<p>திமுக என்பது கொள்கைகளால் கட்டமைக்கப்பட்ட கட்சி என்று அக்கட்சியின் நிர்வாகிககளும், தலைவர்களும் பெருமையுடன் கூறுவார்கள். பெரியாருடன் ஏற்பட்ட கருத்து வேறுபாட்டால் அண்ணா திமுக-வைத் தொடங்கினாலும், அவரை கொள்கைத் தலைவராக கொண்டே தற்போது வரை திமுக இயங்கி வருகிறது.</p>
<h2><strong>துரைமுருகன் இல்ல திருமண விழா:</strong></h2>
<p>திமுக-வின் கடவுள் மறுப்புக் கொள்கையையும், திராவிடத்தையும் மிகப்பெரிய அளவில் கொள்கையாக கொண்ட கட்சியாக உள்ளது. அந்த கட்சியின் மூத்த தலைவரும், அக்கட்சியின் பொதுச்செயலாளருமான துரைமுருகனின் பேத்தி திருமணம் நேற்று சென்னையில் பிரம்மாண்டமாக நடந்தது. </p>
<p>இந்த திருமணத்தில் வேதங்கள் முழங்க துரைமுருகன் பேத்தி செந்தாமரை - தீபக் ரவி ஆகியோர் திருமணம் நடந்துள்ளது. திருமணத்திற்கு அனைவரும் வாழ்த்து கூறியிருந்தாலும், பெரியார் இயக்க அமைப்பினர், பெரியாரிஸ்ட்கள் வேதங்கள் முழங்க திமுக தலைவர் வீட்டிலே திருமணம் நடந்ததற்கு கண்டனங்களைத் தெரிவித்து வருகின்றனர்.</p>
<h2><strong>மேடையில் கடவுள் மறுப்பு; வீட்டிற்குள்ளே வேதங்களா?</strong></h2>
<p>மேடைகள் தோறும் கடவுள் மறுப்புக் கொள்கையை பேசிவிட்டு, சமஸ்கிருத மொழிக்கு எதிராகவும் பேசிவிட்டு தற்போது தங்கள் வீட்டு விசேஷத்திற்கு மட்டும் இதுபோன்று வேதங்கள் முழங்க திருமணம் செய்யலாமா? என்று சரமாரி கேள்வி எழுப்பி வருகின்றனர்.</p>
<p>கருணாநிதியுடன் தொடக்க காலம் முதல் பயணித்தவர், மு.க.ஸ்டாலினுடனும் பயணித்தவர், உதயநிதியை வளர்த்தவர் என்று துரைமுருகன் திமுக-வின் தூணாக 1971ம் ஆண்டு முதல் திமுக-வில் இருந்து பயணிக்கிறார். 10 முறை சட்டமன்ற உறுப்பினராக இருந்த துரைமுருகன் மேடை ஒன்றில் சமஸ்கிருதம் செத்துப்போன மொழி என்று விமர்சித்துப் பேசியிருப்பார். </p>
<h2><strong>இரட்டை வேடமா?</strong></h2>
<p>ஆனால், தற்போது அவரது இல்ல திருமண விழாவில் சமஸ்கிருதங்களை ஐயர்கள் முழங்க அவரது பேத்தி திருமணம் நடந்துள்ளது. இவை இரண்டையும் ஒப்பிட்டு அவரை விமர்சித்து வருகின்றனர். ஓட்டுக்காக இரட்டை வேடமா? என்று துரைமுருகனையும், திமுக-வையும் விமர்சித்து வருகின்றனர்.</p>
<p>தற்போதைய நிலவரப்படி, திமுக-வின் பொதுச்செயலாளர் துரைமுருகனே அக்கட்சியின் மூத்த தலைவர் ஆவார். ஆனால், கருணாநிதியுடன் அரை நூற்றாண்டுக்கும் மேலாக பயணித்த அவரே தனது இல்லத் திருமண விழாவில் பெரியார் கொள்கைக்கு எதிராக செயல்படலாமா? என்று பெரியாரிஸ்ட்கள் பலரும் திமுக-வை விமர்சித்து வருகின்றனர்.</p>
<h2><strong>விமர்சனம்:</strong></h2>
<p>எதிர்க்கட்சிகள் பலரும் திமுக தலைவர்கள் இந்த விவகாரத்தில் இரட்டை வேடம் போடுவதாக தொடர்ந்து விமர்சித்து வருகின்றனர். திமுக தலைவர் மு.க.ஸ்டாலின் கடவுள் மறுப்பு கொள்கை கொண்டவராக இருந்தாலும், அவரது மனைவி துர்கா <a title="ஸ்டாலின்" href="https://tamil.abplive.com/topic/mk-stalin" data-type="interlinkingkeywords">ஸ்டாலின்</a> தீவிர இறைபக்தி கொண்டவர். இந்த விவகாரத்திலும் பலரும் தொடர்ந்து விமர்சித்து வந்தனர். தற்போது துரைமுருகன் இல்ல திருமணம் வேதங்கள் முழங்க நடந்திருப்பதால் இதுவும் தொடர்ந்து விமர்சனங்களை உண்டாக்கி வருகிறது.</p>
<p><iframe src="//www.youtube.com/embed/1l9XxBDdNuY?si=vM3CtRzMTyIsGm31" width="560" height="314" allowfullscreen="allowfullscreen"></iframe></p>
Source: Read Full Article
