறது தீவிர புயல் - தமிழ்நாட்டில் எங்கெல்லாம் கனமழை? வானிலை" href="https://tamil.abplive.com/news/tamil-nadu/tamilnadu-rain-alert-chennai-weather-forecast-tn-today-meteorological-department-warning-november-1st-severe-cyclonic-storm-alert-278650" target="_self">இதையும் படியுங்கள்: TN Weather News: சென்னைக்கு அருகே இன்று உருவாகிறது தீவிர புயல் - தமிழ்நாட்டில் எங்கெல்லாம் கனமழை? வானிலை</a></p>
<h2><strong>4,000 போலீசார், 200 சிசிடிவி கேமராக்கள்</strong></h2>
<p>பேரணியில் சுமார் 10 லட்சம் பேர் பங்கேற்பார்கள் என கணிக்கப்பட்டுள்ள நிலையில், டெல்லி காவல்துறை சுமார் 50,000 பேர் வருவார்கள் என எதிர்பார்க்கிறது. மைதானம் காலியாக இருக்கும்போது 45,000 முதல் 50,000 பேர் வரை அமரக்கூடிய வசதியை கொண்டுள்ளது. நாற்காலிகள், தடுப்புகள் மற்றும் நடைபாதைகள் அமைக்கப்பட்ட பிறகு, அதன் கொள்ளளவு சுமார் 30,000 முதல் 40,000 ஆகக் குறையும். உள்ளே அதிகப்படியான கூட்டம் கூடுவதைத் தவிர்க்க, மைதானத்திற்கு வெளியே கூடுதல் இடம் ஒதுக்கப்படும். 4,000-க்கும் மேற்பட்ட காவல்துறைப் பணியாளர்கள், மத்திய ஆயுதக் காவல் படை நிறுவனங்களுடன் இணைந்து, பேரணி செல்லும் பாதை நெடுகிலும் மற்றும் நிகழ்ச்சி நடைபெறும் இடத்திலும் பணியில் ஈடுபடுத்தப்பட்டுள்ளனர். ராம்லீலா மைதானம் 14 பாதுகாப்பு மண்டலங்களாகப் பிரிக்கப்பட்டுள்ளது. ஒவ்வொரு மண்டலமும் காவல் உதவி ஆணையர் தரத்திலான அதிகாரியால் கண்காணிக்கப்பட்டு வருகிறது. கண்காணிப்புப் பணிகளுக்காக 200-க்கும் மேற்பட்ட சிசிடிவி கேமராக்கள், ட்ரோன்கள் மற்றும் உடலில் அணியும் கேமராக்கள் பயன்படுத்தப்படுகின்றனர். இந்த ஏற்பாடுகளைக் கண்காணிப்பதற்காக மைதானத்திற்குள் ஒரு கட்டுப்பாட்டு அறையும் அமைக்கப்பட்டுள்ளது.</p>
<h2><strong>டெல்லியில் போக்குவரத்து கட்டுப்பாடுகள்:</strong></h2>
<p>எதிர்க்கட்சிகளின் போராட்டத்தை தொடர்ந்து டெல்லியின் சில பகுதிகளில் காலை 10 மணி முதல் மாலை 5 மணி வரை போக்குவரத்து கட்டுப்பாடுகள் அமலில் இருக்கும் என அறிவிக்கப்பட்டுள்ளது. ஐ.டி.ஓ, டெல்லி கேட், ராஜ்காட், அஜ்மேரி கேட் மற்றும் துர்க்மான் கேட் உள்ளிட்ட முக்கிய சந்திப்புகளில் மாற்றுப்பாதைகள் அமைக்கத் திட்டமிடப்பட்டுள்ளன. பகதூர் ஷா ஜாஃபர் மார்க், ஜவஹர்லால் நேரு மார்க், மின்டோ சாலை மற்றும் தேஷ் பந்து குப்தா சாலை ஆகியவற்றைத் தவிர்க்குமாறு பயணிகள் அறிவுறுத்தப்பட்டுள்ளனர். ஆம்புலன்ஸ்கள் மற்றும் அவசரகால வாகனங்கள் எல்.என்.ஜே.பி மற்றும் ஜி.பி. பந்த் மருத்துவமனைகளைச் சென்றடைவதை உறுதிசெய்ய சிறப்பு ஏற்பாடுகள் செய்யப்படும். டெல்லி ரயில் நிலையத்திற்குப் பயணம் செய்யும் பயணிகள் தங்களது பயணங்களை முன்கூட்டியே திட்டமிடுமாறும் அறிவுறுத்தப்பட்டுள்ளனர்.<br />ராம்லீலா மைதானத்தில் பேரணி நடத்த அனுமதி வழங்கப்பட்டுவிட்டதாகவும், ஆனால் மின்டோ சாலை-கன்னாட் பிளேஸ் சந்திப்பிலிருந்து முன்மொழியப்பட்ட ஊர்வலத்திற்கான விண்ணப்பம் எதுவும் தங்களுக்கு வரவில்லை என்றும் டெல்லி காவல்துறை தெரிவித்துள்ளது.</p>
Source: Read Full Article
