<p style="text-align: justify;">தஞ்சாவூர்: தஞ்சாவூர் அருகே நத்தமாடிப்பட்டி பகுதியில் இயற்கை சீற்றம், தண்ணீர் பற்றாக்குறை, சாகுபடி பாதிப்பு என அடுத்தடுத்து ஏற்பட்ட இழப்புகளால் ஏற்கனவே பொருளாதார நெருக்கடியில் சிக்கித் தவிக்கும் விவசாயிகளுக்கு தற்போது குரங்குகளின் அட்டகாசம் புதிய தலைவலியாக மாறியுள்ளது. </p>
<p style="text-align: justify;">விவசாயிகள் பெரும் நம்பிக்கையுடன் வளர்த்து வரும் தென்னை மரங்களில் ஏறி, இளநீர்களைப் பறித்து சேதப்படுத்தி வருவதால் கண்ணெதிரே விவசாயிகளின் உழைப்பு வீணாகும் அவலநிலை ஏற்பட்டுள்ளது. ஏற்கனவே சாகுபடியில் ஏற்பட்ட நஷ்டத்தை ஈடுகட்ட முடியாமல் தவித்து வரும் நிலையில், தென்னந்தோப்புகளையும் குரங்குகள் விட்டுவைக்காததால் விவசாயிகள் செய்வதறியாது திகைத்து வருகின்றனர்.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/11/13/3a1fd897af2760bf749ab383ff0063a01794530007947733_original.jpg" /></p>
<p style="text-align: justify;">தஞ்சாவூர் மாவட்டம், நத்தமாடிப்பட்டி கிராமத்தில் ஏராளமான விவசாயிகள் விவசாயத்தை பிரதான வாழ்வாதாரமாகக் கொண்டு வாழ்ந்து வருகின்றனர். குறிப்பாக இப்பகுதி விவசாயிகள் கல்லணைக்கால்வாயில் திறக்கப்படும் தண்ணீரை நம்பியே நெல் சாகுபடியில் ஈடுபட்டு வருகின்றனர். </p>
<p style="text-align: justify;">ஆண்டுதோறும் குறுவை, சம்பா என இருபோக சாகுபடியை மேற்கொண்டு அதன் மூலம் கிடைக்கும் வருமானத்தைக் கொண்டு குடும்பச் செலவுகள், குழந்தைகளின் கல்வி, விவசாயக் கடன் உள்ளிட்ட பல்வேறு தேவைகளைச் சமாளித்து வருகின்றனர். ஆனால், நடப்பாண்டு பருவநிலை மாற்றம் மற்றும் பாசன நீர் கிடைப்பதில் ஏற்பட்ட தாமதம் விவசாயிகளின் திட்டங்களை முற்றிலும் புரட்டிப் போட்டுள்ளது.</p>
<p style="text-align: justify;">குறிப்பாக, வழக்கமான கால அட்டவணைப்படி மேட்டூர் அணை திறக்கப்படாததால் குறுவை சாகுபடியை உரிய நேரத்தில் மேற்கொள்ள முடியாமல் பல விவசாயிகள் கடுமையாகப் பாதிக்கப்பட்டனர். இதனால் குறுவை சாகுபடியை நம்பியிருந்த விவசாயிகளுக்கு எதிர்பார்த்த வருமானம் கிடைக்காமல் போனது. இதற்கிடையே காலதாமதமாக கடந்த செப்டம்பர் 1-ஆம் தேதி மேட்டூர் அணையில் இருந்து தண்ணீர் திறக்கப்பட்டதைத் தொடர்ந்து, விவசாயிகள் சம்பா சாகுபடியில் ஆர்வத்துடன் ஈடுபடத் தொடங்கினர்.</p>
<p style="text-align: justify;">இருப்பினும், தாமதமான தண்ணீர் திறப்பு, பருவநிலை மாற்றங்கள், மழையின் தாக்கம் உள்ளிட்ட காரணங்களால் சம்பா பயிர்கள் முழுமையாக விளைச்சல் தருமா என்ற கவலை விவசாயிகளைத் தொடர்ந்து வாட்டி வருகிறது.</p>
<p style="text-align: justify;">ஒருபுறம் நெல் சாகுபடியில் ஏற்பட்ட பாதிப்பு, மறுபுறம் விவசாயத்திற்காக வாங்கிய கடன் என பொருளாதார ரீதியாகப் பல்வேறு சிக்கல்களைச் சந்தித்து வரும் விவசாயிகளுக்கு தென்னை மரங்கள்தான் ஓரளவுக்கு ஆறுதலாக இருந்து வந்தன. நெல் சாகுபடி கை கொடுக்காவிட்டாலும், பல ஆண்டுகள் பலன் தரக்கூடிய தென்னை மரங்கள் குடும்பத்தின் அன்றாட வருமானத்திற்கு உதவும் என்ற நம்பிக்கையில் விவசாயிகள் அவற்றைப் பராமரித்து வருகின்றனர்.</p>
<p style="text-align: justify;">குறிப்பாக, இளநீர் மற்றும் தேங்காய் விற்பனை மூலம் கிடைக்கும் வருமானம் விவசாயிகளின் குடும்பச் செலவுகளுக்கும் விவசாயப் பணிகளுக்கும் ஓரளவு கைகொடுத்து வந்தது. ஆனால், தற்போது அந்த நம்பிக்கையிலும் குரங்குகள் மண் அள்ளிப் போட்டுள்ளன.</p>
<p style="text-align: justify;">நத்தமாடிப்பட்டி மற்றும் அதன் சுற்றுவட்டாரப் பகுதிகளில் உள்ள தென்னந்தோப்புகளுக்கு கூட்டம் கூட்டமாக வரும் குரங்குகள், தென்னை மரங்களில் சர்வசாதாரணமாக ஏறி முற்றாத இளநீர்களைப் பறித்து வருகின்றன. அவற்றைக் குடிப்பதற்காகக் குரங்குகள் இளநீரைச் சேதப்படுத்துவதுடன், முழுமையாகக் குடிக்காமலேயே பாதியிலேயே கீழே வீசி எறிந்து விடுகின்றன. </p>
<p style="text-align: justify;">இதனால் விற்பனைக்குத் தயாராக வேண்டிய இளநீர்கள் மரத்திலிருந்து பறிக்கப்பட்டு வீணாகின்றன. ஒரு மரத்தில் மட்டுமல்லாமல், அடுத்தடுத்து உள்ள மரங்களிலும் ஏறி குரங்குகள் அட்டகாசம் செய்வதால் தென்னந்தோப்புகளில் கணிசமான அளவில் இளநீர் சேதமடைந்து வருகிறது.</p>
<p style="text-align: justify;">பல மாதங்களாகத் தண்ணீர் பாய்ச்சி, உரமிட்டு, பூச்சித் தாக்குதல்களில் இருந்து பாதுகாத்து, இரவு பகலாகப் பராமரித்து வளர்த்த தென்னை மரங்களில் இருந்து கிடைக்க வேண்டிய பலன் இவ்வாறு வீணாவதைப் பார்த்து விவசாயிகள் மனவேதனை அடைந்துள்ளனர். குறிப்பாக, இளநீர் விற்பனை மூலம் வருமானம் கிடைக்கும் என்று எதிர்பார்த்திருந்த நிலையில், குரங்குகளின் அட்டகாசம் அந்த வருமானத்தையே கேள்விக்குறியாக்கியுள்ளது.</p>
<p style="text-align: justify;">ஏற்கனவே விவசாயப் பணிகளுக்காகச் செலவிட்ட தொகையைக்கூட திரும்பப் பெற முடியாத நிலையில் இருக்கும் விவசாயிகளுக்கு இந்தச் சேதம் கூடுதல் பொருளாதாரச் சுமையை ஏற்படுத்தியுள்ளது. இதுகுறித்து விவசாயிகள் கூறுகையில், ஏற்கனவே தண்ணீர் பற்றாக்குறை மற்றும் பருவநிலை மாற்றத்தால் நெல் சாகுபடியில் பெரும் பாதிப்பைச் சந்தித்துள்ளோம். குறுவை சாகுபடியை இழந்த நிலையில், சம்பா சாகுபடியாவது கைகொடுக்கும் என்ற நம்பிக்கையில் காத்திருக்கிறோம்.</p>
<p style="text-align: justify;">விவசாயத்திற்காக வாங்கிய கடன்களையும் அடைக்க முடியாமல் தவித்து வருகிறோம். இந்தச் சூழலில் தென்னை மரங்களில் கிடைக்கும் இளநீர், தேங்காய் மூலமாகக் கிடைக்கும் வருமானம்தான் ஓரளவுக்கு குடும்பத்தைக் காப்பாற்றி வருகிறது. ஆனால், தற்போது குரங்குகள் கூட்டம் கூட்டமாக வந்து இளநீர்களைப் பறித்துக் குடித்துவிட்டு கீழே வீசி எறிந்து சேதப்படுத்துகின்றன. இதனால் எங்களது உழைப்பும் முதலீடும் வீணாகி வருகின்றன. ஏற்கனவே நஷ்டத்தில் இருக்கும் எங்களுக்கு இதுவும் மிகப்பெரிய பாதிப்பாக உள்ளது என வேதனையுடன் தெரிவித்தனர்.</p>
<p style="text-align: justify;">எனவே, விவசாயிகளின் வாழ்வாதாரத்தைப் பாதிக்கும் வகையில் தொடர்ந்து அட்டகாசம் செய்து வரும் குரங்குகளைக் கட்டுப்படுத்த வனத்துறை அதிகாரிகள் உடனடியாக நடவடிக்கை எடுக்க வேண்டும் என்றும், நத்தமாடிப்பட்டி பகுதிக்கு நேரில் வந்து தென்னந்தோப்புகளில் ஏற்பட்டுள்ள சேதங்களை ஆய்வு செய்ய வேண்டும் என்றும் விவசாயிகள் கோரிக்கை விடுத்துள்ளனர். </p>
<p style="text-align: justify;">மேலும், குரங்குகளைப் பாதுகாப்பான முறையில் பிடித்து, உரிய விதிமுறைகளைப் பின்பற்றி அடர்ந்த வனப்பகுதிகளில் விடுவதற்கான நடவடிக்கைகளை மேற்கொள்ள வேண்டும் என்றும் வலியுறுத்தியுள்ளனர். உள்ளாட்சி நிர்வாகமும் வனத்துறையும் இணைந்து இப்பிரச்சினைக்கு நிரந்தரத் தீர்வு காண வேண்டும் என்பதே அப்பகுதி விவசாயிகளின் எதிர்பார்ப்பாக உள்ளது.</p>
<p style="text-align: justify;">இயற்கையின் கோரப்பிடியிலும், தண்ணீர் பற்றாக்குறையிலும் சிக்கித் தவிக்கும் விவசாயிகளுக்கு தற்போது குரங்குகளின் தொல்லையும் சேர்ந்திருப்பது பெரும் சோகத்தை ஏற்படுத்தியுள்ளது. விவசாயத்தை நம்பி வாழும் குடும்பங்களின் வாழ்வாதாரம் மேலும் பாதிக்கப்படுவதற்கு முன்பாக சம்பந்தப்பட்ட அதிகாரிகள் விரைந்து நடவடிக்கை எடுக்க வேண்டும் என்பதே நத்தமாடிப்பட்டி விவசாயிகளின் ஒட்டுமொத்த கோரிக்கையாக உள்ளது.</p>
Source: Read Full Article
